Barselona testləri (18-21 fevral)

Quru. Günəşli. Havanın temperaturu +8°-17° C, trasın temparaturu +9°-20° C

Bu gün Felipe Massa Barselona testlərində protokollara başçılıq edib – braziliyalı sürücü dördgünlük testlərin ən yaxşı nəticəsinə imza atıb və Red Bull sürücüsü Mark Uebberi 0.8 saniyə qabaqlayıb. Felipe həm də günün ən böyük məsafəsini qət edib – 121 dövrə. İlk üçlüyü isə Sebastyen Buemi tamamlayıb – yeni STR6 böyük qardaşı RB7-dən geri qalmır.

Felipe və Mark öz nəticələrini ikidövrəlik seriyada, Sebastyen isə üçdövrəlik seriyada göstərib. Nik Haydfeldin R31-də səhər KERS problemləri yaransa da, alman sürücü 95 dövrə vura bilib və günü dördüncü yerdə başa vurub. Nik Lyuis Həmiltonu qabaqlayıb, britaniyalı sürücü 107 dövrə vurub. Debütant Pastor Maldonado altıncı olub.

Team Lotus komandasının sürücüsü Yarno Trulli səhər qəzaya uğrayıb və komanda testləri vaxtından əvvəl tamamlamalı olub. Sessiyanın sonuna yarım saat qalmış Mixael Şumaherin maşınında texniki problemlər yaranıb – alman sürücü 114 dövrə vursa da, protokollarda yalnız Trullini qabaqlayıb.

Bununla, mövsümöncəsi testlərin üçüncü seriyası başa çatıb…

Nəticələr belə olub:

Səhər yağış, nahardan sonra quru tras. Buludlu. Havanın temperaturu +8°-15° C, trasın temparaturu +8°-17° C

Barselona testlərindən əvvəl hava proqnozu yalnız sonuncu gün yağış vəd edirdi, amma artıq dünən sürücülər yağışdan sonrakı nəm trasda, bu gün isə səhər yağış altında işləməli olublar. Komandalar Pirelli-nin yağış və keçid təkərlərini yoxlayıblar. Nahardan sonra trayektoriya tam quruyub və sürücülər sliklərə keçiblər.

Nahara qədər sessiya bir neçə dəfə qırmızı bayraqlarla dayandırılıb. Əvvəlcə Pastor Maldonado beşinci döngədə çınqıllığa düşüb, sonra isə digər debütant Serxia Peres dördnücü döngədə trasdan çıxıb. Felipe Massa isə F150th İtalia-nın sükanı arxasında iki dəfə trası tərk edib – dördüncü və yeddinci döngələrdə.

Səhər STR6-nın sükanı arxasında Daniel Rikkardo işləyib, avstraliyalı sürücü yağış altında uzun müddət liderlik edib, nahardan sonra isə onu Sebastyen Buemi əvəz edib. Nahardan sonra Narain Kartikeyan da öz yerini Corcio Mondiniyə verib – komanda ikinci sürücü yerinə əsas namizədləri işdə yoxlayır.

Komandalar müxtəlif proqramlar üzrə işləyiblər, bəziləri yarışı imitasiya ediblər. Tras quruduqca və qızdıqca sürətlər də artıb, axşama yaxın qısa dövrələr seriyasında Vitaliy Petrov, Lyuis Həmilton və Niko Rosberq növbə ilə protokollara başçılıq ediblər və Niko sonda üç günü ən yaxşı nəticəsinə imza atıb.

Nəticələr belə olub:

Quru. Buludlu. Havanın temperaturu +10°-17° C, trasın temparaturu +11°-20° C

Barselona testlərinin ikinci günü quru trasda keçib. Səhər hava soyuq idi, sonra hava qızıb, amma günün üzü buludlardan əskik olmayıb. Dünən olduğu kimi boksların önündə tribunalar dolu olub.

Testlərin başlanmasından yarım saat sonra qırmızı bayraqlar dalğalanıb – dördüncü döngədə Fernando Alonsonun Ferrarisi elektrik problemləri üzündən dayanıb. İki saatdan sonra isə marşallar yenə də qırmızı bayraqları yelləyiblər – ikinci döngədə dağılmış porebrikin fraqmentlərini yığışdırmaq lazım gəlib.

