ABŞ-2016: Yarış

F-1.az xatırladır ki, Həmilton keçən il buradakı yarışda üçüncü titulunu rəsmiləşdirmişdi. Bu il isə Niko Rosberq Ostinə 33 xallıq fərqlə, çox rahat bir şəkildə gəlmişdi. Şənbə günü Lyuis trasın yeni rekordunu müəyyən edərək poulu qazanmışdı.

Pirelli Ostinə Medium, Soft və SuperSoft üçlüyünü gətirib – SuperSoft təkərlər bu yarışa ilk dəfə gətirilib və artıq sərbəst yürüşlərdən onların resursunun olduqca tez bitməsi aydın olub.

Yarışa ilk dörd sürücüdən üçü – Həmilton, Rosberq və Ferstappen Soft-la başlayıb. Arxa yerlərdəki sürücülərdən Nasr və Okon Medium, Rikkardo, Sayns, Ferrari, Williams və Force İndia pilotları SuperSoft, yerdə qalan sürücülər isə Soft təkərlərlə start alıblar.

Startda Həmilton liderliyini qoruyub. Rikkardo Rosberqi, Rəykkönen isə Ferstappeni keçib. Bottas və Fettelin arasında qalan və Fettellə təmas yaşayan Hülkenberq yarışı dayandırmalı olub. On birinci döngədə Kvyat Pereslə toqquşub və 16-cı yerə qədər geriləyib. Bir qədər sonra isə insidentə görə ona 10 saniyə vaxt cəzası və 2 cərimə balı verilib. İkinci dövrədən sonra ilk onluq belə olub: Həmilton – Rikkardo – Rosberq – Rəykkönen – Ferstappen – Fettel – Massa – Sayns – Alonso – Qutyerres. Əla start alan Batton üçüncü dövrədə Qutyerresi keçərək onuncu yerə yüksəlib. Həmilton isə Rikkardo ilə arasındakı fərqi bir saniyədən yuxarı qaldırıb, beləliklə də, avstraliyalı DRS-dən istifadə edə bilməyib.

Doqquzuncu dövrədə Rəykkönen və Rikkardo pit yoluna üz tutublar. Onuncu dövrədə Ferstappen, on birincidə Rosberq, Batton, Qrojan və Peres, onlardan da bir dövrə sonra isə Həmilton, Massa, Sayns və Alonso təkərlərini dəyişiblər. On üçüncü dövrədə Mask Kimini ötüb. Növbəti dövrədə isə yarışa müvəqqəti liderlik edən Fettel pit-stopa çağırılıb. Ferstappen Rosberqə hücumlar etməyə çalışsa da, çempionatın lideri vəziyyəti nəzarətində saxlayıb və buna imkan verməyib. İyirmi birinci dövrədən sonra ilk onluq belə olub: Həmilton – Rikkardo – Rosberq – Ferstappen – Rəykkönen – Fettel – Massa – Sayns – Alonso – Batton.

İyirmi beşinci dövrədə Rəykkönen SuperSoft təkərlərə keçib. Rikkardonun maşınına isə bir dövrə sonra finişə qədər getməyə imkan verəcək Medium təkərləri taxılıb. Növbəti dövrədə Ferstappen pit-stopa yollanıb. Bir dövrə əvvəl ona sürətlənməsi barədə təlimat verilib. Maks elə bilib ki, onu pit-stop üçün gözləyirlər, lakin bu, belə olmayıb. Mexaniklər pit-stop hazırlığını tamamlamamış ora çatan Maks xeyli vaxt itirib. Üç dövrə sonra Maksın maşınının ötürmələr qutusunda problem yaranıb və gənc hollandiyalı maşını kənara çəkməli olub. Onun maşını saxladığı yeri bir qədər təhlükəli hesab edən stüardlar Virtual Təhlükəsizlik Maşını rejimini aktiv ediblər. Otuz ikinci dövrədə Mercedes sürücüləri pit-stop ediblər ki, bu da Rikkardonun ikinci yeri itirməsi ilə nəticələnib.

Otuz doqquzuncu dövrədə Kimi son dəfə pit-stopa yollanıb. Təkərləri dəyişdikdən sonra trasa qayıtmaq istəyən finlandiyalı pit yolunun çıxışında maşını saxlayıb və yarış onun üçün bitib. Bunun səbəbi arxa sağ təkərin yaxşı bağlanmaması olub. Mühəndislərlə danışan Kimi maşını arxaya doğru – komandanın qarajına sürüb.

İlk onluqda gərgin mübarizə davam edib – Alonso Massanı keçərək altıncı yerə yüksəlib. Yarışın sonuna 4 dövrə qalmış arxadakı sürücülərdən kifayət qədər uzaqda olan Fettel SuperSoft təkərlərə keçib. Alman sürücü bir qədər sonra yarışın ən sürətli dövrəsini vurub.

Lyuis Həmilton ABŞ-da ümumilikdə beşinci, Ostində isə dördüncü qələbəsini qazanıb və Rosberqlə arasındakı xal fərqini 26-a salıb. Niko ikinci, Rikkardo isə üçüncü olub. Fettel yarışı dördüncü yerdə tamamlayıb. Son dövrədə Saynsa hücumlar edən Alonso onu ötüb və finiş xəttini 5-ci keçib.

Həmiltonun xal fərqini azaltması çempionatdakı vəziyyəti daha da gərginləşdirib. Bizi bir həftə sonra Meksikada qızğın mübarizə gözləyir…

(*) – Maqnussenin yekun nəticəsinin üzərinə Kvyatla yaşadığı insidentə görə 5 saniyə əlavə edilib.

Sürətli dövrə: Sebastyan Fettel (Ferrari) – 1:39.877 (55-ci dövrə, 198.712 km/saat)

MÜBARİZƏNİ DAYANDIRANLAR:

SÜRÜCÜLƏRİN ÇEMPİONATI:

Yer	N	Sürücü	Ölkə	Komanda	Xal
1	6	Niko Rosberq		Mercedes AMG F1 Team	331
2	44	Lyuis Həmilton		Mercedes AMG F1 Team	305
3	3	Daniel Rikkardo		Red Bull Racing	227
4	5	Sebastyan Fettel		Scuderia Ferrari	177
5	7	Kimi Rəykkönen		Scuderia Ferrari	170
6	33	Maks Ferstappen		Red Bull Racing	165
7	11	Serxio Peres		Sahara Force İndia F1 Team	84
8	77	Valtteri Bottas		Williams Martini Racing	81
9	27	Niko Hülkenberq		Sahara Force İndia F1 Team	54
10	14	Fernando Alonso		McLaren Honda Formula 1 Team	52
11	19	Felipe Massa		Williams Martini Racing	49
12	55	Karlos Sayns		Scuderia Toro Rosso	38
13	8	Roman Qrojan		Haas F1 Team	29
14	26	Daniil Kvyat		Scuderia Toro Rosso	25
15	22	Censon Batton		McLaren Honda Formula 1 Team	21
16	20	Kevin Maqnussen		Renault Sport Formula 1 Team	7
17	30	Colion Palmer		Renault Sport Formula 1 Team	1
18	94	Paskal Verlyayn		Manor Racing MRT	1
19	47	Stoffel Vandorn		McLaren Honda Formula 1 Team	1

MÜHƏNDİSLƏR KUBOKU: