Macarıstan-2026: Şarl Lekler Ferrari azarkeşlərini ümidləndirib

Mercedes-də Kimi Antonelli kokpiti Frederik Vestiyə verib, Haas-da Rio Hirakava Oliver Börmanın yerini alıb, Alpine-də Paul Aron Franko Kolapintonun yerinə oturub, McLaren-də Leonardo Fornaroli Oskar Piastrinin əvəzinə, Cadillac-da isə Kolton Herta Valtteri Bottasın yerini alıb.

Bütün diqqət yeni Aston Martin AMR26 “B spesifikasiyası”na yönəlib. Macarıstan mərhələsinə Ədrian Nyui, demək olar ki, tamamilə yeni maşın hazırlayıb, yay fasiləsindən sonra isə yenilənmiş Honda mühərriki də hazır olacaq. Nyui özü mərhələyə gəlib yeni yaradıcılığının sınağını izləyib.

Tribunalar cümə səhəri artıq dolmuşdu – Macarıstanda Formula1-i sevirlər. Hava çox isti olmayıb, yüngül külək əsirdi, amma asfalt sessiyanın əvvəlində, demək olar ki, 50°C-yə qədər qızıb.

Sürücülər dərhal trasa çıxıblar, əsas tənzimləmələri qiymətləndirib bokslara qayıdaraq onlara düzəlişlər ediblər. Asfalt ənənəvi çirkli olub, maşınlar sürüşüblər. Həmilton, demək olar ki, son döngədə fırlanıb, amma o maşını sabitləşdirə bilib.

Saynsın radiosu işləməyib, komanda ona Ferstappenin yaxınlaşdığı barədə xəbərdar edə bilməyib – nəticədə, onlar bir-birinə mane olublar. Maks öz narazılığını onun maşınının önündə əyləcə basaraq göstərib. Stüardlar bu insidenti sessiyadan sonra araşdırıblar və Karlosa xəbərdarlıq ediblər.

Əlbon birinci döngədə təkərləri bloklayaraq trasdan çıxıb. Norris səkkizinci döngədə porebrikdən çıxıb.

Sessiyanın ikinci yarısında bir çox sürücü Soft tərkiblərə keçib və sürətlər artıb. Yalnız Aston Martin Hard təkərlərdə qalıb, lakin onlar üçün əsas indi məlumat toplamaqdır.

Amma bütün məlumatları toplamaq mümkün olmayıb – sessiya sonundan 23 dəqiqə əvvəl qırmızı bayraqlarla dayandırılıb. İkinci döngədən çıxarkən Strollun maşınının arxa sol təkərinin asılqan qolunda qırılma olub, maşın fırlanıb – Ləns yeni texnikanı divara dəyməkdən qoruyub saxlaya bilib və üçüncü döngənin təhlükəsizlik zonasında dayanıb.

Strollun maşını tez evakuasiya olunub, bir neçə dəqiqə sonra sessiya yenidən başlayıb.

Sessiyanın sonuna on dəqiqə qalmış Sayns birinci döngədə əyləc zamanı təkərləri bloklayıb təhlükəsizlik zonasında dayanıb, lakin qısa fasilədən sonra hərəkətə davam edib.

Bir dəqiqə sonra Lekler mühəndisə ötürmələr qutusunda problem olduğunu bildirib, pit-leynə dönüb, amma boksa çatmayıb – o, kokpitdən çıxıb və maşını mexaniklər boksa itələyiblər.

Leklerin bu ana qədər göstərdiyi nəticəni heç kim yaxşılaşdıra bilməyib – moneqask sürücü protokollara 1:19.075 nəticə ilə başçılıq edib. “Gənclər” arasında ən yaxşı Mercedes-dən Frederik Vesti olub və yeddinci nəticəni göstərib.