Azərbaycan-2019: Sıralanma turu

F-1.az xatırladır ki, cümə günü komandalar istədikləri kimi işləyə bilməyiblər – ilk məşqlər Rassellin qəzasına görə ləğv edilib, ikinsi sessiyada isə asfaltın vəziyyəti proqramı ideal şəkildə yerinə yetirməyə imkan verməyib.

Pyer Qasli cümə günü FİA-nın tələbinə uyğun tərəziyə yaxınlaşmadığı üçün yarışa son sıradan başlamaqla cəzalandırılıb. Covinatsi isə motordakı dəyişikliklərə görə startda 10 yer itirəcək.

Bakıda pouldan başlamaq böyük əhəmiyyət daşımır – burada baş tutan 3 yarışda yalnız bir dəfə yarışa ən öndən başlayan sürücü qalib gəlib.

Pirelli bura orta üçlüyü – C2, C3 və C4 tərkiblərini gətirib. Medium və Soft tərkiblər arasındakı fərq 1.5 saniyəyə bərabər olub. Hard təkərlər isə Bakı Şəhər Halqasında səmərəli olmayıb.

Birinci sessiyada ilk cəhdə hamı Soft-larla çıxıb. Bir neçə dövrə vurduqdan sonra təkərləri ideal vəziyyətə gətirmək mümkün olub. Stroll sağ arxa təkərini divara vurub və bokslara qayıdıb. Sürücülər tez-tez səhvlərə yol verərək təhlükəsizlik ciblərinə daxil olublar. Sarı bayraqlar dəfələrlə sürücülərin sürətli dövrələrinə mane olub. Protokollara Qasli başçılıq edib – 1:41.335. Stroll, Qrojan, Hülkenberq, Rassell və Kubitsa mübarizəni dayandırıblar. Polşalı sürücü sessiya bitdikdən sonra 8-ci döngədə qəza edib. Maşının asılqanı qırılıb. Təxliyəyə və bariyerlərin yenidən düzəldilməsinə görə ikinci sessiya 25 dəqiqəlik gecikmə ilə başlayıb.

İkinci sessiyada Ferrari sürücüləri Medium, qalan bütün sürücülər isə Soft təkərlərlə start alıblar. Bu dəfə protokollara Ferstappen başçılıq edib – 1:41.388. Sessiya yenə qırmızı bayraqlarla dayandırılıb – Lekler də 8-ci döngədə qəza edib. Bu dəfə fasilə 27 dəqiqə davam edib. Günəşin batması ilə hava sərinləşib və bu da Mercedes-in lehinə olub. Fettel ikinci cəhdinə Soft-la çıxıb. Sayns, Rikkardo, Elbon və Maqnussenlə yanaşı, nəticə göstərməyən Qasli mübarizəni dayandırıb.

Son sessiyada hamı Soft təkərlərlə boksları tərk edib. Həmilton ilk cəhddə 1:40.703-lük nəticə göstərib. Fettel ikinci cəhddə də Həmiltonu üstələyə bilməyib, əvəzində Bottas sürətli olub – 1:40.495.

Valtteri Bottas mövsümdə ardıcıl ikinci, karyerasında isə 8-ci poulu qazanıb. Həmilton ona cüzi fərqlə uduzub. Beləliklə, Mercedes ilk cərgəni zəbt edib. Fettel üçüncü, Ferstappen isə dördüncü olub. Üçüncü cərgəni isə Peres və Kvyat tutublar.

Sabah saat 16:10-da bizi bəlkə də mövsümün ən maraqlı yarışı gözləyir…

Yer	N	Sürücü	Komanda	1-ci sessiya			2-ci sessiya			3-cü sessiya
Yer	N	Sürücü	Komanda	Yer	Zaman	Dövrə	Yer	Zaman	Dövrə	Zaman	Dövrə
1	77	Vallteri Bottas	Mercedes AMG	6	1:42.026	7	2	1:41.500	7	1:40.495	6
2	44	Lyuis Həmilton	Mercedes AMG	3	1:41.614	8	3	1:41.580	7	1:40.554	6
3	5	Sebastyan Fettel	Ferrari	7	1:42.042	8	5	1:41.889	9	1:40.797	6
4	33	Maks Ferstappen	Red Bull	4	1:41.727	6	1	1:41.388	4	1:41.069	5
5	11	Serxio Peres	Racing Point	11	1:42.249	8	4	1:41.870	6	1:41.593	3
6	26	Daniil Kvyat	Toro Rosso	12	1:42.324	9	9	1:42.221	9	1:41.681	5
7	4	Lando Norris	McLaren	13	1:42.371	9	8	1:42.084	8	1:41.886	6
8	99	Antonio Covinatsi	Alfa Romeo	9	1:42.140	9	10	1:42.381	6	1:42.424	6
9	7	Kimi Rəykkönen	Alfa Romeo	8	1:42.059	9	7	1:42.082	6	1:43.068	6
10	16	Şarl Lekler	Ferrari	2	1:41.426	7	6	1:41.995	4	–	0
11	55	Karlos Sayns	McLaren	5	1:41.936	9	11	1:42.398	8
12	3	Daniel Rikkado	Renault	15	1:42.486	8	12	1:42.477	7
13	23	Aleksander Elbon	Toro Rosso	10	1:42.154	9	13	1:42.494	9
14	20	Kevin Maqnussen	Haas	14	1:42.382	9	14	1:42.699	7
15	10	Pyer Qasli *	Red Bull	1	1:41.335	5	15	–	0
16	18	Ləns Stroll	Racing Point	16	1:42.630	8
17	8	Roman Qrojan	Haas	17	1:43.407	10
18	27	Niko Hülkenberq	Renault	18	1:43.427	8
19	63	Corc Rassell	Williams	19	1:45.062	9
20	88	Robert Kubitsa	Williams	20	1:45.455	8