Williams maşının çəkisini azaltmağı bacardı, lakin ciddi irəliləyiş əldə etmək mümkün olmadı. 2024-cü ilin sonunda Haas komandasının rəhbəri vəzifəsindən azad edilmiş Günter Ştayner hesab edir ki, Williams-ın indiki rəhbəri Ceyms Vaulz da eyni aqibətlə üzləşəcək.
“Ceymsin işini yaxşı yerinə yetirmədiyini düşünürəm, amma ona ən azı bütün elektron məktublarını oxumağa zaman vermək lazımdır, – deyə Ştayner The Red Flags podkastında zarafat edib. – Onlar Ceymsə ilin əvvəlində göndərilmişdi. Nə etməli olduğunu bilir, sadəcə onları oxumağa hələ vaxtı olmayıb.
Ona görə əvvəlcə poçtla məşğul olsun və ilin sonuna qədər həll tapsın. Əgər ilin sonuna qədər bütün məktubları oxumağa vaxt tapmasa, onu işdən çıxarmaq olar.
Əgər hər şey indiki kimi davam edərsə, gələn mövsümün beş-altı yarışından sonra komandada dəyişikliklər olacaq. Məktubları oxumaq və vəziyyəti düzəltmək üçün kifayət qədər vaxt verildi. Əgər bunu etməmisən, demək vaxtın gedib.
Mövsümün əvvəlində Williams vəd vermişdi: “Biz geri dönəcəyik, nə etməli olduğumuzu dəqiq bilirik”. Və nə oldu? İndi onlar əksinə geriyə doğru gedirlər, irəli yox”.
Yay fasiləsinə Williams konstruktorslar kubokunda doqquzuncu yerdə, 11 xalla yollanıb. Ştayner hesab edir ki, Qrouv komandasının rəqibləri, ilk növbədə Aston Martin mövsümün sonunadək onları keçə bilərlər.
“Düşünürəm ki, Aston Martin-ə bir yarışda iki xal, başqa yarışda da iki xal qazanmaq və nəticədə bu 11 xala çatmaq üçün yaxşı şans var, çünki mən Williams-ın əlavə bir xal belə qazanacağına inanmıram”, – deyə Günter Ştayner yekunlaşdırıb.
