Mayami-2022: Yarış

F-1.az xatırladır ki, cümə günü məşqlərdə əvvəlcə Şarl Lekler, sonra isə Corc Rassell protokollara başçılıq ediblər, dünən Serxio Peres hamıdan fərqlənib. Sıralanma turu isə Ferrari üçün əlamətdar olub – Lekler poul qazanıb və komanda ilk cərgəni zəbt edib.

Yarışa ikinci cərgədən Red Bull sürücüləri, üçüncü cərgədən isə köhnə komanda yoldaşları Valtteri Bottas və Lyuis Həmilton başlayıblar. Sıralanma turunda çıxış edə bilməyən Esteban Okon da xüsusi qərarla yarışa buraxılıb.

Pirelli Mayamiyə orta üçlüyü – C2, C3 və C4 tərkibləri gətirib. Stroll, Rassell, Fettel, Latifi və Okon sərt, yerdə qalan sürücülər isə orta təkərləri seçiblər.

Start insidentsiz alınıb , Lekler yerini qoruyub, Ferstappen isə Saynsı geridə qoyub. Qasli və Alonso ləngiyən Həmiltonu üstələyiblər. 2-ci dövrədə ilk onluq: Lekler – Ferstappen – Sayns – Peres – Bottas – Qasli – Alonso – Həmilton – Norris – Tsunoda.

Şumaxer Rikkardonu qabaqlayıb, Həmilton Alonsodan mövqeyini geri alıb. Rikkardo Maqnussenə də keçilib. Həmilton 6-cı dövrədə Qaslini də ötərək startdakı yerini bərpa edib. Bir dövrə sonra Çjou komandanın istəyi ilə boksa gəlib və yarışı yarımçıq saxlayıb. Ferstappen 9-cu dövrədə Leklerə hücum edərək onu keçib və liderliyə yüksəlib.

Rikkardo Tsunodanı ötüb, Lekler səhvə yol versə də, yerini qoruyub. Alonso 16-cı dövrədə pit-stop edib və komanda onu bir qədər ləngidib. Bir dövrə sonra Qasli və Elbon, 3 dövrə sonra isə Norris yeni təkərlərə keçib. Peres motorun güc itirməsindən şikayətlənib, lakin bir qədər sonra problem həll olunub. 23-cü dövrədə Həmilton, 25-ci dövrədə Lekler, 27-ci dövrədə Ferstappen və Bottas, 28-ci dövrədə isə Sayns və Peres təkərlərini dəyişib.

Maqnussen, Şumaxer, Fettel və Norris arasında sıx mübarizə olub. Maqnussen 32-ci dövrədə iki alman sürücünü keçsə də, 3 dövrə sonra səhvə yol verib və komanda yoldaşını irəli buraxıb. Daha sonra isə Fettel təkərlərini bloklayaraq Norrisin gerisində qalıb. Alonso 40-cı dövrədə Qaslini keçib, ötmə zamanı baş verən təmasa görə ispan sürücü sonradan 5 saniyə cəza alıb.

Şumaxer Qaslini ötüb. Pyer trasdan bir qədər çıxıb, geri qayıdarkən Norrislə toqquşub, McLaren sürücüsünün maşını bir neçə dəfə yerində fırlanıb və dayanıb. Təhlükəsizlik maşını trasa çıxıb, Rassell, Stroll, Peres, Okon, Fettel və Rikkardo dərhal pit-stop ediblər.TM arxasında ilk onluq: Ferstappen – Lekler – Sayns – Peres – Bottas – Həmilton -Rassell – Alonso, Şumaxer, Maqnussen.

Kevin 43-cü dəqiqətə təkərlərini dəyişib. Restart 46-cı dövrədə verilib. Maks liderliyini davam etdirib, Qasli isə maşını boksa gətirib və mübarizəni dayandırıb. Bottas 50-ci dövrədə səhvə yol verib və hər iki Mercedes sürücüsünə keçilib. Daha sonra isə təzə təkərlərlə yarışan Rassell komanda yoldaşını geridə qoyub.

Yeni Medium təkərlərlə mübarizəni davam etdirən Peres 52-ci dövrədə Saynsa hücum edib, maşınlar təmas edib, lakin Karlos onu irəli buraxmayıb. Şumaxerlə Fettelin qəzasından sonra dördqat dünya çempionu yarışı dayandırıb, Mik isə pit-stop etməli olub. TM-dan sonra Lekler daha sürətli təsir bağışlayıb. Ferstappen son dövrələrə qədər onu DRS məsafəsindən çıxara bilməyib, lakin keçid də  verməyib. Sonda isə Maqnussen yarışı dayandırıb.

Beləliklə, Maks Ferstappen mövsümdə üçüncü, karyerasında isə 23-cü qələbəsini qazanıb. Şarl Lekler və Karlos Sayns növbəti iki yeri tutaraq podimumu tamamlayıblar.

Mübarizə 2 həftə sonra Barselonada davam edəcək…

*  – Fernando Alonso insidentə səbəb olduğu üçün nəticəsinə 5 saniyə əlavə edilib.

*  – Kevin Maqnussen insidentə səbəb olduğu üçün nəticəsinə 5 saniyə əlavə edilib.

*  – Daniel Rikkardo trasdan çıxaraq üstünlük əldə etdiyi üçün nəticəsinə 5 saniyə əlavə edilib.

Sürətli dövrə: Maks Ferstappen (Red Bull) – 1:31.456 (53-cü dövrə, 213.255 km/saat)

MÜBARİZƏNİ DAYANDIRANLAR:

SÜRÜCÜLƏRİN ÇEMPİONATI:

Yer	N	Sürücü	Ölkə	Komanda	Xal
1	16	Şarl Lekler		Scuderia Ferrari	104
2	1	Maks Ferstappen		Red Bull Racing	85
3	11	Serxio Peres		Red Bull Racing	66
4	63	Corc Rassell		Mercedes-AMG Petronas F1 Team	59
5	55	Karlos Sayns		Scuderia Ferrari	53
6	44	Lyuis Həmilton		Mercedes-AMG Petronas F1 Team	36
7	4	Lando Norris		McLaren Racing	35
8	77	Valtteri Bottas		Alfa Romeo F1 Team ORLEN	30
9	31	Esteban Okon		Alpine F1 Team	24
10	20	Kevin Maqnussen		Haas F1 Team	15
11	3	Daniel Rikkardo		McLaren Racing	11
12	22	Yuki Tsunoda		Scuderia AlphaTauri	10
13	10	Pyer Qasli		Scuderia AlphaTauri	6
14	5	Sebastyan Fettel		Aston Martin Aramco Cognizant F1 Team	4
15	14	Fernando Alonso		Alpine F1 Team	4
16	23	Aleksander Elbon		Williams Racing	2
17	24	Quanyu Çjou		Alfa Romeo F1 Team ORLEN	1
18	18	Ləns Stroll		Aston Martin Aramco Cognizant F1 Team	1

MÜHƏNDİSLƏR KUBOKU: