Quru. Günəşli. Havanın temperaturu +27° C, trasın temperaturu +41° C

Bu mövsümdə tam quru asfaltda ilk sıralanma turunu Çin Qran Prisinə qədər gözləməli olduq. Avstraliya və Malayziyada sürücülərə yağış mane olmuşdu və yalnız mövsümün 3-cü yarışı hələlik yağışsız keçir.

Pirelli şirkəti Şanxaya Medium və Soft sliklərini gətirib – Medium komandalara artıqdır və sərbəst yürüşlərdə sürücülər problemlərlə üzləşməyiblər, amma Soft yalnız bir sürətli dövrəyə tab gətirib, sonra isə effektliyi kəskin aşağı düşüb. Ona görə də komandalar Soft tərkibinə sıralanma turunda qənaət etməyə çalışmayıblar.

Birinci sessiyada Soft təkərlərlə trasa çıxan sürücülər yalnız bir cəhdlə kifayətlənməyə çalışıblar. Protokollara Lyuis Həmilton başçılıq edib – 1:35.793, ikinci sessiyaya Marussia və Caterham sürücüləri ilə birlikdə iki debütant – Bottas və Qityerres keçə bilməyiblər.

İkinci sessiyada Mark Uebber birinci sürətli dövrəsindən sonra maşınını trasda saxlayıb – yanacaq çənində FİA-nın rəsmi təftişi üçün zəruri olan yanacaq miqdarı qalmayıb. Çox güman ki, avstraliyalı sürücüyə cəza gələcək. Protokollara yenə də Həmilton başçılıq edib – 1:35.078, mübarizəni isə Uebberlə birlikdə di Resta, Peres, Sutil, Maldonado və Vern dayandırıblar.

Sonuncu sessiyada Fettel birinci trasa çıxıb, amma tezliklə boksa qayıdıb. Sessiyanın sonunda bütün sürücülər trasa çıxıblar. Fettel və Batton Medium tərkibini seçiblər, amma üçqat dünya çempionu birinci döngədə səhvə yol verib və dövrəsini tamamlamayıb. Hülkenberq də heç bir nəticə göstərməyib.

Həmilton isə karyerasında 27-ci, mövsümdə və Mercedes AMG komandasında ilk poulunu qazanıb – 1:34.484. Sabah britaniyalı sürücü ilə birlikdə ilk cərgədən Kimi Rəykkönen start alacaq – finladniyalı sürücü çempionata qayıtdıqdan sonra ən yaxşı nəticəsini göstərib. İkinci cərgədən Alonso və Rosberq, üçüncü cərgədən Massa və Qrojan start alacaqlar. Yarış maraqlı olacaq və hər şeyi strategiya həll edəcək…

Quru. Buludlu. Havanın temperaturu +20° C, trasın temperaturu +22° C

Mövsümün ilk iki yarışından sonra 3 həftəlik fasilə zamanı komandaların mühəndisləri üzə çıxmış problemləri həll etməyə və maşınları təkmilləşdirməyə çalışıblar. Bütün komandalar Çin yarışına yeniliklər gətiriblər, qüvvələr nisbətinin müəyyən olunmasına trasın konfiqurasiyası də təsir edib – iki uzun düz yolun olması bəzi komandalara üstünlük verib, digərlərinə başağrısı olub. Sərbəst yürüşlərdə Mercedes motorlarının üstün olması üzə çıxıb.

Red Bull sürücüləri sıralanma turuna da müxtəlif konfiqurasiyalı maşınlarla çıxıblar – Sebastyan Fettel mövsümöncəsi testlərdə istifadə olunan qazburaxma sisteminə qayıdıb. Əvvəlcə komanda yalnız cümə sərbəst yürüşlərində belə bir yoxlama keçirmək istəyirdi, amma hər iki sürücü öz maşınından razı qaldığı üçün maşınların konfiqurasiyasını belə də saxlamaq qərara alınıb.

Lyuis Həmilton mövsümün ilk iki poulunu qazansa da, bu dəfə ötürmələr qutusunun dəyişdirilməsi üzündən startda beş yer itirməklə cərimə olunub.

Birinci sessiyanın sonunda bir çox sürücü trasa yumşaq təkərlərlə çıxıb, ona görə də protokollara Serxio Peres başçılıq edib – 1:36.198, mübarizəni isə “yeni” komandaların sürücüləri ilə birlikdə iki yarış ardıcıl olaraq Jan Erik Vern dayandırıb. Bütün sürücülər 107%-lik səddi aşdıqları üçün sabah starta buraxılıblar.

