Fransa-2021: Yarış

F-1.az xatırladır ki, cümə axşamı baş tutan məşqlərdə Valtteri Bottas və Maks Ferstappen lider olubdular. Dünənki sərbəst yürüşlərdə isə Maks bir daha hamıdan fərqlənib. Niderlandlı sürücü sıralanma turunda da hegemonluğunu davam etdirərək, əsas rəqibi Həmiltonu üstələyib və poulu əldə edib.

Pirelli bura orta üçlüyü – C2, C3 və C4 tərkibləri gətirib. Medium və Soft təkərlər arasında fərq az olub. Yumşaq təkərlər sürətlə aşındığından yarışa onlarla başlayan olmayıb. Okon, Covinatsi, Rəykkönen, Mazepin və Stroll sərt, qalan sürücülər isə orta təkərlərlə start alıblar.

Yarışa Ferstappen və Həmilton ilk, Bottas və Peres ikinci, Sayns və Qasli isə üçüncü cərgədən başlayıblar. Sıralanma turunda zədələnən Tsunodanın maşınının ötürmələr qutusu dəyişdirilib, qapalı park qaydaları pozulduğu üçün yapon sürücü yarışa pit-leyndən başlamalı olub.

Səhər keçirilən Formula3 yarışı zamanı yağış yağsa da, sonradan dayanıb, asfalt tamamilə quruyub.

Startdan sonra ilk döngədə Ferstappen səhvə yol verərək şikananı kəsib, Həmilton onu ötərək liderliyə yüksəlib. Alonso Lekleri keçsə də, monakolu sürücü mövqeyini qaytarıb. Yerindən ləng tərpənən Norris iki yer itirib. 2-ci dövrədən sonra ilk onluq: Həmilton – Ferstappen – Bottas – Peres – Sayns – Qasli – Lekler – Alonso – Rikkardo – Norris.

Mazepin Şumaxeri qabaqlayaraq sonuncu yerdən qurtulub. İlk üçlükdəki sürücülər ardıcıl sürətli dövrələr vurmağa başlayıblar. 9-cu dövrədə Stroll Rəykköneni geridə qoyub. İki dövrə sonra isə McLaren sürücüləri Alonsonu keçiblər. Bottas dördüncü döngədə səhvə yol verərək bir qədər vaxt itirib. Alonso Fetteldən də geri qalıb. Rikkardo yüksəlişini davam etdirərək Lekleri də üstələyib.

Pit-stop dalğası başlayıb, 15-ci dövrədə Lekler, 16-cı dövrədə Tsunoda və Şumaxer, 17-ci dövrədə Rikkardo, 18-ci dövrədə Bottas, Sayns, Qasli və Rassell, onlardan bir dövrə sonra isə Ferstappen, Alonso və Latifi təkərlərini dəyişiblər. Bottas tempini artırsa da, Maks trasa ondan 1 saniyə önfə qayıdıb.

19-cu dövrədə pit-stop edən Həmilton trasa Ferstappenin arxasında qayıdıb. Lyuis təzyiq göstərməyə çalışsa da, hücum şansı əldə etməyib. Rəykkönen 22-ci dövrədə Lekler, növbəti dövrədə isə Rikkardo, Sayns və Qasli tərəfindən keçilib. Şarl daha sonra Covinatsini də məğlub edib. Peres və Norris 23-cü dövrədə pit yoluna üz tutublar. İki dövrə sonra Lekler Okonu da keçib, lakin bir qədər sonra Rikkardo ilə 7-ci yer uğrunda mübarizədən məğlub ayrılıb.

32-ci dövrədə Norris Saynsı, Alonso isə Lekleri qabaqlayıb. Ferstappen təkərlərin çox aşınmasından şikayət edib. Həmilton da tempini bir qədər azaldaraq təkərlərini qorumağa başlayıb. 32-ci dövrədən sonra ilk onluq: Ferstappen – Həmilton – Bottas – Peres – Fettel – Stroll – Rikkardo – Norris – Sayns – Qasli.

Maks 33-cü dövrədə növbəti pit-stopunu edib. Norris komanda yoldaşını geridə qoyub. Rəykkönen 34-cü, Stroll isə 35-ci dövrədə təkərlərini dəyişib. Ferstappen Peresi keçib və 11 saniyə gerisində olduğu Həmiltona çatmaq üçün  yüksək tempdə sürməyə davam edib. Alonso Saynsı keçərək 9-cu yerə qalxıb. Fettel və Lekler də pit-stopa yollanıblar.

Ferstappen 44-cü dövrədə Bottası üstələyib və Həmiltonla fərqi 5 saniyəyə qədər endirib. Fettel də Saynsı keçib. İspan sürücü Strolla da uduzaraq xal zonasından çıxıb. Peres isə Bottası geridə qoyaraq podium şansını artırıb. Ferstappen sürətlə yaxınlaşdığı Həmiltonu nəhayət, sona bir dövrə qalmış üstələyərək liderliyə yüksəlib.

Maks Ferstappen mövsümdə üçüncü, karyerasında isə 13-cü qələbəsini qazanaraq çempionatdalı liderliyini bir qədər də möhkəmlədib. Lyuis Həmilton ikinci olub, Serxio Peres isə finiş xəttini üçüncü keçərək podiumu tamamlayıb.

Red Bull Mühəndislər Kubokunda fərqi 37 xala çatdırıb. McLaren isə Ferrari-ni geridə qoyub.

Yarışı yarımçıq saxlayan sürücü olmayıb.

Mübarizə gələn həftəsonu Avstriyada davam edəcək.

Sürətli dövrə: Maks Ferstappen (Red Bull) – 1:36.404 (35-ci dövrə, 218.156 km/s)

SÜRÜCÜLƏRİN ÇEMPİONATI:

Yer	N	Sürücü	Ölkə	Komanda	Xal
1	33	Maks Ferstappen		Red Bull Racing	131
2	44	Lyuis Həmilton		Mercedes-AMG Petronas F1 Team	119
3	11	Serxio Peres		Red Bull Racing	84
4	4	Lando Norris		McLaren Racing	76
5	77	Valtteri Bottas		Mercedes-AMG Petronas F1 Team	59
6	16	Şarl Lekler		Scuderia Ferrari Mission Winnow	52
7	55	Karlos Sayns		Scuderia Ferrari Mission Winnow	42
8	10	Pyer Qasli		Scuderia AlphaTauri Honda	37
9	3	Daniel Rikkardo		McLaren Racing	34
10	5	Sebastyan Fettel		Aston Martin Cognizant F1 Team	30
11	14	Fernando Alonso		Alpine F1 Team	17
12	31	Esteban Okon		Alpine F1 Team	12
13	18	Ləns Stroll		Aston Martin Cognizant F1 Team	10
14	22	Yuki Tsunoda		Scuderia AlphaTauri Honda	8
15	7	Kimi Rəykkönen		Alfa Romeo Racing ORLEN	1
16	99	Antonio Covinatsi		Alfa Romeo Racing ORLEN	1

MÜHƏNDİSLƏR KUBOKU: