FOTA-nın üzvləri FİA-nın Ümumdünya Şurasının Bəhreyn Qran Prisini təqvimə qaytarmaq barədə qərarından sonra ilk iclaslarını keçiriblər. İclasın yekununda çempionat rəhbərliyinə məktub imzalanıb – Autosport məktubda komandaların oktyabrın 30-da Saxir trasında yarışmaq istəmədiklərinin bildirildiyini xəbər verib.
Hələlik heç bir rəsmi bəyanat yayılmayıb, amma güman edilir ki, FOTA məktubu FİA-ya, FOM-a və Bəhreyn Qran Prisinin təşkilatçılarına yollayıb. Məktubun mətnində aşkar deyilir ki, komandalar oktyabrın sonunda Bəhreyndə deyil, Hindistanda çıxış etmək istyirlər.
Amma FOTA Bəhreyn yarışının təqvimə qaytarılmasının əleyhinə deyil – əsas odur ki, başqa yarışların tarixi dəyişdirilməsin. Söhbət yalnız logistika problemlərindən getmir, FOTA çempionat iştirakçılarının yekdil razılığı olmadan təqvimin dəyişdirilməsinin əleyhinədir.
