FIA-nın Sinqapurdakı mətbuat konfransında Norrisdən Sepanqdakı uğursuz çıxışdan sonra hansı nəticələrin çıxarıldığını danışması istənilib.
Lando Norris: “Həmin yarışın gedişində baş verən hər şeyi, eləcə də maşının işini təhlil etmişik və həm mən şəxsən, həm də komanda bir sıra dərslər çıxarmışıq. Dəqiq anlayırıq ki, hansı məqamlarda daha yaxşı olmalıyıq və Budapeşt, Zandfort və Madriddə olduğumuz əvvəlki, daha yüksək səviyyəyə qayıtmaq üçün nə etməliyik.
Komanda hər şeyi aydınlaşdırmaq üçün çox inadla çalışır, amma detallara varmayacağam, sadəcə deyəcəyəm ki, xeyli nəticə çıxarmışıq. Bəzi məqamlar kifayət qədər aşkardır, məsələn, düzlükdə maksimal sürətimiz çatmırdı, mənim maşınımda isə texniki planda müəyyən çətinliklər var idi.
MCL40-ın potensialını tam açmaq üçün necə hərəkət etməli olduğumuzu bilirik, baxmayaraq ki, bu, asan məsələ deyil. Amma həllini tələb edən çoxlu sual var və komanda onlarla məşğul olur. Deməyə hazır deyiləm ki, bütün çətinliklərimiz məhz Malayziya trasın spesifikası ilə bağlı idi, hərçənd bəzi amillər, əlbəttə, təsir göstərib, məsələn, orada asfalt çox abrazivdir.
Amma yaxşıdır ki, qarşıdakı uik-enddə məhz geri qaldığımız sahələrdə irəliləyə bilib-bilməyəcəyimizi yoxlayacağıq. Üstəlik, mənə həmişə Sinqapurda yarışmaq xoş gəlib, əvvəlki illərdə burada kifayət qədər yüksək nəticələr göstərmişəm.
Amma, şübhəsiz, etiraf etməliyik ki, Bakı və Sepanqda işimizə müəyyən dərəcədə trasın konfiqurasiyası kimi amillər təsir göstərib, buna görə də orada Madriddə və bir sıra digər mərhələlərdə olduğundan zəif çıxış etmişik. Hər necə olsa da, işimizin öhdəsindən daha yaxşı gəlməliyik.
Sinqapurdan danışsaq, bu, maraqlı və əyləncəli tras-dır. Sadəcə, müəyyən məqamlar mənim pilotaj üslubuma uyğundur, burada sükan arxasında özümü çox rahat hiss edirəm və lazım olan ritmi çox tez tapıram. Ümumiyyətlə, maşın da əvvəlki illərdə burada kifayət qədər yaxşı işləyib. Amma tras mürəkkəbdir, ona uyğunlaşmaq lazımdır, nəzərə almaq lazımdır ki, səthi nahamardır, burada çoxlu döngə var.
Şənbə günü keçiriləcək qısa yarışa gəlincə, düşünmürəm ki, bu, indiyədək gördüyünüz ən yaxşı sprint olacaq. Amma hamı üçün çətin olacaq, çünki lazımi sürət səviyyəsinə çox tez çatmaq vacibdir.
Ümumiyyətlə isə tamaşaçı sənin haqqında televiziyada gördüyünə əsasən fikir yürüdür, halbuki Formula1 yalnız sənin nəticələrin deyil, çünki hansısa uik-enddə maşın digər mərhələlərlə müqayisədə o qədər də sürətli olmaya bilər. Yalnız ümid etmək qalır ki, insanlar bunu anlayır. Əgər kiminsə maşını kifayət qədər yaxşı deyilsə, bu, o demək deyil ki, onu idarə edən sürücü digərlərindən zəifdir.
Bu baxımdan mənzərə həmişə kifayət qədər mürəkkəb görünür, amma mənə elə gəlir ki, hazırda keçən illə müqayisədə daha yaxşı pilotaj edirəm və texnikanın potensialını daha dolğun açmağa nail oluram. Demirəm ki, 2025-ci ildə işimin öhdəsindən pis gəlirdim, demək istəyirəm ki, onda maşından 99% sıxırdım, indi isə 99,5%. Söhbət yalnız nüanslardan gedir…”
