Braziliya-2016: Sıralanma turu

San Pauluda hava cümə günü isti keçmişdi. Lakin şənbə günü temperatur kəskin aşağı düşüb və komandaların ilk iki sərbəst yürüş sessiyalarında topladıqları məlumatlar aktuallığını itirib. Komandalar üçüncü sessiyanın yalnız son yarım saatında normal işləyə bilmişdilər.

F-1.az xatırladır ki, cümə günü hər iki sessiyada protokollara Həmilton başçılıq etsə də, şənbə günü keçirilən üçüncü sessiyanın qalibi Rosberq olmuşdu. Havanın soyuması isə ən çox Ferrari sürücülərinin xeyrinə olub – Fettel və Rəykkönen üçüncü məşqlərdə yalnız Mercedes AMG sürücülərindən geri qalıblar.

İnterlaqosda rəqibini ötmək o qədər də asan deyil və poul böyük əhəmiyyət daşıyır. Nəzərə alaq ki, buradakı son üç yarışda pouldan başlayan sürücü qalib gəlib. Son iki ilin qalibi isə, hazırda çempionatda 19 xal fərqlə lider olan Niko Rosberq olub.

Pirelli keçən il İnterlaqosa Medium və Soft tərkibləri gətirmişdi. Bu il tərkiblərə Hard da əlavə olunub, lakin Hard təkərlər sürücülər tərəfindən çox az sifariş edilib. Burada Soft təkərlərlə Medium təkərlər arasındakı fərq bir dövrədə bir saniyədən daha artıqdır.

Sıralanma turundan əvvəl Fettelin maşınında hidravlik sızma aşkar edilib. Mexaniklər problemin aradan qaldırılması üçün çalışıblar. Sessiyanın başlamasına qədər tamamlamaq mümkün olmasa da, startdan bir-neçə dəqiqə sonra alman sürücü trasa çıxa bilib.

Birinci sessiyada bütün sürücülər Soft təkərlərlə trasa çıxıblar. Həmilton ilk cəhdindən sonra protokollara başçılıq edib – 1:11.511. Bu nəticə britaniyalıya sessiyanı birinci yerdə başa vurmaq üçün kifayət edib. Top-komandaların sürücüləri ikinci cəhdlərinə çıxmayıblar, yerdə qalan sürücülər isə trasa qayıdıblar. Manor və Sauber sürücüləri ilə yanaşı, Batton və Maqnussen mübarizəni dayandırıblar. Batton radioda texniki problemdən şikayət edib.

İkinci sessiyaya da bütün sürücülər Soft təkərlərlə çıxıblar. Həmiltonun nəticəsi 1:11.238 olub və yenə də hamını üstələyib. Rosberq ondan cüzi fərqlə geri qalıb. Mercedes AMG, Red Bull və Ferrari sürücüləri ilə yanaşı, Palmer də sessiya ərzində trasa qayıtmayıblar. Williams və Toro Rosso sürücüləri, o cümlədən, Qutyerres və Palmer mübarizəni dayandırıblar. Alonso bir daha McLaren-i son sessiyaya daşıya bilib.

Sonuncu sessiyada Həmiltonun ilk cəhdində nəticəsi 1:10.860 olub və Rosberqi 0.162 saniyə qabaqlayıb. Onlardan arxada isə Red Bull və Ferrari sürücüləri arasında gərgin mübarizə gedib – üçüncü və altıncı yerdəki sürücülər arasındakı fərq 0.13 saniyə olub. Mercedes AMG sürücülərinin hər ikisi son cəhdlərində nəticələrini yaxşılaşdırıblar, lakin Həmilton komanda yoldaşını 0.102 saniyə üstələyə bilib.

Lyuis Həmilton karyerasında 60-cı, cari mövsümdə isə 11-ci poulunu rəsmiləşdirib. Mercedes AMG sürücüləri yarışa ilk sıradan başlayacaqlar. Sonrakı yerləri isə müvafiq olaraq, Rəykkönen, Ferstappen, Fettel və Rikkardo tutublar. Roman Qrojan yeddinci olaraq komandasına bu il sıralanma turundakı ən yaxşı nəticəni qazandırıb. Düzdür, fransız sürücü Suzukadakı yarışa da yeddinci yerdən başlamışdı, lakin buna səbəb rəqiblərinin aldığı cərimələr olmuşdu.

Sabah bizi olduqca maraqlı mübarizə gözləyir və titulun taleyi həll oluna bilər…

Yer N Sürücü Komanda 1-ci sessiya 2-ci sessiya 3-cü sessiya
Yer Zaman Dövrə Yer Zaman Dövrə Zaman Dövrə
1 44 Lyuis Həmilton Mercedes AMG 1 1:11.511 3 1 1:11.238 3 1:10.736 6
2 6 Niko Rosberq Mercedes AMG 2 1:11.815 3 2 1:11.373 3 1:10.838 6
3 7 Kimi Rəykkönen Ferrari 4 1:12.100 5 6 1:12.301 4 1:11.404 6
4 33 Maks Ferstappen Red Bull 3 1:11.957 3 3 1:11.834 3 1:11.485 6
5 5 Sebastyan Fettel Ferrari 5 1:12.159 4 4 1:12.010 3 1:11.495 6
6 3 Daniel Rikkardo Red Bull 6 1:12.409 3 5 1:12.047 3 1:11.540 6
7 8 Roman Qrojan Haas 12 1:12.893 10 9 1:12.343 5 1:11.937 3
8 27 Niko Hülkenberq Force İndia 7 1:12.428 8 10 1:12.360 6 1:12.104 6
9 11 Serxio Peres Force İndia 10 1:12.684 8 8 1:12.331 7 1:12.165 6
10 14 Fernando Alonso McLaren 11 1:12.700 5 7 1:12.312 6 1:12.266 6
11 77 Valtteri Bottas Williams 9 1:12.680 5 11 1:12.420 5
12 21 Esteban Qutyerres Haas 14 1:13.052 11 12 1:12.431 3
13 19 Felipe Massa Williams 8 1:12.432 4 13 1:12.521 7
14 26 Daniil Kvyat Toro Rosso 15 1:13.071 9 14 1:12.726 6
15 55 Karlos Sayns Toro Rosso 13 1:12.950 9 15 1:12.920 6
16 30 Colion Palmer Renault 16 1:13.259 5 16 1:13.258 6
17 22 Censon Batton McLaren 17 1:13.276 10
18 20 Kevin Maqnussen Renault 18 1:13.410 6
19 94 Paskal Verlyayn Manor 19 1:13.427 8
20 31 Esteban Okon Manor 20 1:13.432 8
21 9 Markus Eriksson Sauber 21 1:13.623 8
22 12 Felipe Nasr Sauber 22 1:13.681 8
, , , , , , ,

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

*

*

*