Testlərə maşını vaxtında çatdıra bilməyən yeganə komanda Williams-dır. Qrouv təmsilçisi əvvəlcə testlərin ilk gününə qatılmayacaqlarını açıqlamışdılar, lakin daha sonra məlum oldu ki, ikinci günü də buraxacaqlar. Çərşənbə günü trasa çıxacaqları isə sual altındadır…
F-1.az bildirir ki, iki komanda sürücülərinin hər ikisinin köməyindən istifadə edib – Mercedes komandasında Valtteri Bottas nahardan sonra maşını Lyuis Həmiltona təhvil verib, Renault-da isə Niko Hülkenberqi Daniel Rikkardo əvəz edib.
Startdan 5 dəqiqə sonra qırmızı bayraqlar dalğalanıb. Kimi Rəykkönen çınqıllığa düşüb və trasa qayıda bilməyib. Sessiya gün ərzində daha 3 dəfə dayandırılıb. Nahardan əvvəl Roman Qrojan yanacaq sistemindəki problemə görə maşını saxlamalı olub. Günün ikinci hissəsində Karlos Sayns motor güc itirdiyi üçün pit-leynin sonunda dayanmalı olub. Eyni problemlə Rəykkönen sessiyanın sonlarında qarşılaşıb.
Göstərilən nəticələr hələ ki, çox böyük əhəmiyyət daşımır. Çünki komandalar diqqətlərini yaxşı nəticə göstərməyə ayırmayıblar. Hazırda bütün komandalar problemlərin aşkarlanaraq həll edilməsi üçün çalışırlar. Növbəti həftə göstəriləcək nəticələr daha əhəmiyyətli olacaq və komandaların vəziyyəti barədə müəyyən məlumatlar verəcək.
Pirelli testlərə beş tərkib gətirib – ən sərt tərkib, C1, ən yumşağı isə C5 ilə işarələnib. Mercedes və Renault sürücüləri ən sərt təkərlərlə işləyiblər. Protokollara iki yarış məsafəsindən daha çox dövrə vuran Sebastyan Fettel başçılıq edib – 1:18.161. Deyəsən, Ferrari etibarlı və sürətlidir.
Testlər sabah davam edəcək və əksər komandalarda sürücü dəyişikliyi olacaq…
| Yer | N | Sürücü | Komanda | Zaman | Fərq | Dövrə | Təkər |
| 1 | 5 | Sebastyan Fettel | Ferrari | 1:18.161 | – | 169 | С3 |
| 2 | 55 | Karlos Sayns | McLaren | 1:18.558 | + 0:00.397 | 119 | С4 |
| 3 | 8 | Roman Qrojan | Haas | 1:19.159 | + 0:00.998 | 65 | С3 |
| 4 | 33 | Maks Ferstappen | Red Bull | 1:19.426 | + 0:01.265 | 128 | С3 |
| 5 | 7 | Kimi Rəykkönen | Alfa Romeo | 1:19.462 | + 0:01.301 | 114 | С3 |
| 6 | 26 | Daniil Kvyat | Toro Rosso | 1:19.464 | + 0:01.303 | 77 | С4 |
| 7 | 11 | Serxio Peres | Racing Point | 1:19.944 | + 0:01.783 | 30 | С3 |
| 8 | 77 | Valtteri Bottas | Mercedes AMG | 1:20.127 | + 0:01.966 | 69 | С2 |
| 9 | 44 | Lyuis Həmilton | Mercedes AMG | 1:20.135 | + 0:01.974 | 81 | С2 |
| 10 | 27 | Niko Hülkenberq | Renault | 1:20.980 | + 0:02.819 | 65 | С2 |
| 11 | 3 | Daniel Rikkardo | Renault | 1:20.983 | + 0:02.822 | 44 | С2 |
