Britaniya-2026: Lekler uzun fasilədən sonra qələbə qazanıb

Azarkeşlər artıq cümə axşamından trasa axışmağa başlayıblar – təşkilatçılar çoxlu əyləncə və müxtəlif tədbirlər hazırlayıblar, onların bir hissəsində pilotlar da iştirak ediblər. Şənbə və bazar günləri tribunalar tam dolu olub. Həftəsonu ərzində 564 min tamaşaçı yarışları izləyib ki, bu da Formula 1 tarixində yeni rekorddur.

Trasda da maraqlı mübarizə yaşanıb. Cümə günü keçirilən yeganə məşq sessiyasında ən yaxşı nəticəni Lyuis Həmilton göstərib və sprint sıralanma turunu qazanıb. Şənbə günü isə həm sprint yarışının, həm də əsas sıralanma turunun qalibi Kimi Antonelli olub və Mercedes-in üstünlüyünü bir daha təsdiqləyib. Bununla belə, əksər traslardan fərqli olaraq Silverstounda poul qələbəyə zəmanət vermir.

Start düzülüşünün ilk dörd cərgəsini dörd ən güclü komandanın pilotları bölüşüblər. İlk cərgədə Antonelli və Lekler, ikinci cərgədə Həmilton və Rassell, üçüncü cərgədə Həcər və Norris, dördüncü cərgədə isə Ferstappen və Piastri yer alıblar.

Qasli sıralanma turunda Strolla mane olduğuna görə üç yer itirib və yarışa 15-ci yerdən başlayıb. Strollun maşınında startdan əvvəl güc qurğusunun elementləri dəyişdirilib. O, 10 yer itirmək cəzası alıb və 21-ci yeri tutmasına baxmayaraq, yarışa 22-ci yerdən start verib.

Pirelli mərhələyə “sərt” üçlüyü – Hard rolunda C1, Medium rolunda C2 və Soft rolunda C3 tərkiblərini gətirib. Yarışa bütün pilotlar Medium təkərlərlə başlayıblar.

İsinmə dövrəsində Alonsonun maşını trasda dayanıb – mühərrik sadəcə sönüb, lakin qısa fasilədən sonra onu yenidən işə salmaq mümkün olub.

Startda Lekler və Həmilton Antonellini ötüblər. Piastri iki, Hülkenberq dörd mövqe itirib, Berman da geriyə düşüb. Okon beş mövqe qazanıb. Stüardlar Bermanın maşınının Elbonun təkərinə toxunmasını araşdırıblar və nəticədə Elbona 10 saniyə cəza veriblər. Piastri ön qanadının zədələndiyini bildirib və geriləməyə başlayıb. 2-ci dövrədə Elbon təkərlərini dəyişib. 2-ci dövrədə ilk onluq: Lekler – Həmilton – Antonelli – Rassell – Həcər – Ferstappen – Norris – Louson – Lindblad – Sayns.

3-cü dövrədə Ferstappen Həcəri, Berman isə Strollu ötüb. Piastri boksa girərək təkərlərini dəyişib. Həmilton “fals start”a görə 5 saniyə cəza alıb – işıqlar sönməzdən əvvəl maşını yerindən tərpənib. Lyuis Antonellini arxasında saxlayarkən Lekler fərqi artırmağa çalışıb. 10-cu dövrədə Kolapinto 11-ci yer uğrunda mübarizədə Saynsı ötüb.

11-ci dövrədə Antonelli ikinci yer uğrunda Həmiltonu arxada qoyub. Həmin anda Lekler artıq 4 saniyəlik üstünlük yaradıb. 12-ci dövrədə Hülkenberq Peresi ötüb. 16-cı dövrədə Elbon yenidən pit-stopa yollanıb.

17-ci dövrədə Ferstappen dördüncü yer üçün Rasselli ötüb, 18-ci dövrədə isə boksa girərək təkərlərini dəyişib. Hülkenberq də pit-stop edib. 19-cu dövrədə Stroll, 20-ci dövrədə Həcər, 21-ci dövrədə Sayns, 22-ci dövrədə isə Alonso yeni təkərlərə keçiblər 22-ci dövrədə Virtual Təhlükəsizlik Maşını (VTM) rejimi elan olunub – tribunadan trasa sarı çətir düşüb. Okon və Peres boksa giriblər.

23-cü dövrədə Kolapinto, 24-cü dövrədə isə Həmilton və Rassell pit-stop ediblər. Onların arasında 5 saniyə fərq olub və Həmilton da həmin 5 saniyəlik cəzasını burada çəkib. Rassell trasa onun önündə qayıdıb.

24-cü dövrədə Qasli, 26-cı dövrədə Lekler, 27-ci dövrədə isə Bortoleto təkərlərini dəyişiblər. 28-ci dövrədə Qasli 12-ci yer uğrunda mübarizədə Bermanı ötüb. 28-ci dövrədə Lindblad, 29-cu dövrədə isə Norris və Louson pit-stop ediblər. Həmilton uzun müddət Rasselli təzyiq altında saxlayıb. Hər iki pilot tempi artıraraq Ferstappenə çatıb.

30-cu dövrədə Həmilton Rasselli ötüb, lakin növbəti düzlükdə Corc mövqeyini geri qaytarıb. 31-ci dövrədə Berman pit-stop edib. Norris altıncı yer uğrunda mübarizədə Həcəri ötüb. Stroll tras limitlərini dəfələrlə aşdığı üçün qara-ağ bayraqla xəbərdarlıq alıb.

