Hazırkı dünya çempionu ötən şənbə günü 2030-cu ilin sonuna qədər McLaren-lə müqaviləsini uzatdığını açıqlayıb və Britaniya mətbuatına açıqlamasında komandanın əvvəlki səviyyəsinə qayıtmasına kömək etmək üçün öz nüfuzundan necə istifadə etdiyini danışıb. Bundan başqa, onun sözlərinə görə, keçən mövsümlə müqayisədə indi bolidi daha yaxşı idarə edir, halbuki həmin il titulu qazanmışdı.
“İllər keçdikcə nə vaxt fikrini bildirməyin, nə vaxt isə susmağın daha doğru olduğunu anlayırsan, – deyə Lando Sky Sports-a müsahibəsində bildirib. – Sürücünün komandanın əməkdaşlarından biri kimi malik olduğu təsirdən danışsaq, ilk illərdə müəyyən həddi keçməməyə çalışırdım. O cümlədən, səsimin başqalarından daha gur çıxmamasına xüsusi diqqət yetirirdim.
Ancaq zaman keçdikcə başa düşürsən ki, mənim rolum yalnız bolidi idarə etməklə məhdudlaşmır. Eyni zamanda lider olmaq və komandanı arxanca aparmaq da bu rolun bir hissəsidir. McLaren-də çalışan hər kəsin adından danışa bilərəmmi? İnsanları daha yüksək nəticələr qazanmağa necə həvəsləndirmək olar? Təbii ki, bununla yanaşı, özümü də irəli sövq etməliyəm…
Mən sadəcə anladım ki, komandanın inkişaf istiqamətlərinin seçiminə təsir göstərmək üçün müəyyən gücə və nüfuza sahib ola bilərəm. Əlbəttə, bundan sui-istifadə etmək olmaz, amma eyni zamanda bilirəm ki, elə bir mövqedəyəm ki, istədiyimi ala bilirəm – boliddən, komandadan, ətrafımdakı insanlardan.
Bütün bunlar çox vacibdir və hər bir idmançı bundan istifadə etməlidir – hansı idman növündə çıxış etməsindən asılı olmayaraq. İstədiyini əldə etmək üçün necə davranmalı olduğunu anlamalısan. Məncə, hazırda məni əhatə edən insanlarla, komandamla, müxtəlif vəzifələrdə çalışan mütəxəssislərlə işləyərkən çox əlverişli vəziyyətdəyəm.
Bütün bunlar komandanın iş mədəniyyətini formalaşdırır və nəticədə ən vacib olan da məhz budur”.
