Formula1 45 ildən sonra ilk dəfə İspaniyanın paytaxtına qayıdır və dünya çempionatının iştirakçıları hələ 5.461 km uzunluğundakı, 22 döngədan ibarət yeni trasın konfiqurasiyasının xüsusiyyətlərini öyrənməlidirlər. MadRing Madridin şimal-şərq kənarında, Barahas rayonunda yerləşən IFEMA sərgi kompleksinin ərazisindədir və şəhərin əsas beynəlxalq hava limanına çox yaxındır.
Avtodromun bu cür yerləşməsi səbəbindən onu bəzən “şəhər trası” adlandırırlar, amma Abad bununla razı deyil.
“Bu, belə deyil, çünki biz ümumi istifadədə olan yolun yalnız IFEMA kompleksinə daxil olan kiçik bir hissəsindən istifadə edirik və orada heç bir yaşayış binası yoxdur, – deyə o, İspaniyanın Cadena Ser radiostansiyasına müsahibəsində bildirib. – Yolun bu hissəsini zərurətdən istifadə etdik. Qran Priı məhz bu ərazidə keçirmək qərarına gəldiyimiz üçün şəhər sərhədlərindən xeyli kənarda avtodrom tikməyə ehtiyac qalmadı.
Məhz buna görə də, avtodromu başqa hər hansı bir yerdə inşa etmək lazım gəlsəydi tələb olunacaq xərclərin 10 faizini belə aşmayan büdcəyə sığa bildik. IFEMA kompleksi artıq 35 ildir bu ərazidə yerləşir və onun sahibləri ilə rəhbərliyinin dəstəyi olmasaydı, Formula1 yarışını təşkil etmək mümkün olmazdı”.
MadRing-in özəllikləri arasında dərhal El Monumental ləqəbini alan döngə seçilir – Cənubi Amerikada bu adı adətən ən böyük futbol stadionlarına verirlər, amma indi bu söz Formula1-də də adiləşməyə başlayır.
“Bu döngənin uzunluğu 547 metrdir, bənkinqin maililiyi isə 24 faizdir, – deyə Abad davam edib. – Cəsarətlə deyə bilərəm ki, bizim avtodromda ən təsirli hissə olan bu döngə təkcə trasımızda yox, bütün çempionat miqyasında əfsanəvi status qazanacaq.
Demək olar ki, o, yarış oyunu Scalextric ilə bağlı uşaq fantaziyalarını xatırladır. Cəmi bir aydan sonra burada Formula1 maşınlarının şütüyəcəyi fikri özü mənə zövq verir.
Biz bu döngəyə xüsusi xarakter vermək istəyirdik ki, seçilsin və uşaqlar kompüter oyunları oynayanda məhz bizim avtodromu seçsinlər.
Formula1-lə onillik müqaviləmiz var və debüt yarışından sonra da müəyyən nüansların üzərində işləməyə davam edəcəyik, amma müxtəlif xırda detalların düzəldilməsi normaldır, bu, istənilən yeni avtodromda baş verir. Yeri gəlmişkən, artıq bütün Avropada elə bir müvəqqəti tribuna qalmayıb ki, biz onu icarəyə götürməyək, üstəlik onların hamısı ən yüksək keyfiyyətlidir.
Biz həmişə qrafikə uyğun işləyirik, buna görə də bütün tribunalar artıq quraşdırılıb və hazırda qonaq zonalarının təşkilini yekunlaşdırırıq. Amma hər şey birbaşa yarış trasından başlayır və onun asfaltı artıq ideal şəkildə döşənib, buna görə də Qran Priyə hər şey hazırdır”.
