Vaulzın sözlərinə görə, Alonso zamanında Oskarı buraxmayıb və bunun əvəzinə Saynsı ötərək önə keçib, baxmayaraq ki, həmin anda onların arxasında artıq Piastri olub. Nəticədə iki ispan sürücü arasında mövqe uğrunda mübarizə başlayıb və Karlos McLaren sürücüsünü görməyərək ona çırpılıb. Vaulz əlavə edib ki, mavi bayraqlar sistemindəki nasazlıq da toqquşmaya gətirib çıxarıb.
Ceyms Vaulz: “FİA sistemlərinin bəzən nasazlıq verə biləcəyinə hazır olmalıyıq. Bu qaçılmazdır, ona görə də daha etibarlı ehtiyat mexanizmə sahib olmaq vacibdir.
Lider maşına yaxınlaşanda sürücü xəbərdarlıq alır. Biz onu əlavə olaraq radioda səsli şəkildə təkrarlayırıq. Məsələn, lider 1.6 saniyə arxada olub məsafəni sürətlə azaldırsa, biz əvvəlcədən bildiriş alırıq və onu harada buraxmağı planlaya bilərik.
Bu sistemin işləməsi üçün dəqiq GPS məlumatları tələb olunur. Növbəti mərhələ lider 1.2 saniyə arxada olanda baş verir – bu anda avtomatik olaraq mavi bayraq rejimi işə düşür və qarşıda bir neçə marşal postunun olacağını, orada buraxmaq lazım olduğunu bilirik.
Macarıstanda mavi bayraq sistemi sadəcə işləmədi. Bir məqamda işlər o həddə gəldi ki, marşallar əllə mavi bayraqları yelləyirdilər. Amma bu olduqca çətin və məsuliyyətli bir vəzifədir, çünki onlar avtomobillərin dəqiq nə zaman yaxınlaşdığını bilmirlər. Sonra onlar mavi işıq panellərindən istifadə etməyə çalışdılar, lakin siqnalın hansı sürücüyə ünvanlandığı göstərilmirdi.
Fernando bütün bu müddət ərzində mavi bayraqları görürdü, lakin Oskardan qabaqda qalmağa davam etdi. Avtomobilləri ardıcıllıqla buraxmaq lazımdır, ona görə də məhz Fernando daha əvvəl mövqeyini verməli idi, lakin bu baş vermədi.
Fernando ilk döngədə daxili trayektoriya üzrə hücuma keçdi. Bunun nəticəsində Karlos arxada qaldı və belə vəziyyətdə məhz onun növbəti marşal postlarından birində lideri buraxmaq öhdəliyi yaranırdı. Lakin ikinci döngədə sürət yığarkən Karlos yenidən irəli keçdi və arxada yenə Fernando qaldı – işıq siqnalları ona ünvanlanmışdı.
Növbəti döngədə Fernando yenidən daxili trayektoriya üzrə Karlosa hücum etdi, nəticədə Karlos təkrar arxada qaldı. Videoyazıda dəqiq görünür ki, Karlos trayektoriyaya qayıdırkən, məhz o anda Oskar hücuma keçdi.
Avtomatik sistem olmadıqda dövrəvi maşınlar öz mövqelərində lazım olduğundan daha uzun müddət qalırdılar. Bundan əlavə, konkret anda arxada hansı maşının olduğunu dəqiq müəyyən etmək lazım idi.
Biz Karlosu ilk döngəyə daxil olmadan əvvəl Oskarın yaxınlaşdığı barədə xəbərdar etmişdik. Amma ikinci döngəyə doğru gedərkən o, Fernando ilə bərabərləşəndə bunu bir daha etməli idik. Buna görə məsuliyyətin bir hissəsi də bizdədir.
Eyni zamanda, heç kim qəsdən Oskarı gecikdirməyə və ya ona mane olmağa çalışmadı. O anda arxada başqa bir maşın vardı və ehtimal ki, məhz o, Karlosdan əvvəl mövqeyini verməli idi”.
