Fransa-2022: Yarış

F-1.az xatırladır ki, dünənki sərbəst yürüşlərdə əvvəlcə Şarl Lekler, sonra isə Karlos Sayns hamıdan sürətli olub. Bu gün isə Maks Ferstappen protokollara başçılıq edib. Sıralanma turunda gərgin mübarizədən Şarl Lekler qalib ayrılaraq növbəti titulunu əldə edib.

Pirelli bura orta üçlüyü – C2, C3 və C4tərkiblərini gətirib. Bottas, Qasli və Sayns sərt, qalan sürücülər isə orta təkərlərlə start alıblar.

Yarışa ilk cərgədən Lekler və Ferstappen, ikinci cərgədən Peres və Həmilton, üçüncü cərgədən isə Norris və Rassell başlayıb. Gücqurğusunda reqlamentdə icazə veriləndən artıq dəyişiklik edən Sayns və Maqnussen son cərgəyə göndərilib.

Lekler startda liderliyini qoruyub, Həmilton Peresi keçib. Tsunoda Okonla mübarizədə yerində fırlanıb, fransız sürücüyə 5 saniyəlik cəza verilib. Maqnussen 7, Stroll isə 5 yer qazanıb.2-ci dövrədə ilk onluq: Lekler – Ferstappen – Həmilton – Peres – Alonso – Rassell – Norris – Rikkardo – Okon – Stroll.

Ferstappen və Lekler ardıcıl sürətli dövrələr vurublar. Lakin tras keçidə imkan verməyib. Bir qədər arxada isə Peresin Həmmiltona hücum cəhdləri olub. Lakin bu da nəticə verməyib. Beşinci dövrədə Rassell Alonsonu, Sayns isə Şumaxeri qabaqlayıb. İspan sürücü bir qədər sonra Elbon və Maqnusseni də geridə qoyub. Red Bull sürücülərinin nəticəsiz hücum cəhdlərindən sonra fərqlər bir qədər artıb. Maqnussen 9-cu, Şumaxer və Çjou 10-cu, Tsunoda isə 12-ci dövrədə erkən pit-stop edib. Sayns hər iki Aston Martin sürücüsünü də ötərək ilk onluğa yüksəlib.

Peleton 15-ci dövrədə o qədər uzanıb ki, heç bir sürücü öndəki rəqibi ilə DRS məsafəsində olmayıb. Ferstappen 16-cı dövrədə pit-stop edərək trasa 7-ci yerdə qayıdıb. Dərhal da vaxt itirmədən Norrisi geridə qoyub. Saynsın növbəti qurbanı isə Rikkardo olub. Lekler 18-ci dövrədə qəza edərək yarışla vidalaşıb. Bunun öz səhvindən olduğunu etiraf edib. TM trasa çıxıb və sürücülər təkər dəyişmək üçün pit yoluna tələsiblər. TM arxasında ilk onluq: Ferstappen – Həmilton – Peres – Rassell – Alonso – Norris – Rikkardo – Sayns – Okon – Stroll.

Ferrari Saynsı pit-stopdan çox təhlükəli şəkildə buraxıb və Elbon onunla toqquşmaqdan son anda yayınıb. Karlosa 5 saniyəlik cəza verilib. Tsunoda yarışdan çəkilib. Restart 21-ci dövrədə elan olunub, Ferstappen yerini qoruyub. Sayns hər iki McLaren sürücüsünü keçib. Daha sonra isə Alonsonu üstələyib. Şumaxer Çjou ilə mübarizədə yerində fırlanıb, çinli sürücünün ön qanadı qırılıb, üstəlik, o da 5 saniyəlik cəza alıb.

Bottas səhvə yol verən Qaslini ötüb. Sayns Rasselli də keçərək dördüncü yerə qalxıb. Daha sonra Qasli Maqnusseni keçib, Bottas təkərlərini dəyişib. Latifi və Maqnussen təmas edərək trasdan çıxıblar. Hər iki sürücü pitə gəlib, Kevin üçün mübarizə başa çatıb. Sayns Peresi də keçdikdən sonra həm cəzasını çəkmək, həm də artıq tam yeyilmiş Medium təkərləri dəyişmək üçün pit-stop edib. Trasa 9-cu yerdə qayıdıb.

Bir qədər sonra Latifi də yarışdan çəkilib. Sayns Okon və Rikkardonu keçərək iki pillə yüksəlib. Bir qədər sonra Norrisi də keçərək sürətlə Alonsoya yaxınlaşıb. Okon isə Rikkardonu məğlub edib. Qasli Elbonu ötüb. Sayns sona 5 dövrə qalmış Alonsonu asanlıqla keçib. Çjou 49-cu dövrədə mübarizəni dayandırmalı olub. Onun maşınının təxliyəsi üçün VTM rejimi elan edilib. Restart cəmi 2 dövrə sonra verilib. Peresin ani gecikməsindən yararlanan Rassell onu keçərək ilk üçlüyə yüksəlib. Bu iki sürücü finişə qədər mübarizə aparsalar da, yerdəyişmə olmayıb.

Beləliklə, Maks Ferstappen mövsümdə 7-ci, karyerasında isə 27-ci qələbəsini qazanaraq çempiondakı xal fərqini 63-ə qaldırıb. Lyuis Həmilton bu mövsüm ilk dəfə Mercedes-ə ikincilik qazandırıb. Komanda həm də hər iki sürücüsü ilə posiuma çıxmağa nail olub – Corc Rassell yarışı üçüncü yerdə tamamlayıb.

Növbəti yarış gələn həftəsonu Macarıstandadır. Sonrasında isə 1 aylıq yay fasiləsi bizi gözləyir…

Sürətli dövrə: Karlos Sayns (Ferrari) – 1:35.781 (51-cü dövrə, 219.575 km/s)

MÜBARİZƏNİ DAYANDIRANLAR:

SÜRÜCÜLƏRİN ÇEMPİONATI:

Yer	N	Sürücü	Ölkə	Komanda	Xal
1	1	Maks Ferstappen		Red Bull Racing	233
2	16	Şarl Lekler		Scuderia Ferrari	170
3	11	Serxio Peres		Red Bull Racing	163
4	55	Karlos Sayns		Scuderia Ferrari	144
5	63	Corc Rassell		Mercedes-AMG Petronas F1 Team	143
6	44	Lyuis Həmilton		Mercedes-AMG Petronas F1 Team	127
7	4	Lando Norris		McLaren Racing	70
8	31	Esteban Okon		Alpine F1 Team	56
9	77	Valtteri Bottas		Alfa Romeo F1 Team ORLEN	46
10	14	Fernando Alonso		Alpine F1 Team	37
11	10	Kevin Maqnussen		Haas F1 Team	22
12	3	Daniel Rikkardo		McLaren Racing	19
13	20	Pyer Qasli		Scuderia AlphaTauri	16
14	5	Sebastyan Fettel		Aston Martin Aramco Cognizant F1 Team	15
15	47	Mik Şumaxer		Haas F1 Team	12
16	22	Yuki Tsunoda		Scuderia AlphaTauri	11
17	24	Quanyu Çjou		Alfa Romeo F1 Team ORLEN	5
18	18	Ləns Stroll		Aston Martin Aramco Cognizant F1 Team	4
19	23	Aleksander Elbon		Williams Racing	3

MÜHƏNDİSLƏR KUBOKU: