Martin Brandl: “Monzadakı ev yarışından sonra, Antonelli son cərgədən start alaraq qalib gələndən sonra artıq onun dünya çempionu olacağına heç bir şübhə qalmayıb. Əsas məqam ondadır ki, Kimi bütün istedadını ən sərt təzyiq altında belə göstərə bilib.
Məsələn, Ostində onun ən sürətli maşını olmayıb, amma buna baxmayaraq yarışı yenə qazanıb və inamlı qələbə əldə edib. Hazırda onun Maksa qarşı üstünlüyü 119 xaldır, Mercedes üzrə komanda yoldaşı Corc Rasselli isə 130 xal qabaqlayır.
Mövsüm ərzində Corcun bəxti çox vaxt gətirməyib, amma məncə məsələ bunda deyil. Əgər Maksın mövsümün əvvəlindən daha sürətli və etibarlı maşını olsaydı, hesab edirəm ki, dünya çempionatındakı hadisələr başqa cür inkişaf edə bilərdi və mövsümün sonluğu fərqli ola bilərdi. Hər halda gənc Antonelli il boyu sürətini nümayiş etdirib, düzgün qərarlar qəbul edib və əla çıxış edib.
Bunu hamı hətta Meksikoda da görüb, orada o, Şarl Lekleri ötüb. Kimiyə doqquzuncu yeri tutmaq kifayət edirdi, amma o, möhtəşəm manevr edib və 3-cü yeri tutub. Həmin ötmə sayəsində biz həqiqətən nağıllardakı kimi podium görmüşük, baxmayaraq ki, Mercedes-in maşını yenə də ən sürətli olmayıb.
Podiumda Antonelliylə birlikdə iki böyük sürücü – Lyuis Həmilton və Maks Ferstappen dayanıb və bütün dünya möhtəşəm mənzərənin şahidi olub! Ümumilikdə Kimi sadəcə əla çıxış edib və komandası ona hərtərəfli dəstək verib. Amma yenə də çempionluq qələbəsi ilk növbədə onun öz xidmətidir və titulu çox inamlı şəkildə qazanıb.
Ötən ilin çempionu Lando Norris və yeddiqat titul sahibi Lyuis Həmilton bildiriblər ki, Kimi buna layiqdir, eyni fikri Corc Rasselldə səsləndirib. Düşünürəm ki, bu, Antonellinin 2026-cı ildəki nailiyyətlərinə ideal yekundur.
Keçən mövsüm Kimi üçün o qədər də uğurlu alınmayıb, o, debütant üçün xarakterik olan çoxlu səhvlərə yol verib və bu, xüsusi təəccüb doğurmayıb. Hər şey onun Avstraliyada məşqlərdə maşını qəzaya uğratması ilə başlayıb. Həmin il doqquz yarış olub ki, o, ümumiyyətlə diqqət çəkməyib və xal qazana bilməyib, amma bu mövsüm sadəcə məğlubedilməz olub. Məncə, bu, onun yalnız istedadından və təzyiqin öhdəsindən gəlmək bacarığından yox, həm də intellektual potensialından xəbər verib.
Düzünü desəm, mən gözləyirdim ki, o sınacaq, titulun taleyinin həll olunduğu yarışlarda əsəb gərginliyinə tab gətirə bilməyəcək – onun yerində olan sürücülərin böyük əksəriyyəti ilə məhz belə olardı, baxmayaraq ki, belə sürücülər çox deyil. Amma o, sadəcə sınmayıb – əksinə, məhz təzyiq altında həqiqətən fərqlənə bilib.
Həmçinin vurğulamaq lazımdır ki, Antonelli, Mercedes komandasında onunla çalışan insanların təcrübəsindən çox səmərəli yararlana bilib. Məsələn, onun yarış mühəndisi Piter Bonnington vaxtilə Mixael Şumaxer, Lyuis Həmilton kimi çempionlarla, daha əvvəl isə (Honda Racing-də) Censon Battonla işləyib.
Bundan əlavə, atası Marko Antonellidə sürücü və avtoidmanda peşəkardır və bütün bunlar Kimiyə adətən hamımızın qarşısına çıxan maneələri uğurla dəf etməyə kömək edib. Daha az əhəmiyyətli deyil ki, Mercedes komandasının rəhbəri Toto Volff çətin anlarda sürücüsünə həmişə dəstək verib, Formula 1-də isə bu, elə də tez-tez rast gəlinən hal deyil. Bütün bunlar Kiminin bu il əldə etdiyi uğurun təməlini formalaşdırıb”.
