18 Avqust 2019, Bazar - 15:09

Rusiya-2016: Yarış

Rusiya-2016: Yarış

Müəllif: Rəhim N.Əliyev, baş redaktor

18:07 - 01 May, 2016

Bu il Rusiya Qran Prisi tarixdə ilk dəfə payızda deyil, yazda keçirilib – Soçi avtodromundakı iki yarışı cəmi altı ay ayırıb, amma buna baxmayaraq may ayının ilk günü tribunalar tamaşaçılarla tam dolu olub. Həftəsonu quru havada baş tutsa da, hava çox soyuq olub. Sərbəst yürüşlərdə Mercedes AMG komandası dominantlıq etsə də, sıralanma turunda iki həftə əvvəl olduğu kimi Çin ssenarisi təkrar olunub…

F-1.az xatırladır ki, Çində Lyuis Həmilton sıralanma turunda iştirak edə bilməmişdi – boksdan çıxarkən britaniyalı sürücünün maşınında MGU-H generatoru imtina etmişdi. Komanda dərin təhlildən sonra bütün detalları dəyişərək əmin idi ki, problem bir daha təkrar olmayacaq. Amma Soçidə yenə də generator imtina edib – düzdür, bu dəfə ikinci sessiyanın sonunda. Nəticədə sıralanma turunda Rosberq inamla poul qazanıb, Həmilton isə sonuncu sessiyada trasa çıxmadığı üçün yarışa onuncu yerdən başlamalı olub.

Sıralanma turunda ikinci nəticə göstərmiş Fettel isə 5 yer itirdiyi üçün (ötürmələr qutusunun vaxtından əvvəl dəyişdirilməsinə görə) start düzümündə ilk cərgəyə Valtteri Bottas keçib. İkinci cərgəni Rəykkönen və Massa bölüşüblər.

Pirelli Soçiyə mövsümün bütün əvvəlki yarışlarından yaxşı tanıdığımız Medium – Soft – SuperSоft üçlüyünü gətirib. Trasda yeyilmənin az olması və təkərin optimal işçi temperatura çətinliklə çatdırılması səbəbindən Medium tərkibi bir kənara qoyulub, strategiyada üstünlük qırmızı (SuperSoft) və sarı (Soft) təkərlərə verilib.

Startda Hülkenberq, Qutyerres və Eriksson sarı təkərləri seçiblər, yerdə qalan sürücülər isə qırmızı təkərlərə üstünlük veriblər.

Qırmızı işıqlar söndükdən sonra Rosberq liderliyini qoruya bilib. İlk döngələrdə bir neçə insident baş verib – Fettel daxili radiusla Rikkardoya hücum edib və bu zaman arxadan Kvyatdan zərbə alıb, növbəti döngədə rusiyalı sürücünün daha bir zərbəsindən sonra Ferrari sürücüsü baryerlərə çırpılıb. Birinci zərbə zamanı Fettel solunda olan Rikkardo ilə təmas yaşayıb. Arxada isə Qutyerres Haryanto və Hülkenberqə çırpılıb – meksikalı sürücü yarışa davam etsə də, digər iki sürücü üçün mübarizə başa çatıb.

Əvvəlcə Virtual Təhlükəsizlik Maşını (VSC) rejimi elan olunub, amma tezliklə onu real Təhlükəsizlik Maşını (SC) əvəz edib. Fürsətdən istifadə edən Peres, Qutyerres, Kvyat, Rikkardo və Eriksson boksa yollanıblar. SC-nin arxasında ilk onluq: Rosberq – Rəykkönen – Bottas – Massa – Həmilton – Ferstappen – Alonso – Qrojan – Maqnussen – Palmer.

4-cü dövrədə yarışa restart verilib. Rosberq yenə də liderliyini qoruyub və dərhal fərqi artırmağa başlayıb. Bottas Rəykköneni, Həmilton isə Massanı qabaqlaya bilib. Eriksson Kvyata hücum edib, sürücülər bir neçə dövrə mövqelərini dəyişiblər, sonda Markus öndə qalıb. Daha sonra Peres də Daniili qabaqlayıb.

