Quru. Buludlu. Havanın temperaturu +26° C, trasın temperaturu +46° C

Valensiyada sıralanma turu həlledici əhəmiyyət kəsb edir, bu trasda keçirilmiş dörd yarşdan üçündə poulun sahibi qarışda qələbə qazanıb – son iki ildə bu trasda poul və qələbəni Sebastyan Fettel bayram edib.

Fettelin komanda yoldaşı Mark Uebber praktiki olaraq sərbəst yürüşlərdə tam işləyə bilməyib – maşının müəyyən sistemlərində hidravlik problemlər üzə çıxıb. Timo Qlok isə bu gün səhər sərbəst yürüşlərdən sonra özünü pis hiss edib və sıralanma turunu buraxmalı olub.

Birinci sessiyada Uebber növbəti problemlərlə üzləşib – hətta Soft təkərlərlə trasa çıxan avstraliyalı sürücü növbəti sessiyaya çıxa bilməyib. Heykki Kovalaynen mövsümdə ikinci dəfə növbəti sessiyaya adlayıb, Mark, Vern və yeni komandaların digər sürücüləri isə mübarizədən kənar qalıblar. Protokollara Pastor Maldonado başçılıq edib – 1:38.825.

İkinci sessiyada Heykki Medium təkərlərlə Rikkardonu da qabaqlayıb. Digər sürücülərin mübarizəsi gərgin olub və ilk onluq 0.214 saniyəyə yerləşib. Ona görə də sürətli dövrədə kiçik bir səhv həlledici olub. Hər iki Ferrari sürücüsü, yeddiqat dünya çempionu mübarizəni dayandırmalı olublar, onlarla birlikdə Senna, Peres, Kovalaynen və Rikkardo da poul uğrunda mübarizədən kənar qalıblar. Protokollara Roman Qrojan başçılıq edib – 1:38.504.

Son sessiyada mübarizə daha gərgin olub. Qrojan və Maldonado protokollara başçılıq ediblər, amma Valensiyada poullar ənənəsinə Fettel davam edib və ən yaxın rəqibini 0.3 saniyə qabaqlayıb – 1:38.086, beləliklə, almaniyalı sürücü karyerasında 33-cü, mövsümdə isə 3-cü poulunu qazanıb.

Sabah Fettellə birlikdə birinci cərgədən Lyuis Həmilton start alacaq, arxadan Maldonado və Qrojan liderliyi ələ almağa çalışacaqlar…

Quru. Günəşli. Havanın temperaturu +27° C, trasın temperaturu +45° C

Uik-end ərəfəsində FİA komandaları xəbərdar edib ki, onlar sıralanma turu ilə yarış arasında motorun kartoqrafiyasını dəyişə bilməzlər. Əvvəllər komandaların çoxu sıralanma turunda sonuncu cəhdlərində motorun xüsusi rejimindən istifadə edirdilər, amma Valensiyada mühəndislər universal qərarlar axtarmalı olublar. Bir çoxları hesab edirdilər ki, dəyişikliklər qüvvələr nisbətini dəyişəcək.

Medium və Soft tərkibləri arasında sürət fərqi çox olsa da, Felipe Massadan başqa top-komandaların digər sürücüləri birinci sessiyada sarı təkərlərdən istifadə etməyiblər – protokollara da Massa başçılıq edib. Mübarizəni isə yeni komandaların sürücüləri ilə birlikdə Xayme Algersuari dayandırıb – ispaniyalı sürücü üç ardıcıl sıralanma turunda ikinci sessiyaya keçə bilmir. Sürücülərin hamısı 107%-lik səddi aşa biliblər.

İkinci sessiyanın sonuna səkkiz dəqiqə qalmış qırmızı bayarqlar dalğalanıb – Maldonadonun maşını təhlükəli yerdə donub qalıb. İlk beşlik trasa qayıtmayıb, digər sürücülər isə mübarizəni davam ediblər. Son cəhdində Sutil onluğa daxil olub. Mübarizəni isə Sauber və Williams sürücüləri ilə birlikdə Petrov, di Resta və Buemi dayandırıblar. Protokollara isə Fettel başçılıq edib.

Sonuncu sessiyada Sutil trasa çıxmayıb – sabah almaniyalı sürücü təkər seçimi edə biləcək, Haydfeld bir dövrə vuraraq boksa qayıdıb. Fettel isə Red Bull-a səkkiz yarışda səkkizinci poulu qazanıb, Uebber ikinci olmaqla birinci cərgəni tamamlayıb. İkinci cərgədən isə Həmilton və Alonso start alacaqlar.

Hələlik dəyişikliklər Red Bull-un sıralanma turunda hegemonluğuna son qoymayıb, amma Silverstounda vəziyyət dəyişə bilər – iki həftədən sonra stabil işlənmiş qaz axınına məhdudiyyət qoyulacaq…