Avstraliya-2022: Yarış

F-1.az xatırladır ki, cümə günü ilk məşqlərin qalibi Karlos Saynz olub, ikinci sessiyada isə komanda yoldaşı Şarl Lekler protokollara başçılıq edib. Dünənki son sərbəst yürüşlərdə Lando Norris hamıdan sürətli olub. Gərgin keçən sıralanma turunda isə Şarl Lekler növbəti poulunu əldə edib.

İlk iki yarışı koronavirusa yoluxduğu üçün buraxmalı olan Sebastyan Fettel nəhayət ki, mövsümdə debüt etmək imkanı qazanıb.

Pirelli ənənəyə zidd olaraq, bura ardıcıl tərkibləri gətirməyib. Melburnda sürücülərin ixtiyarına C2 və C3-lərlə birlikdə C5 tərkibi verilib ki, onlar çox tez aşındığından, yarış üçün əlverişli olmayıb. Sayns, Alonso, Maqnussen, Fettel, Stroll və Elbon yarışa Hard, qalan sürücülər isə Medium təkərlərlə başlayıblar.

Stüardlar sıralanma turunda nəticə göstərməyən Ləns Strollu və diskvalifikasiya olunan Aleksander Elbonu starta buraxıblar. Hər iki sürücü son cərgəni tutub.

İlk cərgədən Lekler və Ferstappen, ikinci cərgədən Peres və Norris, üçüncü cərgədən isə Həmilton və Rassell start alıblar.

Startda Lekler liderliyini qoruyub, Həmilton üçüncü yerə yüksəlib. Norris iki mövqe itirib, Sayns isə 14-cü yerə qədər geriləyib. İspan sürücü ikinci dövrəsində səhvə yol verib və çınqıllığa düşüb. Təhlükəsizlik maşını trasa girib. Stroll ardıcıl iki pit-stop edib. Əvvəlcə Medium təkərlərə keçib və yarışın sonuna qədər getmək üçün Hard təkərlərə qayıdıb. Restart 6-cı dövrədə verilib və Lekler yerini qoruyaraq uzaqlaşıb.

Peres 10-cu dövrədə Həmiltonu keçərək yerini qaytarıb. Fettel 11-ci dövrədə səhvə yol verib və trasa sonuncu yerdə qayıdıb. İki dövrə sonra döngəyə geniş girən Şumaxer arxadan gələn Çjou tərəfindən keçilib. Latifi və Şumaxxer növbəti iki dövrədə yeni təkərlərə keçiblər. Bottas Tsunodanı ötüb. Yapon sürücüyə hücum edən Maqnuseen də səhvə yol verərək Çjouya keçilib.

Okon 18-ci, Ferstappen və Tsunoda isə 19-cu dövrədə pit-stop ediblər. Qasli pit yolundan çıxan Ferstappeni ötməmək üçün sürətini azaldıb və bu an Alonso fürsətdən istifadə edərək onu geridə qoyub. Peres və Norris 21-ci, Rikkardo, Çjou və Qasli 22-ci, Lekler, Həmilton və Bottas isə 23-cü dövrədə təkərlərini dəyişiblər. Şarl trasa lider olaraq qayıdıb. Peres bir daha Həmiltonu qabaqlayıb və 5-ci yerə yüksəlib. Fettel qəza edib və Təhlükəsizlik Maşını bir daha trasa daxil olub. Rassell, Stroll və Latifi fürsətdən istifadə edərək təkərlərini dəyişiblər və Rassell üçüncü yerdə trasa qayıdıb. TM arxasında ilk onluq: Lekler – Ferstappen – Rassell – Alonso – Peres – Həmilton – Maqnussen – Norris – Rikkardo – Elbon.

Restart 27-ci dövrədə verilib, Lekler yenə də liderliyinə davam edib. İki dövrə sonra Stroll və Bottas Qaslini geridə qoyub, 3-cu dövrədə isə Peres Alonsonu qabaqlayıb. Maqnussen Rikkardonu keçsə də, avstraliyalı sürücü yerini geri qaytarmağa nail olub.

Rassell Peresin hücumlarına məruz qalib və 36-cı dövrədə mübarizədə uduzub. Stroll Bottası keçib. Ferstappen 39-cu dövrədə yanacaq sızması problemi yaşayıb və ondan maşını saxlamasını istəyiblər. Maşına yanğınsöndürən marşallar müdaxilə etməli olublar. Son dünya çempionu ilk 3 yarışda 2-ci dəfə mübarizəni yarımçıq saxlamalı olub.

VTM rejimi elan edilib, Alonso və Maqnussen pit-stopa yollanıblar. Mübarizə 40-cı dövrədə bərpa edilib. Stroll Bottası trasdan çıxarıb. Daha sonra müdaifə olunarkən dəfələrlə mövqe dəyişdirdiyi üçün 5 saniyəlik cəza alıb. Alonso Şumaxeri keçib. Qasli Strollu ötərək 9-cu yerə yüksəlib. Bottas da kanadalı sürücünü ötərək ilk onluğa yüksəlib. Alonso birdən-borə 3 mövqe itirib və pit-stop edib. Qasli səhvə yol verib və Bottas onu üstələyib.

Şumaxer komanda yoldaşını ötüb. Yarışda pit-stop etməyən Elbon yanız son dövrədə təkərlərini dəyişib. Bu taktika sonuncu yerdən başlayan sürücüyə və komandasına mövsümdə ilk xalları qazandırıb.

Şarl Lekler mövsümdə ikinci, karyerasında 4-cü qələbəsini əldə edib. Bu, həm də sürücünün karyerasında ilk “Böyük Dəbilqə” olub. Mövsümdə ilk podiumu əldə edən sürücülər –  Serxio Peres və Corc Rassell müvafiq olaraq, 2-ci və 3-cü yereləri tutublar.

Mübarizə iki həftə sonra İmolada davam edəcək. Bizi orada mövsümün ilk sprint yarışı gözləyir…

*  – Müdafiə olunarkən trayektoriyasını çox dəyişdiyi üçün nəticəsinə 5 saniyə əlavə edilib.

Sürətli dövrə: Şarl Lekler (Ferrari) – 1:20.260 (58-ci dövrə, 236.740 km/saat)

MÜBARİZƏNİ DAYANDIRANLAR:

SÜRÜCÜLƏRİN ÇEMPİONATI:

Yer	N	Sürücü	Ölkə	Komanda	Xal
1	16	Şarl Lekler		Scuderia Ferrari	71
2	63	Corc Rassell		Mercedes-AMG Petronas F1 Team	37
3	55	Karlos Sayns		Scuderia Ferrari	33
4	11	Serxio Peres		Red Bull Racing	30
5	44	Lyuis Həmilton		Mercedes-AMG Petronas F1 Team	28
6	1	Maks Ferstappen		Red Bull Racing	25
7	31	Esteban Okon		Alpine F1 Team	20
8	4	Lando Norris		McLaren Racing	16
9	20	Kevin Maqnussen		Haas F1 Team	12
10	77	Valtteri Bottas		Alfa Romeo F1 Team ORLEN	12
11	3	Daniel Rikkardo		McLaren Racing	8
12	10	Pyer Qasli		Scuderia AlphaTauri	6
13	22	Yuki Tsunoda		Scuderia AlphaTauri	4
14	14	Fernando Alonso		Alpine F1 Team	2
15	24	Quanyu Çjou		Alfa Romeo F1 Team ORLEN	1
16	23	Aleksander Elbon		Williams Racing	1

MÜHƏNDİSLƏR KUBOKU: