Bu, TPC proqramı çərçivəsində keçirilən testlər olub (əvvəlki illərin maşınlarının testləri) və Ceymi Autódromo Internacional do Algarve trasında 32 dövrə vuraraq, 2015-ci ildən bəri real və kifayət qədər müasir Formula1 maşınını idarə etmək təcrübəsi qazanan ilk qadın sürücü olub. Ondan əvvəl bunu sonuncu dəfə Syuzi Volff bacarıb.
Ceymi qadınlar arasında keçirilən W Series-in üçqat çempionudur, həmçinin onun hesabında Amerikanın gənclər seriyası IndyNXT-də qələbə var və o, artıq ikinci mövsümdür ki, Avropa Le Man Seriyasında (ELMS) dözümlülük yarışlarında çıxış edir.
Ceymi Çedvik: “Bu, möhtəşəm gün idi, inanılmaz dərəcədə maraqlı təcrübə qazandım. Portimao kimi trasda Formula 1 maşınını idarə etməyə insanı çox az şey hazırlaya bilər, amma reallıqda təsəvvür edə biləcəyimdən on dəfə güclü təəssüratlar yaşadım.
Mənə belə bir imkan yaratdığına görə Williams komandasına çox minnətdaram. Xatırlayıram, yeniyetmə vaxtlarımda Syuzi Volffun Williams maşınını idarə etməsinə baxırdım və bu, mənə necə böyük ilham verirdi. İndi qazandığım təcrübə karyeramda mənə kömək edəcək və testlərdə günün necə keçməsindən çox razıyam. Mən bunu uzun müddət xatırlayacağam və hətta deməyə hazıram ki, bu, hələlik həyatımın ən yaxşı günüdür”.
