Karlos Sayns ilə bağlı insidentin hallarını araşdıran stüardlar müəyyən ediblər ki, ikinci döngədən sonrakı düz yolda və üçüncü döngədən əvvəl sarı bayraq siqnalları aydın şəkildə görünürmüş. Bundan başqa, komanda bu barədə Karlosu xəbərdar edib və dinləmələr zamanı Williams sürücüsü bayraqları gördüyünü təsdiqləyib.
Sayns izah edib ki, sarı bayraqların təsir zonası boyunca sürəti azaltdığını göstərmək niyyətində imiş. Onun sözlərinə görə, düz yolda sürəti azaltmağı vacib saymayıb və üçüncü döngəyə yaxınlaşarkən və ondan sonra bayraqlara reaksiya verdiyini göstərməyi planlaşdırıb. O, bunu ardıcıl iki sarı bayraq sektorunda vahid sürət azalması kimi qiymətləndirib.
Sayns həmçinin əlavə edib ki, sarı bayraqların ilkin səbəbi olan maşın artıq oradan uzaqlaşıb, buna görə də bayraqların yığışdırılacağını gözləyirmiş. Lakin stüardlar bu yozumla razılaşmayıblar və Saynsa startda beş yer itirmək cəzası ilə yanaşı, iki cərimə balı da veriblər. Bununla da onun son 12 aylıq dövrdə cərimə ballarının sayı dördə çatıb.
Kvalifikasiyada 20-ci nəticəni göstərmiş Cadillac sürücüsü Serxio Peres formal olaraq startda üç mövqe itirəcək. Buna səbəb onun 18-ci, 19-cu və 20-ci döngəlarda yarış trayektoriyası üzərində ləng hərəkət etməsi olub. Nəticədə sürətli dövrədə olan Oskar Piastri sürətini azaltmağa və trayektoriyasını dəyişməyə məcbur qalıb.
