Formula1 2017-ci ildə CVC Capital Partners fondundan alındıqdan bəri səhmlərin dəyəri 250% artıb. Hazırkı qiymət Liberty Media-ya bazar kapitallaşması 28 milyard dollara yaxınlaşan şirkətdəki payını satmağa və ciddi mənfəəti rəsmiləşdirməyə imkan verir.
Sportico Invest New York 2026 konfransında iki ildən sonra Formula1 səhmlərinin hələ də birjada alınıb-satılacağı ilə bağlı suala cavab verən Maffey deyib: “Mən deyərdim ki, Formula1 artıq açıq şirkət olmayacaq. Mərc etməli olsaydım, məhz belə bir ssenariyə üstünlük verərdim.
Qərar fond bazarındakı vəziyyətdən və səhmdarların maraqlarına uyğun hərəkət etməyə borclu olan direktorlar şurasından asılı olacaq. Buna görə də mən Formula1-in sonda satılacağı fikrinə meylliyəm.
Asan pullar artıq qazanılıb. Səkkiz-doqquz il ərzində EBITDA üç dəfə artıb. Amma qarşıdakı səkkiz-doqquz ildə onun daha üç dəfə artacağını gözləməyə dəyməz”.
Ən real alıcılar arasında suveren investisiya fondlarının və özəl investisiya şirkətlərinin konsorsiumlarının adı çəkilib. Digər variant isə çempionatın investorlar və komandaların sahibləri ilə birlikdə onun rəhbərliyi tərəfindən alınmasıdır. Belə bir struktur idarəetmə baxımından Amerikanın böyük idman liqalarında tətbiq olunan modellərə bənzəyə bilərdi.
Lakin çempionatın sahiblərinin istənilən dəyişməsi Formula1-in əqli mülkiyyət hüquqlarına sahib olan FİA tərəfindən təsdiqlənməlidir. Çempionatın kommersiya hüquqları XXI əsrin sonunadək Liberty Media-ya icarəyə verilib.
