Karlos Sayns: “Keçən il məhz burada dönüş nöqtəsinə nail ola bilmişdik, çünki maşınımız belə traslərdə özünü çox yaxşı aparırdı və o zaman podium uğrunda mübarizə aparacağımıza ümid etməyə əsasımız vardı. Amma indi mən daha realist düşünürəm.
Hətta yenilikləri nəzərə alsaq belə, sıralanma turunun ilk hissəsindən çıxmaq və ikinci sessiyada yüksək nəticələr uğrunda mübarizə aparmaq bizim üçün asan olmayacaq. Bununla belə, maşın üzərində iş bütün komandaya motivasiya verir, biz irəlilədiyimizə əmin olmaq istəyirik. Əgər bu tədbirlərin effektivliyi təsdiqini tapsa, heç olmasa biləcəyik ki, aerodinamik araşdırmalar zamanı və simulyatorda gördüyümüz mənzərə bizi növbəti mövsümə hazırlıq prosesində hansı istiqamətdə hərəkət etməli olduğumuza yönəldir.
Madrid mərhələsi bu il bizim üçün ən pis yarış həftəsonu olub, liderlərdən hər dövrədə üç saniyəyədək, orta qrup komandalarından isə demək olar ki, bir yarım saniyə geri qalmışdıq. Həmin vəziyyətdə texnikanın modernləşdirilməsi tempində geri qalmağımız tam şəkildə üzə çıxmışdı. Yalnız indi ilin lap əvvəlində əlimizdə olmalı olanı əldə edə bilmişik, halbuki artıq 14 yarış geridə qalıb.
Bir çox digər komandalar modernləşmə tempinə görə bizi qabaqlayıb, buna görə də hətta bu yeniliklər paketi də bizi olmaq istədiyimiz səviyyəyə çıxarmayacaq. 2027-ci ilə qədər geri qalmağa məhkumuq, amma buna baxmayaraq, potensialımızı mümkün qədər tam göstərməyə çalışacağıq.
Hesablamalarımız mənə məlumdur, o cümlədən trasın xüsusiyyətləri də amillərdən biri olacaq. Ümid edirəm ki, Bakıda işlərimiz daha yaxşı gedəcək – heç olmasa Mayami, Kanada və ya Monakodakı kimi. Yəqin ki, Monsa və Madridlə müqayisədə geriqalmanı azaldacağıq, amma Malayziya və Ostində o yenidən artacaq”.
Karlos Formula sürücülərini birləşdirən GPDA assosiasiyasının rəhbərlərindən biri olduğu üçün ondan 2027-ci il çempionat təqvimindəki dəyişikliklər barədə də soruşublar. Həmin mövsümdə sprint mərhələlərinin sayı ona çatacaq və onlardan biri Monakoda keçiriləcək.
“Monakoda iki sıralanma turu maraqlıdır, amma ikinci yarışa ehtiyac yoxdur, – deyə ispaniyalı Williams sürücüsü cavab verib. – Elə şənbə günü maşınları parka qoymaq və bazar günü yarışı keçirməmək olar, çünki nəticələr eyni olacaq. Məncə, Monakoda, bu trasın xarakterini nəzərə alsaq, həftəsonu üçün hansısa xüsusi format hazırlamaq daha yaxşı olar”.
