F-1.az xəbər verir ki, bu toqquşmada maşın zədə almasa belə, MCL60-ın yarış tempi keçən həftəsonu xallar uğrunda mübarizə aparmaq üçün kifayət etməyəcəkdi.
Lando Norris: “Maşın startda zədələnməsəydi belə, nəticəni əsaslı şəkildə dəyişməzdi. Zərərin nə qədər pis olduğunu bilmirəm, amma tempin olmamasının bununla heç bir əlaqəsi yoxdur. Sadəcə maşın çox yavaşdır.
Nəsə baş verə bilər deyə yarışmağa davam etdim. Şanslar kiçik idi, amma hadisələrin necə inkişaf edəcəyini heç vaxt bilmirsən, ona görə də hər ehtimala qarşı trasda qalmağa dəyər. Vaz keçməyin mənası yoxdur.
Mayamidəki tras, uzun döngələr, temperatur və asfalt örtüyü bizə uyğun deyildi. Söhbət bir çox müxtəlif aspektlərdən gedir. Üstəlik, bu həftəsonu rəqiblərin heç birində sürət problemi yox idi. Ola bilsin ki, yalnız AlphaTauri-nin yavaş maşını var idi, digərləri isə çox sürətlə sürürdülər. Alfa Romeo və Haas çox sürətli idilər, Alpine də bizdən sürətli idi.
Ona görə də deməzdim ki, Mayamidə imkanlarımızdan da pis çıxış etdik. Sadəcə, qalanlar irəliyə doğru böyük addım atdılar və bizim maşın trasın xarakteristikalarına uyğun gəlmirdi. Son vaxtlar danışdığım eyni şeydir”.