7-ci dövrədə Bottasa hücum edən Rəykkönen döngəyə geniş daxil olub, fürsətdən istifadə edən Həmilton Kimini qabaqlayıb. İlk döngədəki insidenti araşdıran stüardlar Kvyata 10 saniyəlik Stop&Go cəzası veriblər – rusiyalı sürücü 9-cu dövrədə cəzasını çəkməyə yollanıb. Qutyerres isə pit-leyndən keçməklə cəzalanıb. 10-cu dövrənin sonunda ilk onluq: Rosberq – Bottas – Həmilton – Rəykkönen – Massa – Ferstappen – Alonso – Qrojan – Maqnussen – Palmer.

12-ci dövrədə Sayns təkərlərini dəyişib, Nasrın maşınında təkərlərdən biri deşildiyi üçün o da boksa tələsib. 14-cü dövrədə Verlyayn, bir dövrə sonra isə Palmer də pit-stop reallaşdırıblar. 15-ci dövrədə Rosberqin Bottas üzərində üstünlüyü 12 saniyəyə çatıb – Bottas, Həmilton və Rəykkönen üçlüyü sıx qrupda getsə də, hücum məsafəsinə yaxınlaşmaq asan olmayıb.

17-ci dövrədə liderlər də pit-leynə yollanıblar – əvvəlcə Bottas və Maqnussen, daha sonra Həmilton və Qrojan, 19-cu dövrədə isə Massa yeni təkər dəsti alıblar. Lyuis trasa düz Bottasın arxasında qayıdıb, amma dərhal hücum edərək finlandiyalı sürücünü keçdikdən sonra hələ pit-stop etməmiş Alonsonu da üstələyib. 21-ci dövrədə Bottas da Alonsonu qabaqlayıb. Bu vaxt Rəykkönen və Batton da pit-stop ediblər, finlandiyalı sürücü trasa Bottasın önündə qayıdıb.

22-ci dövrədə Rosberq və Alonso mexaniklərinə qonaq olublar, Niko liderliyini qoruyub saxlayıb – Həmilton 12 saniyə geridə qalıb. 23-cü dövrədə Ferstappen ilk pit-stopunu sonuncu gerçəkləşdirən sürücü olub. 24-cü dövrənin sonunda ilk onluq: Rosberq – Həmilton – Rəykkönen – Bottas – Massa – Peres – Ferstappen – Eriksson – Alonso – Rikkardo.

Stüardlar Saynsın Palmerə qarşı hücumunu araşdıraraq ispaniyalı sürücünü 10 saniyəlik cərimələyiblər. Nasr dünən Həmiltonun etdiyi səhvi təkrarladığı üçün (2-ci döngədə trasdan çıxaraq düzgün yerdən trasa qayıtmadığına görə) 5 saniyəlik cərimə alıb. 28-ci dövrədə Peres ikinci dəfə təkərlərini dəyişib, Kvyat isə 17-ci yer uğrunda mübarizədə Verlyaynı qabaqlayıb. 30-cu dövrədə Rikkardo Medium təkərlərini Soft-a dəyişib. Batton Palmeri keçərək 12-ci yerə yüksəlib.

34-cü dövrədə Ferstappenin maşınında motor imtina edib.

Rosberqin Həmilton üzərində üstünlüyü uzun müddət stabil qalıb, amma 33-cü dövrədə Niko dövrəvi sürücülər qrupuna çatdığı üçün Həmilton fərqi 7 saniyənin altına sala bilib. 37-ci dövrənin sonunda ilk onluq: Rosberq – Həmilton – Rəykkönen – Bottas – Massa – Alonso – Maqnussen – Qrojan – Peres – Sayns.

Həmiltonun mühəndisi bildirib ki, britaniyalı sürücünün maşınında suyun təzyiqi ilə bağlı problemlər yaranıb – Lyuis tempini aşağı salmalı olub. 47-ci dövrədə Massa pit-stop edib. 50-ci dövrədə Batton Saynsı üstələyərək ilk onluğa daxil olub. 51-ci dövrədə Rikkardo Palmeri qabaqlayıb.

Niko Rosberq Rusiya Qran Prisində qalib gələrək mövsümdə ardıcıl 4-cü qələbəsini qazanıb. Almaniyalı sürücü karyerasındakı ardıcıl 7-ci qələbəni Böyük Dəbilqə ilə qeyd edib – dünənki poul, bu gün startdan finişə qədər liderlik, son dəqiqələrdə sürətli dövrə və qələbə.