Censon Batton nahara qədər bir neçə dövrə vurub – yeni McLaren-də hidravlik problemlər yaranıb, britaniyalı sürücü yalnız səhərki sessiyanın sonunda trasa qayıda bilib.

Vitantonio Liutsi Hispania komandasının keçənilki maşınının sükanı arxasında debüt edib – yeni maşın gələn həftə hazır olmalıdır, komanda isə təcrübəli italiyalı sürücü ilə müqavilə bağlamaq fikrindədir.

Lotus Renault GP komandası yenə də hər iki sürücüsü ilə işləyib – Vitaliy Petrov dünən KERS problemləri üzündən nəzərdə tutulan proqramı tam yerinə yetirə bilməmişdi, ona görə nahardan əvvəl trasa çıxıb, Nik Haydfeld isə nahardan sonra işləyib. Digər Lotus titullu Team Lotus komandası da bu gün iki sürücü ilə işləyib – nahardan sonra bir saat T128-lə Rikardo Teşeyra işləyib, komanda sürücü ilə test və ehtiyat sürücüsü müqaviləsi bağlamaq fikrindədir, qalan vaxt ərzində trasda Heykki Kovalaynen çalışıb.

Sebastyan Fettel səhər qısa dövrələr seriyasında işləyib və protokollara başçılıq edib – Red Bull sıralanma turunu imitasiya edib, nahardan sonra isə yarış imitasiya olunub.

Xayme Algersuari yeni STR6 maşınının sürətli olduğunu sübut edərək günü ikinci yerdə başa vurub, Alonso isə bu gün üçüncü yerlə kifayətlənib…

Nəticələr belə olub:

Səhər nəm, sonra isə quru tras. Günəşli. Havanın temperaturu +10°-18° C, trasın temparaturu +11°-24° C

Dünən Barselonada bütün günü yağış yağıb, ona görə də bu gün səhər tezdən komandalar testlərə nəm trasda başlayıblar.

Soyuq hava tribunlara minlərlə azarkeşin toplanmasına mane olmayıb, onlar öz kumirlərini – ikiqat dünya çempionu Fernando Alonsonu dəstəkləməyə gəliblər, Ferrari komandasının boksunun qarşısındakı tribunalar tam dolu olub.

Nəm asfalt komandalara Pirelli-nin yağış və keçid təkərlərini də yoxlamağa imkan verib. Rütubət yüksək olduğundan tras gec quruyub, üç saatdan sonra sürücülər sliklərə keçə biliblər. Nahar fasiləsindən əvvəl testlər qırmızı bayraqlarla dayandırılıb – Rubens Barrikellonun maşınında motor yeddinci döngədə imtina edib. Nahardan yarım saat sonra Kamui Kobayaşinin beşinci döngədə dayanması ilə qırmızı bayraqlar dalğalanıb – Sauber-in bakında yanacaq qurtarıb, komanda ənənəvi yoxlamanı aparıb. İyirmi dəqiqədən sonra isə marşallar yenə də sessiyanı dayandırıblar – Xayme Algersuari çınqıllığa düşüb.

Sessiyanın sonuna on dəqiqə qalmış Sebastyan Fettel protokollara başçılıq edib – bu gün RB7 bir neçə problemlə üzləşib, amma mexaniklər hər dəfə maşını trasa qaytara biliblər. Fernando Alonso ikinci olub. İspaniyalı sürücü səhər aerodinamik yenilikləri yoxlayıb, sonra isə Pirelli təkərlərinin effektliyini qiymətləndirməyə başlayıb. Xayme ilk üçlüyü tamamlayıb.

Lotus Renault GP komandası hər iki sürücüsü ilə çıxış edib, səhər Nik Haydfeld pit-stop və digər texniki prosedurları məşq edib, amma sonra KERS-lə problemlər peyda olub və Vitaliy Petrov sessiyanın sonuna yarım saat qalmış trasa çıxa bilib.

Hispania komandasının sürücüsü Narain Kartikeyan keçənilki şassi ilə işləyib, sabah isə onu Vitantonio Liutsi əvəz edəcək – italiyalı sürücü komanda ilə müqavilə bağlamağa hazırlaşır. Komandanın yeni maşını isə gələn ay hazır olmalıdır..

Nəticələr belə olub: