Ferrari hələlik rəsmi açıqlama verməsə də, Autoracer nəşri yazır ki, qarşıdakı yarış həftəsonunda Şarl Leklerin və Lyuis Həmiltonun maşınlarının rəng çaları Mixael Şumaxerin Scuderia-dakı ilk mövsümünə həsr olunacaq. Məlumata görə, SF-26 1996-cı il Ferrari F310-un üslubunda tərtib ediləcək.
Rəng çalarının əsasını qırmızı və qara rənglərin qızılı disklərlə birləşməsi təşkil edəcək, lakin müasir versiya 30 il əvvəlki dizaynın tam surəti olmayacaq.
Mixael Şumaxer Ferrari-də çıxışına 1996-cı ildə, bundan əvvəl Benetton-la iki titul qazandıqdan sonra başlayıb. Uğurlar dərhal gəlmədi, amma alman sürücü bir neçə il ərzində komanda ilə birlikdə gələcək qələbələrin təməlini qoydu. 2000-ci ildən etibarən Şumaxer şəxsi hesabda ardıcıl beş çempionluq titulu qazandı, Ferrari isə 1999-cu ildən başlayaraq ardıcıl altı Mühəndislər Kubokuna sahib çıxdı.
30 ildən sonra Ferrari Mixael Şumaxerlə əməkdaşlığın başlanğıcını Monzada qeyd etməyi planlaşdırır. Komanda və azarkeşlər üçün bu, təkcə Scuderia-nın tarixinə deyil, bütün Formula1-ə böyük təsir göstərmiş dövrün başlanğıcına simvolik dönüş olacaq.
SF-26-nın İtaliya Qran Prisi üçün xüsusi rəng çalarının rəsmi təqdimatının gələn həftə baş tutacağı gözlənilir.
