Qurumaqda olan tras. Buludlu. Havanın temperaturu +17° C, trasın temperaturu +23° C

Monakoda sıralanma turu həmişə əlamətdar hadisədir. Dar küçələrdə ötmə demək olar ki, mümkün deyil, start mövqeyi çox vacibdir, amma sürücülər risk və sürət arasında inci kompromis axtarmaqla sürətli dövrədə hücum edirlər.

Bu gün səhər sərbəst yürüşlərdə üç sürücü qəzaya uğrayıb – Felipe Massa, Adrian Sutil və Roman Qrojan. Mexaniklər əllərindən gələni ediblər ki, zədələnmiş maşınları sıralanma turuna qədər bərpa etsinlər – Force İndia və Lotus bu işin öhdəsindən gələ biliblər, amma Ferrari-nin mexanikləri çatdıra bilməyiblər: F138-in ötürmələr qutusunu dəyişmək lazım gəlib.

Vəziyyəti hava şəraiti də çətinləşdirib, üç sərbəst yürüş quru havada keçmişdi, amma sıralanma turunun başlanmasına yarım saat qalmış yağış başlayıb.

Birinci sessiyada sürücülər keçid təkərlərindən istifadə ediblər. Amma sessiyanın startından bir dəqiqə sonra sarı bayraqlar peyda olub – 3-cü döngədə Jül Byankinin maşınında motor tüstülənib. Sürücülərin göstərdikləri nəticələr trafikdən və trasın vəziyyətindən asılı olub. Protokollara Maldonado başçılıq edib – 1:23.452, mübarizəni isə di Resta, Pik, Qutyerres, Çilton, Byanki və Massa dayandırıblar. Caterham-in sürücüsü Qido van der Qarde karyerasında ilk dəfə ikinci sessiyaya keçib.

İkinci sessiyaya da sürücülər keçid təkərlərində başlayıblar. Asfalt qurusa da, bəzi yerlərdə, xüsusən də kölgələrdə hələ kifayət qədər nəm olub. Van der Qarde birinci olaraq sliklərə keçib, sonra digər sürücülər də eyni addımı atıblar. Hər dövrədən sonra trasın vəziyyəti yaxşılaşdığı üçün sürücülərin protokollarda mövqeyi tez-tez dəyişib. Yekunda protokollara Fettel başçılıq edib – 1:15.988, Hülkenberq, Rikkardo, Qrojan, Bottas, van der Qarde və Maldonado isə mübarizədən kənar qalıblar.

Sonuncu sessiyada hamı SuperSoftla iki cəhd edib. Birinci cəhdində protokollara Red Bull sürücüləri başçılıq ediblər – Fettel komanda yoldaşını üstələyib: 1:14.333, amma poulun taleyi son saniyələrdə həll olub – əvvəlcə Uebber, sonra Həmilton, yekunda isə Rosberq poula sahib çıxıb.

Niko 3-cü ardıcıl poulunu qazanmaqla, Mercedes AMG-yə 4-cü ardıcıl poul yaşadıb. Həmiltonun ikinci olması komandaya ilk cərgəni zəbt etməyə imkan verib. İkinci cərgə isə tamamilə red Bull-undur: Fettel yenə də Uebberi qabaqlayıb. Titula digər namizədlər – Rəykkönen və Alonso isə üçüncü cərgədən start alacaqlar.

Quru. Günəşli. Havanın temperaturu +23° C, trasın temperaturu +41° C

Monakoda sıralanma turu da çox maraqlı olur. knyazlığın küçələrində ötmək mümkün deyil, start mövqeyi həlledici əhəmiyyət kəsb edir, amma sürücülər sürətli dövrədə aqresivlik və ehtiyatlılıq arasında kompromis axtarmalı olurlar ki, maşın zədələnməsin. Monte Karloda uğurla uğursuzluq arasında sərhəd bəzən o dərəcə nazik olur ki, sıralanma turunun nəticələrini maşının effektliyi deyil, sürücünün səhvsiz sürməsi və öz gücünə inamı müəyyən edir.

Bu gün səhər sərbəst yürüşlərdə bir neçə insident yaşanmışdı, sessiya isə qırmızı bayraqlar altında başa çatmışdı – Pastor Maldonado qəzaya uğramışdı. Williams-ın mexanikləri sürücünün maşınını sıralanma turuna qədər bərpa ediblər. Qəzadan əvvəl Pastor Serxio Peresi bolka salmışdı və buna görə də stüardlardan on yerlik cərimə almışdı.

Beş yerlik cəriməni isə iki həftə əvvəl Mixael Şumaher almışdı – almaniyalı sürcüü Bruno Senna ilə qəzada günahkar elan olunmuşdu.

Birinci sessiyanın startından bir neçə dəqiqə sonra qırmızı bayraqlar dalğalanıb – Serxio Peres baryerlərə çırpılaraq asılqanlarını zədələyib. Sürücülərin çox SuperSoft təkərlərlə trasa çıxıb və protokollara Niko Hülkenberq başçılıq edib. Mübarizəni isə Pereslə birlikdə Caterham, Marussia və HRT komandaları tam heyətlə dayandırıblar.

İkinci sessiyanın startından bir neçə dəqiqə sonra jan erik Vern ön antiqanadını sındırıb, amma sürücü boksa qayıda bilib, düzdür, trasa bir daha qayıtmayıb. Trasda isə olduqca gərgin mübarizə gedib və protokollara Felipe Massa başçılıq edib, mübarizəni isə Hülkenberq, Kobayaşi, Batton, Senna, di Resta, Rikkardo və Vern dayandırıblar. İlk onluğa düşən sürücülər 0.4 saniyəyə yerləşiblər.

Son sessiyada Fettel trasa Soft təkərlə çıxıb və bir dövrədən sonra boksa qayıdıb. Digər sürücülər isə poul uğrunda SuperSoft-la mübarizəyə girişiblər. Rosberq birinci cəhdində əla nəticə göstərib, amma ikincə cəhdində Uebber və Şumaher onu qabaqlayıblar.

Mixael karyerasında 69-cu poulunu qazanıb, amma sabah 6-cı yerdən yarışa başlayacaq. Birinci cərgədən isə Uebber və Rosberq start alacaqlar, arxadan onlara Həmilton və Qrojan hücum edəcəklər…

Quru. Günəşli. Havanın temperaturu +24° C, trasın temperaturu +45° C

Səhər sərbəst yürüşlərdə Niko Rosberq və Vitantonio Liutsi ciddi qəzaya uğramışdılar, ona görə də mexniklər maşınları sıralanma turuna hazırlamaq üçün ciddi işləyiblər. Mercedes GP vəzifəsinin öhdəsindən gəlib, amma Liutsi, eləcə də onun komanda yoldaşı Narain Kartikeyan trasa çıxmayıblar – Hispania komandası bütünlüklə sıralanma turunu buraxıb.

Pirelli Monakoya Soft və SuperSoft təkərlərini gətirib, amma Monte Karlonun dar küçələrində sıralanma turu xüsusi əhəmiyyət kəsb edir, həm də bu dəfət ərkiblərin sürət fərqi elə də kəsin deyil, ona görə də təkərlərə qənaət ikinci plana keçib.

Birinci sessiyada protokollara Lyuis Həmilton başçılıq edib, mübarizəni isə yeni komandaların sürücüləri ilə birlikdə Xayme Algersuari dayandırıb. İkinci sessiyada da protokollara Lyuis Həmilton başçılıq edib. Mübarizəni isə Lotus Renault, Force İndia sürücüləri ilə birlikdə Sebastyan Buemi, Rubens Barrikello və Kamui Kobayaşi dayandırıblar.

Sonuncu sessiyada Sebastyan Fettel elə ilk cəhdində trasın rekorduna imza atıb – 1:13.556, rəqiblər ikinci cəhdlərinə çıxarkən trasda qırmızı bayraqlar dalğalanıb – Serxio Peres tunelin çıxışında ciddi qəzaya uğrayıb. Maşın evakuasiya olunduqdan sonra dağıdılmış baryer bərpa olunub və 40 dəqiqədən sonra sessiyaya restart verilib – sürücülərin ixtiyarında cəmi 2.5 dəqiqə vaxt olub.

Bütün doqquz sürücü trasa çıxsa da, soyumuş trasda bir dövrədə təkərləri qızdırmaq mümkün olmayıb və heç kim yaxşı nəticə göstərə bilməyib. Nəticədə Fettel poul qazanıb – karyerasında iyirminci, mövsümdə isə beşinci, Batton ikinci, Uebberi isə üçüncü olub…