Marçin Budkovski: “Rəhbər vəzifəyə qayıdarkən, mənim üçün inandığım bir layihənin parçası olmaq vacib idi. Cadillac qarşısına çox ciddi hədəflər qoyub. Komandanın arxasında motorsportda fəal iştirak edən TWG qrupu dayanır. General Motors isə nəhəng ambisiyalara və böyük maliyyə resurslarına malik ən iri avtomobil şirkətlərindən biridir ki, bunu əvvəlki layihələrim barədə hər zaman demək mümkün deyildi.
Mənə çox kömək edən məqamlardan biri də ünsiyyətdə olduğum bütün insanların, həmçinin direktorlar şurasına və komandanın ali rəhbərliyinə daxil olan hər kəsin motorsport dünyasının əsl peşəkarları olmasıdır. Onlar motorsportla yaşayır, onun nəfəsi ilə nəfəs alır, bu sahəni anlayır və onunla sıx bağlıdırlar. Bu, mənim çox xoşuma gəlir, çünki söhbətlər elə ilk gündən tam fərqli səviyyədə gedirdi.
Dən Taurisslə yaxından işləməyə başlayandan sonra başa düşdük ki, hər şeyin necə inkişaf etməli olduğuna dair baxışlarımız və ideyalarımız çox, hətta olduqca yaxındır. Məqsədimiz qarşısına ən ciddi hədəfləri qoya bilən güclü, rəqabətədavamlı komanda yaratmaqdır.
Rəhbərlik tərəfindən ciddi təzyiq gözləmirəm. Əlbəttə, bu cür vəzifədə gözləntilər olacaq, bu da məntiqli və normaldır, amma həmin gözləntilər nə əsassızdır, nə də Formula1 reallıqlarından uzaqdır. Hamı qarşıdakı vəzifənin miqyasını anlayır, amma onu həll etmək iradəsi də var. Mən də işə məhz bu düşüncə ilə başlayıram.
Bazar ertəsi ilk dəfə bazaya gedəcəyəm və hər şeyə təzə gözlə baxmaq imkanım olacaq. Digər Formula1 komandalarında və FİA-da işləmək təcrübəm var, bəzən kənardan nəyisə görmək daha asan olur. İlk dövr üçün prioritetim dinləmək, müşahidə aparmaq və bir komandanın iki hissəsinin – trasda və bazada çalışanların – vahid şəkildə işləməsinə nail olmaqdır”.
