The Race yazır ki, Amerika komandasının rəhbərliyi bu ən vacib məsələdə hələ də qəti qərara gəlməyib. Serxio Peresin Cadillac-da yerini itirə biləcəyinə dair heç bir əlamət yoxdur, baxmayaraq ki, meksikalı sürücü bu yaxınlarda çempionatda uzun müddət qalmaq niyyətində olmadığını deyib və biz onun sözlərini təqdim etmişdik:
“Mən, məsələn, Fernando Alonso kimi uzun müddət yarışmaq istərdim, amma indi övladlarım elə yaşdadır ki, onlarla daha çox vaxt keçirmək istəyirəm. Məni avtoidmandan kənardakı layihələr də maraqlandırır. Formula 1-dən başıuca ayrılmaq istəyirəm. Düşünürəm ki, karyeramı dəqiq nə vaxt başa vuracağım tezliklə məlum olacaq”.
Amma onun finlandiyalı komanda yoldaşı Valtteri Bottasın işləri o qədər də yaxşı görünmür və bu, texniki və digər problemlərlə bağlıdır; xatırlatmaq kifayətdir ki, o, indiyədək keçirilmiş yarışların təxminən yarısında finişə çata bilməyib. Finiş gördüyü hallarda isə, məsələn Sinqapurda olduğu kimi, liderdən üç dövrə geri qalıb və ümumiyyətlə dövrələri Peresdən təxminən bir yarım saniyə ləng vurub.
Təəccüblü deyil ki, mövsümün sonu yaxınlaşdıqca onun vəziyyəti getdikcə daha qeyri-müəyyən görünür. Onu Cadillac-ın amerikalı ehtiyat sürücüsü Kolton Herta ilə əvəzləyə biləcəkləri barədə biz də yazmışdıq, amma Kaliforniyadan olan 26 yaşlı sürücü komandadakı yerə yeganə namizəd deyil.
Koltona çempionatın sonuna qədər MAC-26-nın sükanı arxasında daha bir sərbəst yürüş sessiyası keçirmək qalır və o, Formula 2-də nəticələri elə də yaxşı olmasa da, FIA superlisenziyası almaq üçün kifayət qədər xal toplayacaq.
Bununla yanaşı, The Race heç bir məlumat mənbəyinə istinad etmədən ehtimal edir ki, Cadillac Aston Martin-in ehtiyat pilotu müqaviləsi alacağı güman edilən Esteban Okonun xidmətində maraqlı deyil.
Lakin Yuki Tsunodanın menecmenti artıq Amerika komandası ilə təmasdadır. Yapon sürücü çempionata qayıtmağı çox istəyir – 114 Qran Pri təcrübəsi olan Tsunoda üçün prioritet məhz budur, IndyCar-a mümkün keçid yox.
Görünür, Cadillac heyətlə bağlı qərarı tələsdirmir, çünki onların nəzərdən keçirdiyi sürücülərin heç birinin gələn il üçün müqaviləsi yoxdur. Amma vəziyyət maraqlı məcrada inkişaf edir, çünki komandanın hər iki sürücüsünün uzunmüddətli müqaviləsi var və Bottasla əməkdaşlığı dayandırmaq üçün onlar finlandiyalı sürücü ilə hansısa razılığa gəlməli olacaqlar. Əgər Peres özü “ailə vəziyyətinə görə” ayrılmaq istəsə, o zaman Cadillac-da iki vakant yer açıla bilər. Hərçənd bu ssenari yenə də o qədər inandırıcı görünmür.
