Kanada Qran Prisindən sonra başa çatan birinci mərhələnin yekunlarına əsasən, FİA müəyyən edib ki, Mercedes-in daxiliyanma mühərriki etalon sayılan Ford mühərrikindən 2%-dən 4%-ə qədər geri qalır. Buna görə də alman istehsalçıya 2026-cı və 2027-ci illərdə güc qurğusunun hər mövsüm üçün bir əlavə homoloqasiyasını keçirməyə, həmçinin büdcə məhdudiyyətləri çərçivəsində icazə verilən xərcləri və stend sınaqlarının müddətini artırmağa icazə verilib.
Ferrari, Audi və Honda mühərriklərinin geriliyi isə Ford mühərriki ilə müqayisədə 4%-dən çox olub. Buna görə bu istehsalçıların hər biri 2026-cı ildə iki əlavə homoloqasiya, 2027-ci ildə isə daha iki əlavə homoloqasiya hüququ qazanıb. Bununla yanaşı, büdcə məhdudiyyətləri çərçivəsində icazə verilən xərclər və stend sınaqlarının vaxtı da müvafiq şəkildə artırılıb.
Macarıstan Qran Prisindən sonra başa çatan ikinci mərhələnin yekunlarına görə, istehsalçıların heç biri əlavə homoloqasiya almayıb. FİA vurğulayıb ki, qiymətləndirmənin nəticələrinin təfərrüatını açıqlamayacaq, çünki bu məlumat məxfi xarakter daşıyır.
Bu mövsümdə ADUO qiymətləndirməsinin üçüncü mərhələsi Niderland Qran Prisindən Mexiko Qran Prisinə qədər olan etapları əhatə edir.
Nikolas Tombasis, FIA-nın biryerlik maşınlar üzrə yarış direktoru: “ADUO proqramı çərçivəsində FİA hərtərəfli və dərin yoxlama aparıb. İkinci mərhələ başa çatdıqdan sonra qiymətləndirmənin nəticələrinə əminik, çünki məlumatların keyfiyyəti və görülən iş bizə əldə olunan nəticələrin dəqiqliyi barədə yüksək dərəcədə inamla danışmağa imkan verir.
Eyni zamanda, biz məxfiliyi qorumağa və komandalarla güc qurğusu istehsalçılarının əqli mülkiyyətini müdafiə etməyə borcluyuq. Buna görə də nəticələrin təfərrüatını açıqlaya bilmərik.
Bu, ADUO proqramının ilk fəaliyyət ilidir, ona görə də zaman keçdikcə onun bəzi elementlərinin dəyişməsi təbiidir. Mümkün dəyişiklikləri bütün güc qurğusu istehsalçıları ilə müzakirə edəcəyik”.