Lyuis Həmilton onuncu yerdən start alsa da, finiş xəttini ikinci keçib. Kimi Rəykkönen podiuma çıxmaqla Ferrari-nin tarixində 700-cü podiumu qazanıb. Mövsümdə ilk dəfə hər iki McLaren sürücüsü xal qazanıb. Maqnussen və Peres mövsümdə ilk xallarını qazanıblar. Red Bull komandası isə bu il ilk dəfə xalsız qalıb.

İki həftədən sonra çempionat Avropada – Barselonada davam edəcək!

YerNSürücüKomandaZaman/FərqPit
16Niko RosberqMercedes AMG1:32:41.9971
244Lyuis HəmiltonMercedes AMG+ 0:25.0221
37Kimi RəykkönenFerrari+ 0:31.9981
477Valtteri BottasWilliams+ 0:50.2171
519Felipe MassaWilliams+ 1:14.4272
614Fernando AlonsoMcLaren+ 1 dövrə1
720Kevin MaqnussenRenault+ 1 dövrə1
88Roman QrojanHaas+ 1 dövrə1
911Serxio PeresForce İndia+ 1 dövrə2
1022Censon BattonMcLaren+ 1 dövrə1
113Daniel RikkardoRed Bull+ 1 dövrə2
1255Karlos Sayns (*)Toro Rosso+ 1 dövrə1
1330Colion PalmerRenault+ 1 dövrə1
149Marksu ErikssonSauber+ 1 dövrə2
1526Daniil KvyatRed Bull+ 1 dövrə2
1612Felipe Nasr (**)Sauber+ 1 dövrə1
1721Esteban QutyerresHaas+ 1 dövrə2
1894Paskal VerlyaynManor+ 2 dövrə2

* – Karlos Saynsın yekun nəticəsinə 10 saniyə əlavə olunub

**  Felipe Nasrın yekun nəticəsinə 5 saniyə əlavə olunub

Sürətli dövrə: Niko Rosberq (Mercedes AMG) – 1:39.094 (52-ci dövrə, 212.452 km/saat).

 

MÜBARİZƏNİ DAYANDIRANLAR:

SürücüKomandaDövrəSəbəb
Maks FerstappenToro Rosso34motor
Niko HülkenberqForce İndia1qəza
Rio HaryantoManor1qəza
Sebastyan FettelFerrari1qəza

 

SÜRÜCÜLƏRİN ÇEMPİONATI:

YerNSürücüÖlkəKomandaXal
16Niko RosberqMercedes AMG F1 Team100
244Lyuis HəmiltonMercedes AMG F1 Team57
37Kimi RəykkönenScuderia Ferrari43
43Daniel RikkardoRed Bull Racing36
55Sebastyan FettelScuderia Ferrari33
619Felipe MassaWilliams Martini Racing32
78Roman QrojanHaas F1 Team22
826Daniil KvyatRed Bull Racing21
977Valtteri BottasWilliams Martini Racing19
1033Maks FerstappenScuderia Toro Rosso13
1114Fernando AlonsoMcLaren Honda Formula 1 Team8
1220Kevin MaqnussenRenault Sport Formula 1 Team6
1327Niko HülkenberqSahara Force İndia F1 Team6
1455Karlos SaynsScuderia Toro Rosso4
1511Serxio PeresSahara Force İndia F1 Team2
1622Censon BattonMcLaren Honda Formula 1 Team1
1747Stoffel VandornMcLaren Honda Formula 1 Team1

 

MÜHƏNDİSLƏR KUBOKU:

YerKomandaMotorXal
1Mercedes AMG F1 TeamMercedes157
2Scuderia FerrariFerrari76
3Red Bull RacingTAG Heuer57
4Williams Martini RacingMercedes51
5Haas F1 TeamFerrari22
6Scuderia Toro RossoFerrari17
7McLaren Honda Formula 1 TeamHonda10
8Sahara Force İndia F1 TeamMercedes8
9Renault Sport Formula 1 TeamRenault6

 

 


Son Xəbərlər

İnformasiya

Bölüm Xəbərlər
Mənbə
Baxış Sayı 568
Teqlər , , , , ,
Paylaş

logo