Oskar çempionatın rəsmi saytına müsahibəsində bildirib ki, texniki reqlamentdəki dəyişiklik onu təbii və öyrəşdiyi pilotaj üslubunu dəyişməyə məcbur edib.
“Əlbəttə, komandamız istədiyimiz qədər uğurlu çıxış etmir. Xüsusən də mən yeni maşına uyğunlaşmağa çalışarkən gözlədiyimdən daha ciddi çətinliklərlə üzləşmişəm, – deyə Piastri gileylənib. – Bundan başqa, ümumiyyətlə, Formula1-də hamı üçün bu güc qurğularına uyğunlaşmaq asan olmayıb.
Şübhəsiz, çətinliklər az olmayıb və mənə pilotaja yanaşmada çox şeyi dəyişmək lazım gəlib. Amma hiss edirəm ki, ilin ikinci yarısında müəyyən irəliləyişə nail ola bilmişəm, buna görə də indi sadəcə bunu davam etdirməyə çalışıram.
Əsas çətinlik, yəqin ki, məhz bundadır ki, bu ilki maşınlar əvvəlki illərin texnikası ilə müqayisədə fərqli pilotaj üslubu tələb edir. Əlbəttə, o vaxt da müəyyən mənada uyğunlaşmaq və nəyisə öyrənmək lazım gəlirdi, amma indi başqa amillər toplusunu nəzərə almaq lazım gəlir.
Aydındır ki, maşınlar daha yüngül olub, təkərlərin davranışı da ciddi şəkildə dəyişib. Bütün bunlara görə daim limitdə pilotaj etmək lazım gəlir – təbii ki, mən bizim maşından danışıram və bu barədə digər sürücülərin nə düşündüyünü bilmirəm.
Dəyişikliklər böyükdür. Biz həmişə müəyyən mənada limitdə pilotaj edirik, amma bu il vəziyyəti xilas etməyə çalışanda həmin həddi daim aşmış olursan.
Sükan arxasındakı hisslər əvvəllər yaşadıqlarımdan kifayət qədər fərqlənib və bu, ciddi uyğunlaşma tələb edib. Yenidən çox şeyi öyrənməli olmuşam ki, sükan arxasında özüməinamı bərpa edim, imkanların həddini yenidən hiss edim, buna uyğunlaşmaq isə həmişə çətin olur. Amma ümid edirəm ki, yenə də irəliləyirəm”.





