Almaniya-2019: Sıralanma turu

Ardıcıl ikinci ildir ki, Hokkenhaymdakı həftəsonunda hava ən həlledici faktorlardan biridir. Dünən hərarət +40 dərəcəyə yaxınlaşıb, amma gecə yağan yağış havanı bir qədər sərinləşdirib. Sıralanma turunun gedişində də yağıntı ehtimalı istisna olunmayıb.

F-1.az xatırladır ki, hər 3 məşq sessiyasının qalibi Ferrari sürücüləri olublar. Mercedes-in 125 illiyinin şərəfinə xüsusi rənglənmiş maşınları bir qədər geri qalıblar.

Bu dəfə Hard, Medium və Soft təkərlər rolunu müvafiq olaraq, C2, C3 və C4 tərkibləri oynayıb. Cümə günü +50 dərəcəyə qədər qızmış asfaltda təkərlər çox isinirdi, bu gün isə sürücülər daha ideal şəraitdə işləyə biliblər.

Birinci sessiyada hamı Soft təkərlərlə trasa çıxıb. Fettel motorun güc itirdiyini bildirib və boksa qayıdıb. Turbində yaranmış problemi dərhal həll etmək mümkün olmayıb və Sebastyan sıralanma turunda iştirak edə bilməyib. O, Avstriyada da güc qurğusunun probleminə görə şənbə gününün həlledici sessiyasını yarımçıq qoymalı olmuşdu. Kvyat boksdan bir qədər təhlükəli çıxıb və Qrojanın maşını son anda kənara çəkməsi toqquşmanın qarşısını alıb. Stüardlar insidenti araşdırıblar və heç kim cəzalandırılmayıb. Protokollara Lekler başçılıq edib – 1:12.229. Fettellə yanaşı, Kubitsa, Rassel, Elbon və Norris mübarizəni dayandırıblar.

İkinci sessiyada Lekler, Ferstappen və Mercedes sürücüləri Medium təkərlərlə boksdan ayrılıblar. Lekler FİA-nın ilk və son döngələr üçün qoyduğu qadağanı pozub – trasdan tam çıxıb və buna görə həmin dövrədəki nəticəsi qeydə ləğv edilib. Ferstappen də motorun güc itirməsindən şikayət edərək boksa qayıdıb, lakin bir qədər sonra yenidən trasa çıxıb, lakin Soft təkərə keçib. Həmiltonun ilk cəhddəki 1:12.149-luq nəticəsi ən sürətli olub. Zaman göstəriciləri xeyli sıx olub. Stroll, Kvyat, Rikkardo, Maqnussen və Covinatsi son mərhələyə keçə bilməyiblər.

Son sessiyada hamı Soft təkərlərlə trasa çıxıb. Lekler yanacaq sistemindəki problemə görə boksdan ayrıla bilməyib və Ferrari-nin hər iki sürücüsü texniki problemlərə görə sıralanma turunu yarımçıq qoymalı olub. Həmilton ilk cəhdində 1:11.767-lik nəticə göstərib. Ferstappen ona 0.346 saniyə uduzsa da, Bottası üstələyə bilib. İlk dördlükdəki sürücülər ikinci cəhdlərində nəticələrini yaxşılaşdıra bilməyiblər.

Lyuis Həmilton mövsümdə dördüncü, karyerasında isə 87-ci poulunu əldə edib. Ferstappen onunla birlikdə ilk cərgədən start alacaq. İkinci cərgədə Bottas və Qasli, onların arxasında isə Rəykkönen və Qrojan qərarlaşacaqlar. Bu, Qasli və Rəykkönen üçün mövsümdə ən yaxşı start mövqeyidir.

Bizi sabah Bakı vaxtı ilə 17:10-da olduqca maraqlı yarış gözləyir…

Yer	N	Sürücü	Komanda	1-ci sessiya			2-ci sessiya			3-cü sessiya
Yer	N	Sürücü	Komanda	Yer	Zaman	Dövrə	Yer	Zaman	Dövrə	Zaman	Dövrə
1	44	Lyuis Həmilton	Mercedes AMG	3	1:12.852	7	1	1:12.149	6	1:11.767	6
2	33	Maks Ferstappen	Red Bull	2	1:12.593	6	5	1:12.427	5	1:12.113	6
3	77	Valtteri Bottas	Mercedes AMG	6	1:13.075	7	4	1:12.424	6	1:12.129	6
4	10	Pyer Qasli	Red Bull	4	1:12.991	6	3	1:12.385	3	1:12.522	6
5	7	Kimi Rəykkönen	Alfa Romeo	5	1:13.066	9	6	1:12.519	6	1:12.538	3
6	8	Roman Qrojan	Haas	9	1:13.146	8	9	1:12.769	6	1:12.851	6
7	55	Kaslor Sayns	McLaren	13	1:13.221	9	7	1:12.632	6	1:12.897	6
8	11	Serxio Peres	Racing Point	12	1:13.194	6	10	1:12.776	6	1:13.065	3
9	27	Niko Hülkenberq	Renault	11	1:13.186	6	8	1:12.766	6	1:13.126	3
10	16	Şarl Lekler	Ferrari	1	1:12.229	5	2	1:12.344	4	–	0
11	99	Antonio Covinatsi	Alfa Romeo	10	1:13.170	9	11	1:12.786	6
12	20	Kevin Maqnussen	Haas	7	1:13.103	6	12	1:12.789	5
13	3	Daniel Rikkardo	Renault	8	1:13.131	6	13	1:12.799	6
14	26	Daniil Kvyat	Toro Rosso	15	1:13.278	9	14	1:13.135	6
15	18	Ləns Stroll	Racing Point	14	1:13.256	9	15	1:13.450	6
16	4	Lando Norris	McLaren	16	1:13.333	9
17	23	Aleksander Elbon	Toro Rosso	17	1:13.461	9
18	63	Corc Rassell	Williams	18	1:14.721	11
19	88	Robert Kubitsa	Williams	19	1:14.839	11
20	5	Sebastyan Fettel	Ferrari	20	–	1