Corc Rassell: “Pit-stopdan sonra, pit-leynin çıxışında məni fırladan epizodda dəqiq nə baş verdiyinə əmin deyiləm. Maşını ilk cəhddə döndərə bilmədim – güc qurğusu nəsə düzgün işləmirdi. Amma ən vacibi odur ki, bu gün Mühəndislər Kubokunu qazandıq.
Komanda bu nəticə üçün çox çalışıb. Əlbəttə, bir qədər daha parlaq qələbə qazanmaq istərdik, amma işi sonadək çatdırdıq və ən əsası da budur.
Yarışda tempim yüksək idi, xüsusən də Soft təkərlərdə, amma yarışın sonlarında Intermediate təkərlərdə həm məndə, həm də Kimidə problemlər yaranıb ki, bu da kifayət qədər qəribə idi. Bu həftəsonu tempim Mexikoyla müqayisədə açıq şəkildə daha yaxşı olub. Düşünürəm ki, yaxşı çıxış etdim və indi səbirsizliklə Las Veqasdakı mərhələni gözləyirəm”.
Kimi Antonelli: “Komanda bu nəticəyə layiq idi. Bu, hər kəs üçün inanılmaz il olub – təkcə trasda işləyənlər üçün yox, həm də Breklidə və Briksuortda bazalarda çalışanlar üçün.
Bunlar hər gün maksimum güclə çalışan möhtəşəm insanlardır ki, qələbələr və titul uğrunda mübarizədə bizim ən yaxşı şanslarımız olsun. Onlar bu mövsümdə inanılmaz iş görüblər və bu Mühəndislər Kubokuya layiq olublar. İndi hamımız birlikdə bu uğurun həzzini çıxaracağıq.
Yarışa gəlincə, maşının arxa hissəsinin geometriyasını yoxlamalıyıq. Sol döngələrdə idarəetmə ilə bağlı problemlərim yaranıb. Xüsusilə yüksək sürətdə bu, özünü daha qabarıq göstərib – maşının arxa hissəsi özünü çox qeyri-sabit aparıb.
Hətta finiş düzlüyündə, onun sol əyriliyində də maşının arxa hissəsi güclü şəkildə bir yandan o biri yana atılıb ki, bu da çox qəribə idi. Mütləq maşını yoxlamalı və nə baş verdiyini aydınlaşdırmalıyıq.
Fırlanmamdan sonra bütün təkərlərdə yastı sahələr yaranıb. Yalnız ikinci təkər dəsti taxıldıqdan sonra əvvəlki tempimə qayıda bildim. Əlbəttə, belə alınması üzücüdür”.
