F-1.az xatırladır ki, bu həftənin əvvəlində dünyasını dəyişmiş Laudaya keçən ilin yayında ağciyər köçürülmüşdü. Həmin günlərdə Fettel avstriyalı əfsanəyə məktub yazmışdı.
Sebastyan Fettel: “Onun yaxşı olmadığını eşitmişdim. Həmin günlərdə telefonda danışmağa halı yox idi. Eyni vəziyyətdə olsam, nədən razı qalacağımı düşündüm. Qısa bir yazını oxumaq əhvalını aça bilərdi. Buna görə də bu, ağıllı addım idi.
Sadəcə onu tanıdığım üçün yox, onunla söhbət etdiyimçün özümü xüsusi hiss edirəm. Onunla zarafatlaşdım və bundan həzz aldım. Qəribə idi. Zarafat etdiyini yoxsa ciddi söz dediyini anlamırdıq. Bundan həzz alırdım. Onun kimi insanlarla həmişə qarşılaşmırıq. Sadəcə Formula1-də yox, ümumilikdə deyirəm. O, əvəzsiz insan idi.
O həyatda necə idisə, televiziyada da elə idi. Televiziya ilə real həyatda fərqli davranan insanlar çoxalır. Amma Niki onlardan biri deyildi. Həmişə olduğu kimi davrandı. Açıqsözlü və xarakterli yarışçı idi. İdmanı sevirdi. Onun yerini doldurmaq mümkünsüzdür”.
