Hoteldəki otağa işığın az daxil olması üçün pəncərələri sıx pərdələrlə bağlayaraq yatmaq lazım gəlir və Ferrari bu cür qrafikin vəziyyətinə təsir etdiyini bildirib.
“Bu cür qrafikə qarşı deyiləm, onun xoşuma gəlib-gəlmədiyini deyə bilmərəm, – RacingNews365 yeddiqat dünya çempionundan sitat gətirib. – Amma bu həftə belə qrafikin fitnes bilərziyimin işinə mütləq təsir edəcəyindən çox da məmnun deyiləm. O göstərir ki, yuxu rejimi pozulub, çünki mən gecə saat 3-də və ya 4-də yatıram.
Hətta yaxşı yatdığım və kifayət qədər dincəldiyimi hiss etdiyim halda da bilərzik göstərir ki, yuxu rejiminə cəmi 40 faiz əməl olunub və bu, məni həqiqətən narahat edir. Bu, hər gün düşündüyüm məsələdir – normal yuxu rejimi qurmağa və normal yatmağa çalışıram, amma burada bu, asan deyil.
Hər şey təsir edir – işıq rejimi, nə yediyiniz, nə vaxt yediyiniz və qalan hər şey. Amma bu, Sinqapur həftəsonunun ciddi çətinlik yaradan hissəsidir”.
Bununla belə, əlbəttə, çətinliklər yalnız günün spesifik rejimi ilə məhdudlaşmayıb: Qran Pri Sinqapur tarixində ilk dəfə həftəsonunun proqramına sprint də daxil edilib və bu da o deməkdir ki, maşınların sazlanması və mürəkkəb şəhər trasına uyğunlaşmaq üçün komandalarla sürücülərin ixtiyarında cümə günü cəmi bir məşq olacaq.
Həmilton vurğulayıb ki, bu vəziyyətdə komandanın bazasında simulyatorda görülən işin əhəmiyyəti artır: “Düzünü desəm, əminəm ki, əksər hallarda birinci məşqi kifayət qədər normal keçiririk, sonra isə həftəsonu ərzində kimsə bizə çatır, kimsə də bizdən uzaqlaşır.
Amma hesab edirəm ki, simulyatorda çalışan briqadamız öz işinin öhdəsindən əla gəlib və ümid edirəm ki, həftəsonunun startına yaxşı hazırlaşmışıq. Sinqapurda ixtiyarımızda yalnız bir məşq olanda bu, hətta maraqlıdır. Hamı eyni şərtlər altındadır, hər şey yaxşı alına da bilər, o qədər də yaxşı olmaya da bilər. Cümə günü işlərin necə gedəcəyinə baxarıq”.
