F-1.az xəbər verir ki, dünən formalaşmış dördlük bu gün də sıx mübarizə aparıb. Cümə günü liderliyi ələ almış Toyota-dan Sebastyen Ojye komanda yoldaşı Kalle Rovanperadan yavaş-yavaş uzaqlaşmağa başlayıb. Nahardan sonra ehtiyatlı tərpənən yeni dünya çempionu tempini itirib və sonuncu dopda Hyundai komandasından Tyerri Növilli də irəli buraxıb. Hyundai-nin digər sürücüsü Ott Tənak ilk dördlüyü tamamlayıb – estoniyalı sürücü liderə 36 saniyə uduzub.
Daha bir veteran sürücü Hyundai-dən Dani Sordo 5-ci yerdədir. Toyota-nın britaniyalı sürücüsü Elfin Evans 6-cı, Ford-un ən yaxşı nümayəndəsi Kreyq Brin isə 7-cidir.
Ford-un sürücüsü Qus Qrinsmit 11-ci dopda ağır qəza yaşayıb – baryerlərə çırpılan maşın ön təkərini asılqanla birlikdə itirib.
Bazar günü mübarizə 4 dopla başa çatacaq.