İkinci sessiyada hamı sarı təkərlərə keçib, protokollara isə Mark Uebber başçılıq edib – 1:35.700, onun komanda yoldaşı isə mübarizəni dayandırmalı olub. Sonuncu dəfə Fettel 2009-cu il Braziliya Qran Prisində sıralanma turunun son sessiyasına keçə bilməmişdi. Onunla birlikdə Massa, Maldonado, Senna, di Resta, Hülkenberq və Rikkardo da mübarizədən kənar qalıblar.

Sonuncu sessiyada elə ilk cəhdində Niko Rosberq fantastik nəticə göstərib – 1:35.121 və maşını tərk edib. Rəqibləri bu nəticəyə yaxınlaşmaq uğrunda mübarizə aparıblar, ən yaxın olan Həmilton Nikoya yarım saniyə uduzub. Amma britaniyalı sürücünün cəriməsi üzündən sabahkı yarışda ikinci yerdən Mixael Şumaher start alacaq. Mercedes AMG komandası 1955-ci ilin İtaliya Qran Prisindən sonra ilk dəfə birinci cərgəni tam tutub.

Beləliklə, Rosberq ilk poulunu qazanıb, Şumaher qayıdışından sonra ən yüksək start mövqeyindən yarışa başlayacaq, Kamui Kobayaşi də karyerasının ən yaxşı start mövqeyini qazanıb və üçüncü yerdən start alacaq. Onun yanından isə qayıdışından sonra ən yüksək start mövqeyini tutan Kimi Rəykkönen yarışa başlayacaq.

Yarışın startı və gedişi çox maraqlı olacaq!

Quru. Buludlu. Havanın temperaturu +15° C, trasın temperaturu +23° C

Şanxayda sıralanma turu komandaların üç Qran Pridən ibarət olan səfər proqramını başa vurmaqla, Avropa Qran Priləri ərəfəsində qüvvələr nisbətini qiymətlənidmrəyə imkan verib.

Sebastyan Fettel uik-endin bütün sərbəst yürüşlərinə liderlik edib, McLaren sürücüləri isə hər dəfə ona yaxınlaşmağa çalışıblar, digər komandalarda da inkişaf hiss olunur – Malayziyadan sonra az vaxt keçməsinə baxmayaraq, mühəndislər bəzi yeniliklər hazırlaya biliblər.

Şanxayda Pirelli-inin müxtəlif tərkibləri arasında sürət fərqi kifayət qədər böyük olub, ona görə də artıq birinci sessiyada bir çox sürücülər yumşaq təkərlərdən istifadə etməli olublar. Amma Red Bull sürücüləri belə etməyiblər, Mark Uebberin maşınında KERS də olmadığı üçün avstraliyalı sürücü gözlənilmədən mübarizəni elə birinci sessiyada dayandırmalı olub. Markla birlikdə keçənilki yeni komandaların bütün sürücüləri də mübarizədən kənar qalıblar. Protokollara isə Niko Rosberq başçılıq edib və bütün sürücülər 107%-lik səddi keçə biliblər.

İkinci sessiyanın sonuna iki dəqiqə qalmış sessiya qırmızı bayraqlarla dayandırılıb – dördüncü nəticə göstərmiş Vitaliy Petrovun maşını problemlər üzündən trasda dayanıb. Maşın evakuasiya olunduqdan sonra pit-leyndə trasa çıxmaq istəyən sürücülərdən növbə yaranıb. Belə gərgin trafikdə Sauber, Williams sürücüləri ilə birlikdə Sutil, Şumaher və Haydfeld mübarizəni dayandırıblar, protokollara isə Lyuis Həmilton başçılıq edib.

Son sessiyada yalnız Fettel və Batton trasa tələsiblər, almaniyalı sürücünün göstərdiyi nəticə birinci olub. Digər sürücülər yalnız bir cəhd ediblər, Batton və Fettel isə nəticələrinin keçilməz olduğunu gördükləri üçün ikinci cəhdlərini tamamlamadan pitə dönüblər – təkərləri sabahkı yarışa saxlamaq lazımdır. Sebastyan karyerasında 18-ci, mövsümdə 3-cü, ardıcıl 4-cü poulunu qazanıb. Startda McLaren sürücüləri onu qabaqlamağa çalışacaqlar.

Niko Rosberq hər iki Ferrari sürücüsünü üstələyib, Xayme Algersuari və Pol di Resta isə karyeralarında ən yaxşı nəticəni göstəriblər…