Əsas diqqət aşağıdakı əsas məsələlərə yönəlib:
– isinmə dövrəsində bir neçə boliddə güc itkisi yaşanmasının səbəbinə; – oxşar problemlərin təkrarlanma ehtimalını azaltmaq üçün görüləcək tədbirlərə; – gələcəkdə yağışlı şəraitdə güc qurğusunun sazlamalarının idarə olunmasına (enerji sərfiyyatının məhdudlaşdırılmasına); – komandalar və güc qurğusu istehsalçıları tərəfindən təqdim olunan məlumatlar əsasında çıxarılan nəticələrə.
Təhlilin nəticəsində belə qənaətə gəlinib ki, bəzi bolidlərdə mühərrik aşağı dövrlərdə işləyərkən trasın müəyyən hissələrində gücün 250 kVt azaldılması komandası veriləndə ilkin nəzərdə tutulduğundan daha böyük güc itkisi baş verib və həmin hissələrdə bunu bərpa etmək mümkün olmayıb.
Əgər Sinqapurda da oxşar hava şəraiti yaranarsa, Malayziyada quraşdırılmış mühərrik proqram təminatının eyni versiyasından yenidən istifadə olunacaq. Bundan əlavə, 25 oktyabrda ABŞ Qran Prisinə qədər yağışlı hava üçün proqram təminatının növbəti yenilənməsi buraxılacaq.
Təhlilin yekununa əsasən, sınaq imkanlarının məhdud olduğu nəzərə alınmaqla, proqram təminatının maksimum etibarlılığını təmin etmək məqsədilə onun test edilməsi ilə bağlı tədbirlərin görülməsi tövsiyə olunub.
Komandalar və güc qurğusu istehsalçıları ilə birlikdə FİA, müstəqil qiymətləndirmə və ümumi əks əlaqə vasitəsilə, o cümlədən standart ECU elektron idarəetmə blokunun təchizatçısından alınan məlumatlar əsasında güc qurğularının proqram təminatının sınaq və yoxlama imkanlarını genişləndirməyə davam edəcək.
FİA proqram təminatının tətbiqdən əvvəl sınaqdan keçirilmədiyi ilə bağlı qeydlərə də münasibət bildirmək istəyib. Tətbiqdən əvvəl komandalar və güc qurğusu istehsalçıları simulyatorlarda, daha sonra isə real şəraitdə Belçika Qran Prisi və Niderland Qran Prisinin sərbəst yürüşlərinin ilk sessiyası zamanı testlər aparıblar.
Sepanqda yarış günü proqram təminatının quraşdırılması və inteqrasiyası ardıcıllığı belə olub:
15:45: Bəzi bolidlərdə güc itkisi problemi yarandığı üçün iki isinmə dövrəsindən sonra yarışın start proseduru dayandırılıb.
15:50: Dayandırılmadan sonrakı beş dəqiqə ərzində FİA-nın texniki komandası nasazlığın səbəbini müəyyənləşdirib və problemi aradan qaldırmaq üçün güc qurğusunun proqram təminatının yenilənmiş versiyasını buraxıb.
16:03: Dayandırılmadan 18 dəqiqə sonra FİA komandaları proqram təminatının yenilənmiş versiyasının quraşdırılması və istifadəsi ilə bağlı əlavə texniki tövsiyələr və izahlarla təmin edib.
16:20: Komandalar və güc qurğusu istehsalçıları inteqrasiya prosesini başa çatdırıblar və təxminən 20 dəqiqə sonra bütün iştirakçılar yarışın startına hazır olublar.
16:22: Yarışın startına 10 dəqiqə qaldığını göstərən siqnal verilib.
16:33: Bolidlər start prosedurunun icrası üçün pit-leyni tərk ediblər.
FİA bütün maraqlı tərəflərə – komandalara, güc qurğusu istehsalçılarına və FİA-nın texniki qrupuna – əzmkarlıq və operativliyə görə minnətdardır. Birgə səylər problemi müəyyənləşdirməyə və onun aradan qaldırılması üçün tədbirlər görməyə imkan verib, bunun sayəsində yarış təhlükəsiz şəraitdə keçirilib.
