2005-ci ildə gələcək yeddiqat dünya çempionu McLaren-lə müqaviləsiz qalıb, halbuki onun Uokinq təmsilçisi ilə əməkdaşlığı bundan xeyli əvvəl başlayıb. Üstəlik, həmin dövrdə o, gənclər seriyalarında indi Scuderia Ferrari-yə rəhbərlik edən Vassyörün Frederik komandasında çıxış edib.
20 ildən çox əvvəl baş verənləri vaxtilə o dövrdə McLaren-in əməliyyat direktoru vəzifəsini tutan Martin Uitmarş belə danışıb. 2004-cü ilin sonunda onun Entoni Həmiltonla ciddi fikir ayrılıqları başlayıb. Entoni oğlunun artıq GP2 seriyasına (indiki Formula2) keçməsinin vaxtının çatdığını israr edib, Uitmarş isə Lyuisin daha bir mövsüm Avropa Formula3 Seriyasında çıxış etməli olduğunu düşünüb:
“O vaxt möhkəm mübahisə etdik. Məni onun karyerasını məhv etməkdə, Formula3-də saxlayaraq qarşısını kəsməkdə ittiham edirdilər. Lyuis artıq çox yaxşı çıxış edirdi – atası da hiss edirdi ki, başqa variantlar var. Nəticədə müqaviləni pozdum…”
Təəccüblü deyil ki, Həmilton həmin vəziyyəti indi də karyerasındakı ən çətin dönəmlərdən biri adlandırır.
“2005-ci ildə Frederiklə çalışırdım, – RacingNews365 onun sözlərini sitat gətirib. – Bu, həyatımın maraqlı dövrü idi. Təbii ki, çox gənc idim və mümkün qədər tez Formula1-ə düşmək istəyirdim. Ümid edirdim ki, artıq ora düşə bilərəm, baxmayaraq ki, belə bir şansın nə vaxt yaranacağını bilmirdim.
Mən hər həftə Martin Uitmarşa zəng edirdim və nə vaxt sükan arxasına keçə biləcəyimi soruşurdum. 2005-ci ildə GP2 seriyası yarandı və mən ora keçməyə hazır olduğumu israr edirdim, çünki düşünürdüm ki, bu yeni sinifdə elə ilk mövsümdəcə çempion ola bilərəm.
Sonda belə alındı ki, müqaviləsiz qaldım – tamamilə axmaq bir hekayə idi. McLaren-lə razılaşmalarım ləğv olundu və bu, həyatımın ən çətin dövrlərindən birinə çevrildi.
Mənə Formula3-də növbəti bir neçə yarış keçirmək imkanı verildi və onların hamısını qazandım, bundan sonra yenidən McLaren-lə müqavilə aldım. Ardınca 2006-cı il əla keçdi (Həmilton GP2 çempionu oldu) və Frederikin komandası (ART Grand Prix) ilə Xeresdə keçirilən ilk testləri çox yaxşı xatırlayıram. Onun reaksiyasını görmək, əlbəttə ki, çox xoş idi.
Mən bilirdim ki, onun görəcəyi hər şey Ron Dennisə (ovaxtkı McLaren rəhbərinə) çatacaq. Demək olar ki, bu, həyatımı dəyişən anlardan biri idi. Mən həmişə xatırlayacağam ki, (2006-cı ildə) Ronla birlikdə İtaliya Qran Prisində Kimi Rəykköneninin McLaren maşınının önündə start düzlüyündə dayanmışdım…”
Bu, Rəykkönenin Uokinq komandasında son mövsümü idi, Kimi həmin vaxt poul qazanıb, Həmilton isə artıq GP2 seriyasının çempion titulunu özünə təmin edib. Dennis də Formula1 yarışından əvvəl onu Monzadakı avtodromun start düzlüyünə özü ilə birlikdə çıxmağa dəvət edib. Bundan sonra McLaren komandasının rəhbəri müsahibələrinin birində bunları deyib: “Lyuis müstəsna istedada malikdir, bunu o, bu il nümayiş etdirib və bütün mövsüm ərzində göstərdiyi nəticələrlə birmənalı şəkildə fəxr etmək olar. Vaxtı gələcək, komanda və Lyuis 2007-ci illə bağlı planlarını açıqlayacaqlar”.
2007-ci ildə titulun taleyi yalnız mövsümün finalında həll olundu, çempionluq artıq Ferrari-də çıxış edən məhz Rəykkönenə qismət oldu, Lyuis isə vitse-çempion oldu. Üstəlik, onun ovaxtkı komanda yoldaşı Fernando Alonsoyla eyni sayda xalı var idi. Amma növbəti mövsümdə Həmilton ilk dəfə dünya çempionatını qazandı. O, 2012-ci ilə qədər McLaren-də çıxış edib, daha sonra isə Mercedes-ə keçib, amma bu artıq başqa hekayədir.
