Yamaha-nın italiyalı sürücüsü Rossi ikiqat dünya çempionu Mark Markesi ev trasında məğlub edib. Xorxe Lorenso isə Andrea Yannone ilə toqquşmadan sonra finişə çata bilməyib.
Yamaha və Honda sürücüləri arasında gərgin mübarizə sonuncu dövrəyədək davam edib və çempionatın ən titullu sürücüsünün xeyrinə başa çatıb.
Yarışın startı Rossi üçün uğurlu alınmayıb – 5-ci yerdən start alan Doktor ilk dönəyə 6-cı girib. Bundan sonra əla temp götürən Vale rəqiblərini bir-bir keçməyə başlayıb. Yarışın düz ortasında isə öz komanda yoldaşını üstələyən Rossi liderliyi ələ alıb. Mark Markes də Lorensonu keçərək Doktoru izləməyə başlayıb.
Yarışın sonuna 5 dövrə qalmış ispaniyalı sürücü doğma trasında tamaşaçıların gözləri önündə hücumlara başlayıb. Markes bir neçə dəfə önə keçsə də, Rossi hər dəfə liderliyi özünə qaytara bilib – finişə iki dövrə qalmış irəli çıxan italiyalı sürücü rəqibindən uzaqlaşmağa başlayıb. Bu zaman səhvə yol verən Mark qələbə şansını da qaçırıb.
Finış xəttini 3-cü yerdə Markın komanda yoldaşı və həmyerlisi Dani Pedrosa keçib – Dani digər sürücülərdən kifayət qədər sürətli olsa da, liderlərə çox uduzub. Pedrosaya 20 saniyə uduzan Suzuki-nin sürücüsü Maverik Vinyales 4-cü yeri tutub.
Yarışın ilk yarısında liderlik etmiş Lorenso isə finişə çata bilməyib. Təkərlərin effektliyini itirən sonuncu dünya çempionunu sürücülər bir-bir keçməyə başlayıblar. Rossidən sonra Markes, Pedrosa və Vinyales Xorxeni asanlıqla üstələyə biliblər, Ducati-nin sürücüsü Andrea Yannone isə bunu edə bilməyib: sürücülər toqquşublar və hər ikisi üçün mübarizə başa çatıb.
Bu yarışdan sonra Markes çempionatda liderliyə yüksəlib. Çempionatın növbəti yarışı isə 3 həftədən sonra Hollandiyanın Assen trasında baş tutacaq…
| Yer | Sürücü | Komanda | Motosiklet | Zaman/Fərq | Dövrə |
| 1 |  Valentino Rossi |  Yamaha Factory Racing | Yamaha YZR-M1 | 44:37.589 | 25 |
| 2 |  Mark Markes | Repsol Honda Team | Honda RC213V | + 0:02.652 | 25 |
| 3 | Dani Pedrosa | Repsol Honda Team | Honda RC213V | + 0:06.313 | 25 |
| 4 | Maverik Vinyales | Team Suzuki MotoGP | Suzuki GSX-RR | + 0:24.388 | 25 |
| 5 | Pol Esparqaro |  Monster Yamaha Tech 3 | Yamaha YZR-M1 | + 0:29.546 | 25 |
| 6 |  Kel Kratçlou |  Team LCR | Honda RC213V | + 0:36.244 | 25 |
| 7 | Andrea Dovitsiozo | Ducati Team | Ducati Desmosedici GP16 | + 0:41.464 | 25 |
| 8 | Alvaro Bautista | Aprilia Racing Team | Aprilia RS-GP | + 0:42.975 | 25 |
| 9 | Danilo Petruççi | Pramac Racing | Ducati Desmosedici GP15 | + 0:45.337 | 25 |
| 10 | Hektor Barbera | Avintia Racing | Ducati Desmosedici GP14 | + 0:46.669 | 25 |
| 11 |  Cek Miller |  Marc VDS Racing Team | Honda RC213V | + 0:49.514 | 25 |
| 12 | Ştefan Bradl | Aprilia Racing Team | Aprilia RS-GP | + 0:55.133 | 25 |
| 13 |  Yucin Laverti | Aspar Racing Team | Ducati Desmosedici GP14 | + 0:57.974 | 25 |
| 14 | Tito Rabat | Marc VDS Racing Team | Honda RC213V | + 1:00.141 | 25 |
| 15 | Mikele Pirro | Avintia Racing | Ducati Desmosedici GP14 | + 1:00.429 | 25 |
| 16 | Skott Reddinq | Pramac Racing | Ducati Desmosedici GP15 | + 1:16.269 | 25 |
| 17 |  Yonni Hernandes | Aspar Racing Team | Ducati Desmosedici GP14 | + 1 dövrə | 24 |
| – | Aleş Esparqaro | Team Suzuki MotoGP | Suzuki GSX-RR | – | 18 |
| – | Andrea Yannone | Ducati Team | Ducati Desmosedici GP16 | – | 16 |
| – | Xorxe Lorenso | Yamaha Factory Racing | Yamaha YZR-M1 | – | 16 |
| – | Brədli Smit | Monster Yamaha Tech 3 | Yamaha YZR-M1 | – | 6 |
