Hər il olduğu kimi, bu dəfə də FİA Qran Prinin stüardları cərgəsinə keçmişin təcrübəli sürücülərini cəlb edəcək. Formula1-də qırx Qran Prinin iştirakçısı, Amerikanın Lə Man seriyasının ikiqat qalibi, əfsanəvi “Lə Manın 24 saatı” yarışının qalibi Emanuele Pirro Çin Qran Prisindən sonra Bəhreyn Qran Prisində də üçüncü stüard vəzifəsini icra edəcək.
Keçən il Pirro FİA tərəfindən Malayziya yarışına stüard təyin olunmuşdu. Bəhreyndə digər iki stüard FİA-nın Ümumdünya şurasının üzvü Harri Konelli və FİA-nın stüardlar məktəbinin məzunu, ispaniyalı Silviya Bellot olacaq.