Quru. Buludlu. Havanın temperaturu +23° C, trasın temperaturu +28° C

Bir həftə əvvəl Yaponiyada Sebastyan Fettel pouldan start alaraq yarışda qələbə qazanmışdı, Koreyada sərbəst yürüşlərdə almaniyalı sürücü yenə də rəqiblərindən bir baş üstün olmuşdu. Ona görə də Koreya Qran Prisinin sıralanma turu səbirsizliklə gözlənilirdi – axı əvvəlki Koreya yarışlarında pouldan start alan sürücü yarışda qələbə qazana bilməmişdi.

Birinci sessiyanın əvvəlində Kartikeyanın maşınında əyləc problemi yaşanıb – hindistanlı sürücü trasda fırlanıb, boksa qayıdıb və bir daha trasa qayıtmayıb. Protokollara Sebastyan Fettel başçılıq edib – 1:38.208, mübarizəni isə zəif komandaların sürücüləri ilə birlikdə mövsümdə üçüncü dəfə Bruno Senna dayandırıb.

İkinci sessiyada Fettel elə ilk cəhdində əla nəticə göstərib – 1:37.787 və kokpiti tərk edib. Sessiyanın sonunda Rikkardo sarı bayraqların dalğalanmasına səbəb olub və bir çox sürücülər sürətli dövrələrini dayandırmalı olublar. Mübarizəni isə Batton, Peres, Kobayaşi, di Resta, Maldonado, Rikkardo və Vern dayandırıblar.

Son sessiyada Fettel yenə də ilk cəhdində sürətli olub – 1:37.316, amma ikinci cəhdində Mark Uebber komanda yoldaşını üstələyib – 1:37.242, beləliklə, Mark karyerasında 11-ci, mövsümdə isə ikinci poulunu qazanıb.

Ardıcıl ikinci yarışda Red Bull sürücüləri ilk cərgədən start alacaqlar, ikinci cərgədən Həmilton və Alonso liderlərə hücum edəcəklər. Yarış çox maraqlı olacaq!

Quru. Buludlu. Havanın temperaturu +22° C, trasın temperaturu +28° C

Dünən sürücülər yağış altında işləməli olmuşdular, ona görə də bu gün səhər komandalar hər iki təkər tərkibinin uzun məsafədə effektivliyini qiymətləndirməyə çalışıblar. Xatırladaq ki, Pirelli Koreyaya ən yumşaq təkər cütünü gətirib – yarışda pit-stopların çox olması gözlənildiyindən sıralanma turunda təkərlərə qənaət etmək xüsusi əhəmiyyət kəsb edib.

Birinci sessiyada Daniel Rikkardo boksu tərk edə bilməyib – onun maşınında soyuducu maye axıb. Protokollara Lyuis Həmilton başçılıq edib, mübarizəni isə yeni komandaların sürücüləri ilə birlikdə Rubens Barrikello dayandırıb. Rikkardodan başqa qalan sürücülərin hamısı 107%-lik həddi aşa biliblər.

İkinci sessiyada da protokollara Həmilton başçılıq edib, mübarizəni isə Sauber və Toro Rosso sürücüləri ilə birlikdə Şumaher, Senna və Maldonado dayandırıblar.

Sonuncu sessiyada Force İndia sürücüləri mübarizədən imtina ediblər, Rosberq isə yalnız bir cəhdlə kifayətlənib. Digər sürücülər isə poul uğrunda mübarizədə iki cəhddən yaralanıblar. Mövsümdə ilk dəfə olaraq poul Red Bull sürücülərinə qismət olmayıb – Lyuis Həmilton karyerasında 19-cu poulunu qazanıb. Sabah yarışın startı maraqlı olacaq…