Dünən Corc uzun müddətdir Böyük Britaniyada yaşayan ispan sevgilisi Karmen Montero Mundt ilə nişanlandığını elan edib. O bunu artıq sözə ehtiyac qalmadan edib – romantik şam yeməyi zamanı çəkilmiş bir neçə ifadəli fotoşəkli sosial şəbəkələrdə paylaşıb.
Görünür, hadisə Lacivərd sahillərdə baş verib – ən azı Corcun bir gün əvvəl paylaşdığı və biz də xatırlatdığımız video fransız Rivyerasında, Aralıq dənizi sahilində yerləşən Villefranche-sur-Mer qəsəbəsi yaxınlığında çəkilib.
Rassell və Montero Mundt 2020-ci ildən etibarən görüşürlər və o, digər yarışlarda sürücülərin yanında olan sevgililər kimi tez-tez Qran Pridə görünür. Karmen Böyük Britaniyada ali təhsil alıb – diplomuna görə iqtisadçıdır və maliyyə sahəsində çalışır, eyni zamanda, onun öz kosmetik brendi var.
Şübhəsiz ki, işlərə ciddi yanaşması ilə seçilən 28 yaşlı sürücü dünən baş verən hadisəyə uzun müddətdir hazırlaşırdı, lakin bunu dünən açıqlayıb.
“Şübhəsiz, gələcəyimi Karmenlə bağlayıram, – deyə hələ iyun ayında London qəzeti The Times-a verdiyi müsahibədə Corc etiraf etmişdi. – Ümumiyyətlə, ümid edirəm ki, vaxtı gəldikdə münasibətlərimizi rəsmiləşdirəcəyik. Gələn həftə bu olmayacaq, amma beş ildən artıq gözləməli olmayacağıq”.
Rassellin paylaşdığı xəbərə ilk reaksiya verənlərdən biri komanda yoldaşı Kimi Antonelli olub: “Dostum, ikinizi də təbrik edirəm!”
Əlbəttə, Mercedes komandası, digər çox sayda Formula1 sürücüsü və padokda işləyən beynəlxalq mətbuat nümayəndələri şərhlərini və ya ürək kimi emojilərini yazıblar. Ümumilikdə isə bu paylaşım geniş ictimaiyyət tərəfindən fəal qarşılanıb: yalnız bir neçə saat ərzində iki milyondan çox bəyənmə və 30 mindən artıq şərh toplayıb.
