Fernando Alonso: “Mən Aston Martin komandası ilə yeni müqavilə imzaladığıma çox şadam. Bu qərarla tələsmədim, lakin yarışlar mənim həyatım və ehtirasımdır, bilirəm ki, məndə hələ də ən yüksək səviyyədə mübarizə aparmaq üçün sürət və istək var.
Mən bu komanda ilə uzunmüddətli yol getməyə və onun uğur qazanmasına kömək etməyə köklənmişəm. Birlikdə qurduqlarımıza həqiqətən inanıram. Bizim əla rəhbərliyimiz, güclü mütəxəssislərimiz, gözəl tərəfdaşlarımız və mükəmməl infrastrukturumuz var.
Yarış trasında yeni xatirələr yaratmaq fürsətini səbirsizliklə gözləyirəm və inanılmaz dərəcədə sadiq azarkeşlərimizlə görüşü səbirsizliklə gözləyirəm. Onların enerjisi məni ruhlandıran xüsusi ab-hava yaradır və idmanımızı məhz bu qədər xüsusi edən də budur”.
Ləns Stroll: “Mən Aston Martin-lə çıxış etməyə davam etdiyimə və bu komanda ilə uzunmüddətli bağlılıq qurduğuma görə çox şadam. Mən bu layihənin ilk günündən bir hissəsi olmuşam və qələbələr uğrunda mübarizə aparmağa qadir komandaya çevrilmək üçün bizdə bütün zəruri resursların və mütəxəssislərin olduğuna inanıram.
Silverstounda böyük iş aparılır və biz həqiqətən irəliləyiş əldə edirik. Komandanın bütün şöbələrində gördüyüm qətiyyət məni çox motivasiya edir.
Mən bilirəm ki, düzgün istiqamətdə irəliləyirik və komandanın qarşıya qoyulan hədəflərə çatmasına kömək etmək əzmim indi hər zamankından daha güclüdür”.
Komandanın sahibi Lourens Stroll: “Ləns və Fernando layihəmizdə son dərəcə mühüm rol oynayıblar və komandanın inkişafının növbəti mərhələsində də bizimlə qalacaqlarını təsdiqləməkdən çox məmnunuq. Böyük biliyə malik, təcrübəli və ümumi işə tam sadiq iki sürücüyə sahib olmaq bütün təşkilata çox böyük fayda verir.
Biz qalib gəlmək istəyirik. Qısamüddətli perspektivdə əsas vəzifəmiz nəticələri yaxşılaşdırmaqdır. Əminəm ki, uzunmüddətli məqsədlərimizə çatmaq üçün bizdə dünya səviyyəli mütəxəssislər var”.
