Gələn il əfsanəvi ralli-reyd 49-cu dəfə keçiriləcək və yanvarın 9-da Portuqaliyanın cənubunda, Alqarvi bölgəsində proloq və ilk sürət üzrə xüsusi mərhələ ilə start alacaq, bundan sonra növbəti 11 xüsusi mərhələ Mərakeşdə baş tutacaq. Marafon yanvarın 23-də başa çatacaq, ralli-reydin gedişində isə bir istirahət günü nəzərdə tutulub və iştirakçılar həmin günü Aqadirdə keçirəcək.
Yarışın ümumi məsafəsi 7 824 km təşkil edəcək, bunun 4 341 km-i sürət üzrə xüsusi mərhələlərin payına düşəcək. Dakarın mətbuat xidmətinin yazdığına görə, Mərakeş Krallığı “həmişə səhralarının keyfiyyəti ilə seçilib ki, bu da sürprizlərlə dolu qalan bu geniş ərazini ralli-reyd üçün əla məkana çevirir. Mərakeşin beynəlxalq yarışların keçirilməsi təcrübəsi var, buna görə də ölkə qısa vaxt ərzində yeni təşkilati vəzifələri həll etməli olan Dakar təşkilatçılarına dəstək göstərə bilib”.
Yanvarın 9-da Portuqaliyada proloq keçiriləcək, ertəsi gün ralli-reyd iştirakçıları ilk sürət üzrə xüsusi mərhələdə mübarizə aparacaq, daha sonra isə bütün texnikaları ilə birlikdə bərəyə minəcək və bərə onları gecə ərzində Mərakeşin Nador limanına çatdıracaq. Yanvarın 11-də Dakar artıq Afrikada davam edəcək. Xüsusi mərhələlərin əksəriyyətinin məsafəsi 350 km-dən 500 km-ə qədər dəyişəcək.
David Kastera, ralli-reydin direktoru: “49-cu Dakar başqa bir əraziyə köçürülüb, amma buna baxmayaraq, o, bu ralli-reydi hər zaman maksimum dərəcədə çətin edən idman standartlarına tam uyğundur. Vaxtımız az olsa da, biz əsl Dakar marşrutu hazırlamışıq.
Mərakeşdə bu ərazini tanımağımız sayəsində burada əvvəllər keçirilmiş yarışların formatından xeyli kənara çıxa bilmişik: ralli-reyd iştirakçıları bu krallığı kəşf etmək imkanı qazanacaq, çünki onu bir başından o biri başına qədər keçəcəklər.
Yarış iştirakçılarına minnətdarıq (artıq 350 ərizə qeydə alınıb), onlar bizi tam dəstəkləyiblər və bu yeni macəraya hazırdırlar… Həmişə olduğu kimi, Dakar dünyanın 190 ölkəsində yayımlanacaq”.
Ralli-reydin yeni keçirilmə tarixləri formal olaraq FIA-nın Ümumdünya Avtomobil İdmanı Şurası tərəfindən təsdiqlənməlidir.
