Ancaq Danner xüsusilə Hülkenberqin döyüş ruhunu qeyd edib. Formula1-in 39 yaşlı veteranı bunu Corc Rassellə dueli zamanı nümayiş etdirib: Mercedes sürücüsü təxminən on beş dövrə ərzində Nikoya təzyiq göstərib, amma onu keçə bilməyib. Baxmayaraq ki, Mercedes W17 aşkar şəkildə Audi R26-dan sürətlidir, bu mübarizə bir daha təsdiqləyib ki, dar və dolama şəhər traslarında mühərrikin gücü və maşının sürəti əsas amil deyil.
“Hülkenberqin Sinqapurda göstərdiyi performans onun ustalığının klassik nümunəsi idi, – deyə Danner bildirib. – Bu, sadəcə möhtəşəm idi, Niko öz tapşırıqlarının öhdəsindən əla gəlib. Amma məni ən çox təsirləndirən o olub ki, yarışın sonuna yaxın Rassellin hücumlarının qarşısını ala bilib.
Buna qədər Corc təxminən Nikoyla eyni tempdə gedən və ustalıq səviyyəsi baxımından da onunla müqayisə oluna bilən bir neçə sürücünü keçə bilib. Amma məhz Niko ona həqiqi müqavimət göstərib.
Audi kimi komandanın sürücüsü üçün bu, tamamilə düzgün psixoloji yanaşmadır. Çünki liderlər qrupuna çata bilmirsənsə, onda mübarizə aparmalı və mövqeləri döyüşsüz verməməlisən. Ortasəviyyəli komandada çıxış edəndə insanda xüsusi bir inadkarlıq formalaşır və Hülkenberqdə məhz bu keyfiyyət hiss olunur. Elə buna görə də belə sürücülər çox tələb olunur”.
Düzdür, bəzən aqressiv mübarizə tərzi Niko üçün stüardlarla araşdırma ilə nəticələnib və Sinqapurda Nikonu iki dəfə onların yanına çağırıblar, amma Danner hesab edir ki, bu, normal haldır: “Bu, tamamilə normaldır, çünki sürücü komandasına hansısa şəkildə kömək edə bilirsə, bunu etməlidir, həm komandanın maraqları naminə, həm də öz maraqları naminə hərəkət etməlidir. Ümumiyyətlə, Audi-nin idman direktoru İnaki Ruedanın Hülkenberq kimi sürücünü komandaya dəvət etmək üçün öz səbəbləri olmalıdır”.
Bununla yanaşı, Danner vurğulayıb ki, sürət baxımından Audi zavod komandası hələlik öyünəcək vəziyyətdə deyil: “Onların nə dərəcədə irəliləyiş əldə etdiyini kənardan dəyərləndirmək, əlbəttə, çətindir, amma hələlik texniki yeniliklər vəziyyəti ciddi şəkildə dəyişməyə imkan verməyib, çünki onların dövrə nəticələri bir qədər məyus edir və görüləsi iş hələ çoxdur.
Texnikanın modernləşdirilməsi dayanmayan bir prosesdir və Audi bunu mənimsəməlidir. Formula1-də rəqabət son dərəcə yüksək səviyyədədir, amma yenə də görünür ki, bu komandanı həqiqətən inanılmaz məqsədyönlülük fərqləndirir. Cəmi bir neçə ildən sonra Audi çempionluq uğrunda mübarizəyə qoşulmaq niyyətindədir – əgər bunu öz qulaqlarımla eşitməsəydim, inanmazdım.
Belə bir məqsədi çətin ki, real adlandırmaq olsun, çünki sıralanma turunda Audi orta hesabla liderlərə təxminən 2.5 saniyə uduzur və bu, ciddi geriqalmadır. Zirvəyə yüksəlmək üçün onların qarşıda uzun yolu var. Yenə də bu, Formula1-dir və burada yüksək nəticələr əldə etmək üçün həmişə vaxt tələb olunur”.
Təkcə Sinqapur həftəsonunda Niko Hülkenberq topladığı xalların sayını ikiqat artırıb: almaniyalı sürücünün hesabında indi 14 xal var və o, şəxsi hesabda 14-cü yeri tutur, Audi isə Mühəndislər Kubokuda 8-ci pillədə möhkəmlənib, Williams-ı nəzərəçarpacaq dərəcədə qabaqlayır, amma Haas-dan 7 xal geri qalır.
