Niderland Qran Prisinin 42-ci dövrəsində Həmilton komanda yoldaşının maşınının arxasında çox yaxın gedirdi və daha təzə təkərlərdə olduğuna görə Leklerdən daha sürətli dövrələr vururdu. Şarl boksa çağırılmışdı, çünki onun üçün podium uğrunda mübarizə aparan Lyuisdən fərqli taktiki plan seçilmişdi, lakin Lekler pit-leynə dönməkdən imtina etdi.
O bunu yalnız növbəti dövrədə etdi – mühəndisi əmri təkrar edib israrla boksa çağırandan sonra. Məhz həmin anda əsəbiləşən Həmilton radio ilə sonradan üzr istədiyi, sarkazmla dolu bu sözləri dedi: “Vaxt itirmək üçün əla üsuldur, uşaqlar! Əla işdir!”
Bir qədər sonra o, kinayə ilə soruşdu ki, komanda ona açıq-aşkar sərf etməyən taktika təklif etməklə onu “təcrübə dovşanı” rolunda çıxarmağa çalışmır ki? Nəticədə Həmilton podiuma yüksələ bilmədi və yarışı dördüncü yerdə başa vurdu.
Yeddiqat dünya çempionu sonradan sosial şəbəkələr vasitəsilə komandadan açıq şəkildə üzr istəyib emosiyalarına hakim ola bilmədiyini etiraf etsə də, Montoya hesab edir ki, bu əhvalat bununla bitməyə bilər və davamı ola bilər.
AS Colombia-ya müsahibəsində sabiq Formula1 sürücüsü Ferrari-də baş verənləri Mercedes komandasının hərəkətləri ilə müqayisə edib. Belə ki, Corc Rassell komandanın göstərişini aldıqdan sonra bundan narazı olsa da, komanda yoldaşı Kimi Antonellini önə buraxdı. Üstəlik, o, lider gedən Lando Norrisə onsuz da çata bilməzdi.
“Bu, Mercedes-lə bağlı baş verənlərin digər tərəfidir. Həmin komandada hər şeyi lazım olduğu kimi etdilər və düşündüklərini əla şəkildə həyata keçirdilər, – deyə Xuan Pablo bildirib. Yeri gəlmişkən, o özü də vaxtilə çıxış etdiyi Williams və McLaren komandalarının əmrlərinə həmişə sözsüz tabe olanlardan deyildi. – Amma Leklerin mühəndisinin göstərişinə tabe olmaqdan imtina etməsi dəhşətli bir Pandora qutusunu açdı. Bununla o, komandaya dedi ki, “Mən sizin əmrlərinizdən üstünəm və nə iləsə razı deyiləmsə, bunu etməyəcəyəm”. Bu isə dəhşətlidir, belə olmamalıdır, çünki bu, komandadaxili atmosferi korlayır və dramatik nəticələrə gətirib çıxara bilər.
Açığı, mən düşünmürəm ki, Həmilton podiuma qalxa bilərdi, baxmayaraq ki, o, ilk üçlüyə bir qədər yaxın olardı. Üstəlik, Leklerin arxasında gedib onu ötməyə çalışarkən təkərlərin resursunu da sərf etdi. Ümumiyyətlə, Ferrari-də Leklerə belə izah etməli idilər: “Sən tempi daha da artırmalısan, yoxsa komanda yoldaşınla yerlərinizi dəyişmək əmri verməli olacağıq. Bunun üçün iki dövrən var”.
Çünki həmin anda Həmilton onu yaxalayırdı və hər dövrədə fərqi yarım saniyə azaldırdı. Buna görə də Leklerə demək lazım idi ki, ya sürətini artıracaq, ya komanda yoldaşını buraxmalı olacaq, ya da onu pit-stopa çağıracaqlar. Yoxsa hamının bu çəkişməni eşitdiyi radio müzakirələri aparmaq yox…
Amma yarış belədir və komanda yoldaşları arasındakı münasibətlərin insanların düşündüyü qədər yaxşı olmaması tamamilə normaldır. Bu, normal haldır və Zandfortda baş verənlər mənim Formula1-də çıxış etdiyim dövrdə yarışların necə keçdiyini xatırladır – hər dəfə eyni əbədi dram təkrarlanırdı”.
