Toskana Qran Prisi: Yarış

F-1.az xatırladır ki, baş tutan bütün sərbəst yürüşlərdə protokollara başçılıq edən sürücü Valtteri Bottas olub. Lakin finlandiyalı sürücü bu uğurunu sıralanma turunda davam etdirə bilməyib və karyerasında 95-ci poulunu əldə edən komanda yoldaşı Lyuis Həmiltona cüzi fərqlə uduzub.

İkinci məşqlərdəki insidentə görə Serxio Peres startda bir yer itirməklə cəzalandırılıb. Startda Mercedes sürücüləri ilk, Red Bull sürücüləri ikinci, Lekler və Stroll üçüncü, Peres və Rikkardo isə dördüncü cərgəni tutublar. Yubiley 1000-ci yarışına çıxan, bununla əlaqədar maşını xüsusi olaraq rəngləyən Ferrarini Leklerin startdakı yeri bir qədər ümidləndirib.

Pirelli buradakı asfalt örtüyünü nəzərə alaraq, ən sərt üç tərkibi gətirib. Tərkiblər arasında fərq böyük olub, Soft təkərlərin tez aşınması, Hard təkərlərin isə yol tutuşunun az olması ilə əlaqədar maşınların çox sürüşməsi Medium təkərləri ən ideal tərkib edib. Kvyat, Rəykkönen, Qrojan, Rassell və Latifi Medium, yerdə qalan sürücülər isə Soft-larla start alıblar.

İsinmə dövrəsində Ferstappenin motorunda problem yaranıb və mühərrik təhlükəsiz rejiminə keçib.

Startda Bottas Həmiltonu keçərək liderliyə yüksəlib. Lyuisi üstələməyə hətta Ferstappen də çox yaxın olub, lakin düzlüyün sonunda motor güc itirib və xeyli geriyə düşüb. Qasli Rəykkönen və Qrojana, Rəykkönen də öz növbəsində Maksla toqquşub, nəticədə Ferstappen və Qasli üçün mübarizə başa çatıb. Sayns Strolla təmasda yerində fırlanıb və Fettel onunla toqquşaraq ön qanadını qırıb. Təhlükəsizlik Maşını trasa çıxıb. 2-ci dövrədən sonra ilk onluq: Bottas – Həmilton – Lekler – Elbon – Stroll – Rikkardo – Peres – Norris – Kvyat – Okon.

Restart 7-ci dövrədə verilib. Bottas sürətlənmək üçün tələsməyib. Nəticədə arxada daha tez sürətlənən sürücülər yenidənq əzaya səbəb olublar – Covinatsi Maqnussenlə, Sayns isə Covinatsi ilə toqquşub. Onlarla birgə, qəzaya qarışan Latifi də yarışdan kənarda qalıblar. Stüardlar bunu əvvəlcə yarış insidenti kimi qəbul etsələr də, sonradan 12 sürücüyə xəbərdarlıq veriblər.

TM yenidən trasa çıxıb, bir qədər sonra isə yarış qırmızı bayraqlarla dayandırılıb – start düzlüyündəki qırıntıları təmizləmək lazım gəlib. Hamı təkərlərini dəyişib – Mercedes sürücüləri, Rassell və Rəykkönen orta, digərləri isə yumşaq təkərləri seçiblər. Əyləclər çox isindiyindən, Okon da yarışdan çəkilməli olub. Fasilə yarım saat davam edib.

İkinci restartda Həmilton liderliyini qaytarıb, Elbon bir neçə yer itirib. 15-ci dövrədə Rikkardo Peresi üstələyib, Stroll 3 dövrə sonra Lekleri üçüncülük uğrunda mübarizədə geridə qoyub, lakin onun komanda yoldaşı Peres mövqe itirməyə davam edib və bu dəfə də Elbona keçilib. Lekler növbəti 3 dövrədə Rikkardo, Elbon və Peresə də boyun əyməli olub. 21-ci dövrədən sonra ilk onluq: Həmilton – Bottas – Stroll – Rikkardo – Elbon – Peres – Lekler – Norris – Kvyat – Rassell.

Lekler 22-ci dövrədə pit-stop edib, bir qədər sonra Qrojanı keçərək 12-ci olub. Rikkardo və Rəykkönen növbəti təkər dəyişimlərini 28-ci dövrədə ediblər. Kimi Pit-stopda xeyli vaxt itirib. Norris Peresi üstələyib. 29-cu dövrədə Peres, Fettel və Qrojan, 30-cu dövrədə Norris, Kvyat və Rassell, 31-ci dövrədə isə Stroll pitə yollanıblar. Rikkardo daha erkən davrandığı üçün Strollu üstələyib. Növbəti dövrələrdə Mercedes sürücüləri və Elbon da yeni təkərlərə keçiblər.

Stroll 43-cü dövrədə təkəri deşildiyi üçün trasdan çıxıb və qəza edib. Yarış yenə də qırmızı bayraqlarla dayandırılıb. Restart 25 dəqiqə sonra verilib, bu dəfə lider öz mövqeyini qoruya bilib, Rikkardo isə Bottası keçib. Lakin finlandiyalı sürücü bir qədər sonra yerini qaytara bilib. 49-cu dövrədən sonra ilk onluq: Həmilton – Bottas – Rikkardo – Elbon – Peres – Norris – Kvyat – Rəykkönen – Qrojan – Lekler.

50-ci dövrədə lekler Qrojanı, Elbon isə Rikkardonu keçib. Rassell də Qrojanı qabaqlayaraq ilk onluğa düşmək üçün sürətini artırıb. Pit yoluna girərkən qaydanı pozan Kimiyə 5 saniyə cəzası verilsə də, finlandiyalı sürücü məharətlə lazım olanı edib və ilk onluqda qalmaq üçün ehtiyacı olan fərqi yaradıb.

Lyuis Həmilton mövsümdə 6-cı, karyerasında isə 90-cı qələbəsini qazanıb. Valtteri Bottas ikinci olaraq komandasına mövsümdə üçüncü dublu qazandırıb. Aleksander Elbon isə karyerasında ilk podiumunu əldə edib.

Çempionat iki həftə sonra Soçi Avtodromunda davam edəcək…

* – Rəykkönenin nəticəsinin üzərinə 5 saniyə əlavə edilib.

Sürətli dövrə: Lyuis Həmilton (Mercedes) – 1:18.833 (58-ci dövrə, 239.518 km/saat)

MÜBARİZƏNİ DAYANDIRANLAR:

SÜRÜCÜLƏRİN ÇEMPİONATI:

Yer	N	Sürücü	Ölkə	Komanda	Xal
1	44	Lyuis Həmilton		Mercedes AMG Petronas	190
2	77	Valtteri Bottas		Mercedes AMG Petronas	135
3	33	Maks Ferstappen		Aston Martin Red Bull Racing	110
4	4	Lando Norris		McLaren F1 Team	65
5	23	Aleksander Elbon		Aston Martin Red Bull Racing	63
6	18	Ləns Stroll		BWT Racing Point F1 Team	57
7	3	Daniel Rikkardo		Renault DP World F1 Team	53
8	16	Şarl Lekler		Scuderia Ferrari	49
9	11	Serxio Peres		BWT Racing Point F1 Team	44
10	10	Pyer Qasli		Scuderia AlphaTauri Honda	43
11	55	Karlos Sayns		McLaren F1 Team	41
12	31	Esteban Okon		Renault DP World F1 Team	30
13	5	Sebastyan Fettel		Scuderia Ferrari	17
14	26	Daniil Kvyat		Scuderia AlphaTauri Honda	10
15	27	Niko Hülkenberq		BWT Racing Point F1 Team	6
16	7	Kimi Rəykkönen		Alfa Romeo Racing	2
17	99	Antonio Covinatsi		Alfa Romeo Racing	2
18	20	Kevin Maqnussen		Haas F1 Team	1

MÜHƏNDİSLƏR KUBOKU: