Barselonada Lando Norris podiuma qalxdığı üçün komanda bunun vacib irəliləyiş olduğunu hesab edir və bu həftəsonu uğuru davam etdirməyə çalışacaq, xüsusən də nəzərə almaq lazımdır ki, bir il əvvəl McLaren sürücüləri Avstriyada ikiqat qələbə qazanmışdılar, 2024-cü ildə isə Oskar Piastri də Red Bull Rinqdə podiuma qalxmışdı.
Çempionatın 8-ci mərhələsinə McLaren şassinin arxa hissəsinə aid bir sıra kiçik təkmilləşdirmələr hazırlayır və cümə günü məşqlərdə eksperimental arxa qanadın sınağını keçirməyi planlaşdırır. bu barədə McLaren Applied Engineering-in texniki direktoru Nil Holdi məlumat verib.
Nil Holdi: “Tarixən Avstriya trasında komandamız yaxşı çıxış edib və nəticələrin belə sıx olduğu şəraitdə uğurun təkrarlanacağının zəmanətli olduğunu düşünmürük, amma əhvali-ruhiyyəmiz nikbindir. Düşünürük ki, Red Bull Rinqin xarakteristikaları MCL40 üçün uyğundur və sürücülər yenə də ön sıralarda mübarizə aparacaqlar.
Biz texnikanı davamlı təkmilləşdirməyə və maşının sürətini artırmağa çalışırıq. Bu mərhələyə hazırlıq zamanı komanda şassinin arxa hissəsinə aid kiçik yeniliklərin tətbiqinə fokuslanıb və cümə məşqləri ərzində eksperimental arxa qanadı sınaqdan keçirəcəyik.
Yenilənmələr paketi əvvəlki mərhələlərdə təqdim olunanlar qədər genişmiqyaslı olmasa da, bütün bu təkmilləşdirmələr mövsüm boyu nəzərdə tutulmuş modernləşdirmə planının bir hissəsidir və biz bir dövrə üzrə nəticələri yaxşılaşdırmaq üçün hər fürsətdən istifadə etməyə davam edirik.
Həmçinin bu həftəsonu havanın yağışlı ola biləcəyinə hazırlıq görürük və belə şəraitdə maşının effektivliyini yoxlamaq imkanı əldə edəcəyik. Bu mövsümdə çox sürətlə öyrənməliyik və yağışlı trasda enerji və güc ilə necə işləmək lazım olduğunu dəqiq başa düşmək çox vacibdir – bu, maşının hər parametrini optimallaşdırmağa və şəraitdən asılı olmayaraq onun effektivliyini maksimuma çatdırmağa imkan verəcək”.
