Quru. Günəşli. Havanın temperaturu +28° C, trasın temperaturu +41° C

Monsa uik-endi hələlik yağışsız ötüşür, komandalar və sürücülər sıralanma turuna tam ahzırlaşa biliblər və bu gün səhər nəticələr olduqca sıx alınmışdı.

Sebastyan Fettelin səhər maşınında yenə də generator sıradan çıxıb, sıralanma turuna qədər maşına yeni generator qoyulub.

Sıralanma turuna qədər iki sürücü cərimə olunub – Pastor Maldonado keçən həftə Spada falstart və Timo Qlokla insidentə görə 10 yer itirməklə cəzalandırılmışdı, Pol di Restanın maşınında isə artıq Monsada ötürmələr qutusu dəyişdirilmişdi.

Birinci sessiyanın əvvəlində Hülkenberqin maşınında ötürmələr qutusu sıradan çıxıb, onunla birlikdə “yeni” komandaların sürücüləri mübarizəni dayandırıblar. Protokollara isə Fernando Alonso başçılıq edib – 1:24.175. İkinci sessiyada nəticələr çox sıx olub, protokollara yenə də Alonso başçılıq edib – 1:24.242, ilk onluq isə yarım saniyəyə yerləşib. Mübarizəni Uebber, Maldonado, Peres, Senna, Rikkardo, D’Ambrozio və Vern dayandırıblar.

Sonuncu sessiyada Həmilton elə ilk cəhdində gözəl nəticə göstərib – 1:24.010 və bu nəticəni heç kim yaxşılaşdıra bilməyib. Batton ikinci nəticə ilə McLaren-ə birinci cərgəni tam təmin edib. Mövsümdə ilk dəfə Massa Alonsonu qabaqlaya bilib, düzdür, ispaniyalı sürücünün maşınında stabilizator sıradan çıxıb.

Quru. Günəşli. Havanın temperaturu +30° C, trasın temperaturu +45° C

Monsaya qədər mövsümün gedişində keçirilmiş bütün sıralanma turlarında poulu yalnız Red Bull sürücüləri qazanmışdılar, amma bir çox ekspert hesab edirdi ki, məhz Monsada rəqiblər bu gözəl seriyanı qıra biləcəklər, axı indiyə qədər “qırmızı öküzlər”in Monsada ən yaxşı nəticəsi dördüncü yer olmuşdu…

Birinci sessiyada Pastor Maldonado pit-leynin girişində fırlanaraq ön antiqanadını sındırıb, amma boksa qayıda bilib və yenidən trasa çıxıb. Mübarizəni isə yeni komandaların sürücüləri ilə birlikdə Xayme Algersuari dayandırıb. Daniel Rikkardo ilk dəfə Vitantonio Liutsini üstələyə bilib. Bütün sürücülər 107%-lik həddi keçdikləri üçün sabah yarışın startına çıxacaqlar. Protokollra isə Lyuis Həmilton başçılıq edib.

İkinci sessiyada liderlər də yumşaq təkərlərə keçiblər və sürətlər artıb. Sebastyan Fettel elə ilk cəhdində göstərdiyi nəticə ilə protokollara başçılıq edib. Mübarizəni isə Force İndia, Williams və Sauber komandalarının sürücüləri ilə birlikdə Sebastyen Buemi dayandırıb.

Keçən ilin ən yaxşı beş komandası tam heyətlə sonuncu sessiyada mübarizə aparıblar. Bu dəfə Fettel inamla protokollara başçılıq edib – almaniyalı sürücü mövsümdə 10-cu, karyerasında isə 25-ci poulunu qazanıb. Sabahkı yarışda 2-ci və 3-cü yerlərdən McLaren sürücülər, 4-cü yerdən yerli azarkeşlərin sevimlisi Fernando Alonso start alacaq. yarış maraqlı olacaq…