31-ci dövrədə Həmilton yenidən Rasselli ötüb, lakin Corc bir daha mövqeyini geri alıb. 33-cü dövrədə Rassell Ferstappenə hücum edib, lakin Maks mövqeyini qoruyub. 35-ci dövrədə Rassellə təkərdə cüzi deşilmə olduğu bildirilib və o, boksa girib.

36-cı dövrədə Hülkenberq və Antonelli, 38-ci dövrədə isə Piastri pit-stop ediblər. 38-ci dövrədə Həmilton üçüncü yer uğrunda mübarizədə Ferstappeni ötüb. 39-cu dövrədə əvvəlcə sarı bayraqlar, daha sonra isə VTM rejimi tətbiq olunub – Hülkenberqin maşını sürətlər qutusunun nasazlığı səbəbindən trasda dayanıb. Ferstappen, Norris və Həcər təkərlərini dəyişiblər. Həcərin pit-stopu zamanı gecikmə yaşanıb. 40-cı dövrədə ilk onluq: Lekler – Antonelli – Həmilton – Ferstappen – Rassell – Norris – Həcər – Louson – Lindblad – Bortoleto.

Stroll tras limitlərini aşdığına görə əvvəl bir, daha sonra ikinci 5 saniyəlik cəza alıb. Antonelli tempini artıraraq lider Leklerdən hər dövrədə bir saniyədən çox vaxt geri götürüb, lakin 42-ci dövrədə gözlənilmədən sürət itirib və boksa girib. Mexaniklər ön burun hissəsini və təkərləri dəyişiblər. Kimi yenidən trasa çıxsa da, asılqanla bağlı problemlərdən şikayət edib.

43-cü dövrədə Elbon pit-stop edib. 44-cü dövrədə Antonelli yenidən boksa qayıdıb. Mexaniklər daha bir neçə dəyişiklik ediblər və Kimi yenidən trasa çıxıb. Maşın normal dönə bilməyib. Antonelli onuncu yerdə gedərək heç olmasa bir xal qazanmağa çalışsa da, tras limitlərini pozduğuna görə 5 saniyə cəza alıb.

46-cı dövrədə Ferstappen 15-ci döngədə idarəetməni itirdikdən sonra trasdan çıxıb və çınqıllıqda ilişib qalıb. Buna səbəb arxa qanadın tam bağlanmaması olub – hərəkətli element ilkin vəziyyətinə tam qayıtmayıb. Təhlükəsizlik Maşını trasa çıxıb. Elbon boksa qayıdaraq mübarizəni dayandırıb.

Həcər, Louson, Lindblad, Bortoleto, Kolapinto, Lekler, Bottas, Həmilton, Norris, Piastri, Qasli və Sayns təkərlərini dəyişiblər. Rassell isə boksa girməyib və bunun hesabına ikinci yerə yüksəlib. Təhlükəsizlik maşınının arxasında ilk onluq: Lekler – Rassell – Həmilton – Norris – Həcər – Louson – Lindblad – Bortoleto – Antonelli – Kolapinto.

Son dövrədə restart elan olunsa da, son anda qərar dəyişdirilib və təhlükəsizlik maşını pit-leynə dönməyib. Yarış təhlükəsizlik maşınının arxasında başa çatıb.

Şarl Lekler Böyük Britaniya Qran Prisinin qalibi olub və karyerasında doqquzuncu qələbəsini qazanıb. Bu, onun 2024-cü ildəki ABŞ Qran Prisindən bəri ilk qələbəsi olub. Ferrari isə tarixində 250-ci qələbəsini əldə edib.

Corc Rassell ikinci yeri tutaraq çempionluq uğrunda mübarizədə Kimi Antonelli ilə fərqi ciddi şəkildə azaldıb. Lyuis Həmilton yarışı üçüncü pillədə başa vurub. Antonelli cəza tətbiq edildikdən sonra 15-ci yerə geriləyib.

Yarışdan sonra stüardlar qeyri-adi bir insidenti araşdırıblar. Yarış rəhbərliyi bir dövrə geri qalan pilotlara təhlükəsizlik maşınını ötməyə icazə verdiyini elan edən anda Karlos Sayns da təhlükəsizlik maşınını ötüb. Halbuki nə həmin anda o, bir dövrə geri qalan pilot olub, nə də onun maşınının nömrəsi təhlükəsizlik maşınını ötə biləcək pilotlar siyahısında yer alıb. Stüardlar nadir tətbiq olunan cəza növündən – cərimə dövrəsindən istifadə ediblər. Nəticədə Karlos protokolda 12-ci yerdən 17-ci yerə düşüb.

Mübarizə 2 həftə sonra əfsanəvi Spa trasında davam edəcək.

* Kimi Antonellinin nəticəsinə tras hüdudlarını dəfələrlə pozduğu üçün 5 saniyə əlavə edilib.

** Karlos Saynsın nəticəsinə Təhlükəsizlik Maşını trasda olan zaman qaydaları pozduğu üçün 1 dövrə əlavə edilib.

Sürətli dövrə: Kimi Antonelli – 1:31.777 (37-ci dövrə, 231.077 km/saat)